ގޫގުލްގައި ދިވެހި ތަރުޖަމާ ނުބައިވެއްޖެ ނަމަ، ދެން ކަންތައް ކުރަންވީ ގޮތް!

އާންމުކޮށް ދިވެހިން އުޅޭ ގޮތަށް، ގޫގުލް ޓްރާންސްލޭޓަށް ދިވެހި ބަސް އިތުރުކުރުމާ އެކު، ދެކޮޅު ނުބަލައި، ޝަކުވާ ފުންޏެއް އޮއްސާލި އެވެ؛ އެއީ މީހަކު ކުރި ޓުވީޓެއްގައި ބުނި އެއްޗެކެވެ. އެހެން ކިޔަން ޖެހުނީ ބައެއް ފަހަރު، ބައެއް ލަފުޒުތަކާއި ޖުމްލަތަކުގެ ތަރުޖަމާ ރޯނުބައިކޮށް އަންނާތީއޭ ބުންޏެވެ.

އެއް ބަޔަކަށް އެކަން ވަރަށް މަޖާވެގެން ވެސް އުޅުނެވެ.

ބީޓާ ސްޓޭޖުގައި ނުވަތަ އަދި އެންމެ ފުރިހަމަ އަށް ނުނިމި، ޓެސްޓަކަށް ދޫކޮށްލާފައިވާ ވާޝަނެއްގައި ކުށެއް ނެތި ނުދާނެއެއްނުން ހެއްޔޭ ވެސް އެހެން ބަޔަކު ކިޔެވެ.

އެ ބަހުސް ޓުވިޓާގައި ވަރަށް ހޫނުވެފައި ވަނިކޮށް، ރާއްޖޭގެ ތަރިކަ އާއި ސަގާފަތާ ބެހޭ މިނިސްޓަރު ޔުމްނާ މައުމޫން ޓުވީޓްކުރެއްވީ އެންމެ ބުއްދިވެރި މީހާ ކަންތައް ކުރާނެ ގޮތެވެ. އެއީ ގޫގުލްގެ ތަރުޖަމާ ނުބައިވެއްޖެ ނަމަ، އެ އިސްލާހު ކުރަން އަމިއްލަ އަށް ޒިންމާ ނެގިދާނެ ގޮތެވެ.

އެންމެ ހަ ސްޓެޕުން އެކަން ކުރާނެ ގޮތް ވެސް މިނިސްޓަރު ކިޔައިދެއްވި އެވެ؛

1. ތަރުޖަމާ ކުރަންވީ ލަފުޒެއް/ޖުމްލަ ލިޔުމަށް ފަހު، އެ ތަރުޖަމާ ރޭޓްކުރާ ދީފައިވާ އޮޕްޝަނަށް ދިއުން.

2. ރޭޓްކުރަން ގޮސްފައި ބޮޑުވަތް އިނގިލި ތިރިއަށް ދައްކާ ފިތަށް ފިތާލުން.

3. ދެން އަންނަ އޮޕްޝަންތަކުން "އަން އިންޑެންޑެޑް މީނިން" ނުވަތަ މާނަ ނުބައި ކަމަށް ބުނާ އޮޕްޝަން ހިޔާރުކޮށްފައި، "ސަބްމިޓަށް" ފިތާލުން.

4. އޭގެ ފަހުން، "ސަޖެސްޓް އޭން އެޑިޓް" އޮޕްޝަނަށް ގޮސް އެ ތަރުޖަމަނާ ރަނގަޅުކުރަންވީ ގޮތް ގޫގުލް އަށް ބުނެދިނުން.

5. އޭރުން ރަނގަޅުކުރި ގޮތަށް ތަރުޖަމާ ވާނެ.

6. ގޫގުލް އިން ޝުކުރުގެ މެސެޖެއް ފޮނުވާނެ.

"ގޫގުލް ޓްރާންސްލޭޓްގައި ދިވެހި ބަސް ހިމެނި ނަމަވެސް، ގޫގުލް އަދިވެސް އެ އަންނަނީ ދިވެހި ބަސް ދަސްކުރަމުން. ލަފުޒެއް ނުވަތަ ޖުމްލައެއްގެ މާނަ ނުބައިކޮށް ތަރުޖަމާވާ ނަމަ، އެ ތަރުޖަމާ ނުބައި ކަމަށް ރޭޓް ކުރައްވައި، ރަނގަޅު ތަރުޖަމާ ގޫގުލްއާ ހިއްސާކޮށްދެއްވާ،" މިނިސްޓަރު ވިދާޅުވި އެވެ.

އެއީ އެވަރުގެ ކަމެކެވެ!

ގޫގުލްގައި ދިވެހި ޓްރާންސްލޭޓް ކުރެވޭ ގޮތް ހެދީ، މި މަހު ބޭއްވި ގޫގުލް ޑިވެލޮޕާސް ކޮންފަރެންސްގަ އެވެ. އެ އިވެންޓްގައި ގޫގުލް ޓްރާންސްލޭޓަށް އަލަށް އިތުރުކުރި ކަމަށް އިއުލާންކުރި 24 ބަހުގެ ތެރޭގައި ދިވެހި ވެސް ހިމެނެ އެވެ.