ޖިންސީ ފުރައްސާރަކޮށް އެކަން ސިއްރުކުރަން މަސްކް ފައިސާ ދިން ކަމަށް ބުނާ މައްސަލައެއް ފެންމަތިވެއްޖެ

މަޝްހޫރު މަހުޖަނު އީލޮން މަސްކް، އޭނާގެ ސްޕޭސް އެކްސް ކުންފުނީގެ މަތިންދާބޯޓެއްގައި މަސައްކަތްކުރާ އެޓެންޑެންޓަކަށް ޖިންސީ ފުރައްސާރަކުރިކަން ފޮރުވަންގެން، އެ އަންހެން މީހާ އަށް 250،000 ޑޮލަރު ދިން ކަމަށް ބުނާ މައްސަލައެއް ފެންމަތިވެއްޖެ އެވެ.

ވިޔަފާރީގެ ޚަބަރުތައް ގެނެސްދޭ ބިޒްނަސް އިންސައިޑާގައި، ފުރައްސާރައާ ކުރިމަތިވި ކަމަށް ބުނާ މީހާގެ ގާތް މީހަކާ ހަވާލާދީ ރިޕޯޓްކޮށްފައިވާ ގޮތުގައި، މަސްކް، އެ އަންހެން މީހާއާ ގުޅުން ހިންގަން އުޅުމުން އެކަމާ ދެކޮޅު ހެދި އެވެ.

އޭނާ ބުނި ގޮތުގައި، އެ އަންހެން މީހާ މަސައްކަތް ކުރީ ސްޕޭސް އެކްސްގެ ކޯޕަރޭޓް މަތިންދާބޯޓެއްގަ އެވެ. އެ ބޯޓުގެ ދަތުރެއްގައި މަސްކް، އެ އަންހެން މީހާ ގާތުގައި "ފުލް ބޮޑީ" މަސާޖެއް ދިނުމަށް އެދުނު ކަމަށް ވަނީ ބުނެފަ އެވެ. އަދި އޭގެ ކުރިން، މަސާޖުކުރާ މީހުންގެ ލައިސަންސް ހޯދަން ކުންފުނިން އޮތީ އަންހެން މީހާ އަށް އަންގާފައިވާ ކަމަށް ވެސް ބުނެފައިވެ އެވެ.

މަސްކްގެ އެދުމަށް، ލަގްޒަރީ އެ ފްލައިޓްގައި މަސްކްގެ ކޮޓަރި އަށް މަސާޖުކޮށްދޭން ދިއުމުން، މަސްކް އެއްކޮށް ބަރަހަނާވެ، އަންހެން މީހާގެ ގަޔަށް އަތްލި ކަމަށް ރިޕޯޓްކޮށްފައިވެ އެވެ. ނޫހުގައި ބުނެފައިވާ ގޮތުގައި، މަސްކް އެދޭ ކަންކަން ކޮށްދީފި ނަމަ އަހެއް ގަނެދޭނެ ކަމަށް މަސްކް ބުންޏެވެ. އެ އަންހެން މީހާ އަކީ އާންމު ދިރިއުޅުމުގައި ވެސް އަސް ދުއްވާ އުޅޭ މީހެކެވެ.

އެ އަންހެން މީހާ އެ ހުރިހާ ކަމަށް ދެކޮޅު ހެދި ކަމަށް އޭނާގެ ރަހުމަތްތެރިޔާ ބުންޏެވެ.

އެ މައްސަލަ އޭނާ އެ ކުންފުނީގެ އެޗްއާރަށް ހުށަހެޅުމުން، އޭނާގެ ވަޒީފާ ފުރިހަމަ އަށް އަދާކުރުމަށް ހުރަސްއަޅައި، އެންމެފަހުން އެ ވާހަކަތައް ނުދެއްކޭނެ ގޮތަށް އެއްބަސްވުމެއް ހަދައި، ސޮއިކުރަން މަޖުބޫރުކޮށް ބަދަލުގެ ގޮތުގައި 250،000 ޑޮލަރު ދޭން ހުށަހެޅި ކަމަށެވެ.

