ޓަގު ބޯޓެއްގެ މައްސަލާގައި 160 މިލިއަން ރުފިޔާ ދައްކަން އެމްޕީއެލްގެ މައްޗަށް ހުކުމްކޮށްފި

މޯލްޑިވްސް ޕޯޓްސް ލިމިޓެޑް (އެމްޕީއެލް) އަށް ޓަގު ބޯޓެއް ބަނދެ ދިނުމުން އެ މަސައްކަތުގެ އަގު ނުދައްކާ އޮތް މުއްދަތަށް 160 މިލިއަނަށް ވުރެ ގިނަ ރުފިޔާ ދައްކަން އެމްޕީއެލްގެ މައްޗަށް ސިވިލް ކޯޓުން އިއްޔެ ހުކުމްކޮށްފި އެވެ.

އެމްޕީއެލްގެ މައްޗަށް އެ ހުކުމް އައީ ނޮވެމްބަރު، 2008 ގައި އެ ކުންފުންޏަށް ޓަގު ބޯޓެއް ބަނުމަށް ސެންޓަ އެންޓަޕްރައިސަސްއާ ހަވާލުކުރުމުން އެ ކުންފުނިން ކުރި މަސައްކަތުގެ އަގުގެ ގޮތުގައި ދައްކަން ޖެހުނު 13 މިލިއަން ރުފިޔާ ނުދައްކާ ތިން އަހަރަށް ވުރެ ގިނަ ދުވަސް ވުމުން ޖޫރިމަނާ އާއި އެހެނިހެން ފީތަކުގެ ގޮތުގަ އެވެ.

ގާޒީ މުހައްމަދު ހަލީމް، ވަކިވަކިން އިއްވެވި ދެ ހުކުމުގައިވާ ގޮތުން 160 މިލިއަން ރުފިޔާ ހަ މަސް ތެރޭގައި އެމްޕީއެލް އިން ކޯޓަށް ދައްކަން ޖެހެ އެވެ. އޭގެ ތެރެއިން 138.9 މިލިއަން ރުފިޔާއަކީ ފައިސާ ނުދައްކާ އޮތް މުއްދަތުގެ ޖޫރިމަނާ އެވެ. ބާކީ 21.1 މިލިއަން ރުފިިޔާއަކީ މަސައްކަތުގެ އަގުގެ ގޮތުގައި ދައްކަން ޖެހޭ 13 މިލިއަން ރުފިޔާ އާއި ސާޗާޖުގެ ގޮތުގައި 6.3 މިލިއަން ރުފިޔާ އާއި ޖީއެސްޓީގެ ގޮތުގައި އަށް ލައްކަ ރުފިޔާ އެވެ.

ކޯޓުގެ ހުކުމުގައިވާ ގޮތުން އިންވޮއިިސްއަށް ފައިސާ ނުދައްކާ އޮތް މުއްދަތުގެ ޖޫރިމަނާގެ ގޮތުގައި 277 މިލިއަން ރުފިޔާ އަސްލު އަރަ އެވެ. އެކަމަކު އެހެން ބައެއް ގައުމުތަކުގައި އަމަލުކުރާ އުސޫލުތަކަށް ބެލުމަށް ފަހު، 277 މިލިއަން ރުފިޔާގެ ދެބައި ކުޅަ އެއް ބައި ކަމަށްވާ 138 މިލިއަން ރުފިޔާ އަށް ޖޫރިމަނާ ދަށްކުރީ ކަމަށް ހުކުމުގައިވެ އެވެ.

އެމްޕީއެލް އިން ދައްކަން ޖެހުނު ޖޫރިމަނާ ބޮޑުވީ ސެންޓަ އެންޓަޕްރައިސަސް އިން އެމްޕީއެލަށް ފޮނުވި އިންވޮއިސްގައި، ފައިސާ ނުދައްކާ ކޮންމެ ދުވަހަކަށް ދެ ޕަސެންޓްގެ ޖޫރިމަނާ އަރަމުންދާނެ ކަމަށް ބުނެފައި އޮތުމުންނެވެ. ސެންޓަ އެންޓަޕްރައިސަސް އިން އެދުނީ ޖޫރިމަނާގެ ގޮތުގައި 293 މިލިއަން ރުފިޔާ ނަގައި ދިނުމަށެވެ.

ޓަގު ބޯޓުގެ މަސައްކަތް ސެންޓަ އެންޓަޕްރައިސަސްއާ ހަވާލުކޮށްފައި ވަނިކޮށް އެމްޕީއެލް އިން ވަނީ ންޓި ކޮރަޕްޝަން ކޮމިޝަނުން އަންގައިގެން ކަމަށް ބުނެ އެ މަސައްކަތް ހުއްޓުވައިފަ އެވެ.