އެ އެއްބަސްވުން ހެދިއިރު، އެ އަންހެން މީހާގެ ފަރާތުން ހެކިވެރިޔަކަށް ހުރީ އެ ވާހަކަތައް ނޫހަށް ކިޔައިދިން ރަހުމަތްތެރިޔާ އެވެ.

އެ އެއްބަސްވުމުގެ ދަށުން އެ އަންހެން މީހާ އަށް، މަސްކާއި ސްޕޭސް އެކްސް އަދި މަސްކްގެ ކާރު ކުންފުނި ޓެސްލާ ވެސް ގޯސްކޮށްފައި އެއްވެސް ވާހަކައެއް ދެއްކުން މަނަ އެވެ. އެކަމަކު، އޭނާގެ ރަހުމަތްތެރިޔާ އަށް އެ ގޮތަށް ޝަރުތުކޮށްފައެއް ނުވެ އެވެ.

"އިންސައިޑާ" އިން ބުނި ގޮތުގައި، އެ އަންހެން މީހާގެ ރަހުމަތްތެރިޔާ އެ ނޫހަށް އެ ވާހަކަތައް ކިޔައިދިނީ ފުރައްސާރައާ ކުރިމަތިވި މީހާއަށް ނޭނގި އެވެ. އެކަމަކު، އެ ރިޕޯޓް އެ ނޫހުގައި ޝާއިއުކުރަން، އެ އަންހެން މީހާ އަށް ގުޅި ކަމަށާއި އެކަމާ ވާހަކަ ދައްކަން ބޭނުން ނުވާ ކަމަށް ބުނި ކަމަށް ވެސް އެ ނޫހުން ބުންޏެވެ.

މަސްކް ތުހުމަތުތައް ދޮގުކުރޭ!

އެ ޚަބަރު ރިޕޯޓްކުރުމުގެ ކުރިން މަސްކް ޓުވީޓެއްކޮށް އެ ވާހަކަ ދޮގުކުރި އެވެ. އެ ތުހުމަތާ ގުޅޭ ގޮތުން "އިންސައިޑާ" އިން އޭނާއާ ސުވާލުކުރުމަށް ގުޅުމުން ބުނީ އެއީ މާ ކުރިން ވެސް ވާން އުޅޭ ކަމެއް ކަން އެނގޭ ކަމަށާއި ފަތުރަނީ ދޮގު ވާހަކަތަކެއް ކަމަށެވެ. އަދި ބަޔަކު އެކަން ކުރަނީ ސިޔާސީ މަންފާއެއް ހޯދުމުގެ ނިޔަތުގައި ކަމަށް ބުންޏެވެ.

އެ މައްސަލައިގައި ޖަވާބުދާރީވުމަށް އިތުރު ވަގުތު ދިނުމަށް މަސްކް އެދުމުން، އެ ނޫހުން އޭނާ އަށް ވަގުތު ވެސް ދިނެވެ. އެކަމަކު، އެ ވަގުތުގެ ހަމަވިއިރު ވެސް، މަސްކްގެ ޖަވާބެއް ނުލިބުނު ކަމަށް އެ ނޫހުން ބުންޏެެވެ.

"އަހަރެންގެ 30 އަހަރުވީ ދިގު ކެރިއަރުގައި، މީހަކަށް ޖިންސީ ފުރައްސާރަ ކުރި ނަމަ، މިއީއެއް ނޫން އެ މައްސަލަ ފެންމަތިވާން ޖެހޭނެ ވަގުތަކީ،" އެ ނޫހަށް މަސްކް ވިދާޅުވި އެވެ.

މަސްކް އެހެން ވިދާޅުވިޔަސް، މީގެ ކުރިން، ސްޕޭސް އެކްސް އާއި ޓެސްލާގައި މަސައްކަތް ކުރާ ބައެއް މުވައްޒަފުން ވަނީ އެ ތަނުގައި ޖިންސީ ފުރައްސާރަކުރުމުގެ ސަގާފަތެއް އޮންނަ ކަމަށް ބުނެފަ އެވެ.