ނާޕޭލްގެ ކުޅުންތެރިން ބަލިކޮށް ޖޫނިއާ އަދި ކެޑޭޓް ބައިން ވެސް ދީމާ ސެމީ އަށް

ރާއްޖޭގައި މިހާރު ކުރިއަށްދާ، ދެކުނު އޭޝިއާގެ ޖޫނިއާ އަދި ކެޑޭޓް ޓޭބަލް ޓެނިސް ޗެމްޕިއަންޝިޕްގެ ސިންގަލްސްގެ ޖޫނިއާ އަދި ކެޑޭޓް ބައިން ވެސް ފާތިމަތު ދީމާ އަލީ ސެމީ ފައިނަލަށް ދަތުރުކޮށްފި އެވެ.

ދެ ކެޓަގަރީގެ ކުއާޓާ ފައިނަލުގައި ވެސް ދީމާ އާ ވާދަކުރީ ނޭޕާލްގެ ކުޅުންތެރިންނެވެ. މިއަދު ހެނދުނު ކެޑޭޓް ބައިގެ ކުއާޓާ ފައިނަލުގައި ނޭޕާލްގެ ޝޫޖަލްގެ މައްޗަށް ދީމާ ކުރި ހޯދީ ސީދާ ތިން ސެޓުންނެވެ. ދީމާ ސެޓްތައް ކާމިޔާބު ކުރީ 11-4، 11-9 އަދި 11-7 ންނެވެ.

މެންދުރު ފަހު ކުޅުނު ޖޫނިއާ ބައިގެ ކުއާޓާ ފައިނަލުގައި ދީމާ ވާދަ ކުރީ ނޭޕާލްގެ ޝުބާސްތީއާ ދެކޮޅަށެވެ. އެ މެޗުގައި ޝުބާސްތީ ވަނީ ދީމާ އަށް ރަނގަޅު ޗެލެންޖެއް ދީފަ އެވެ. އެކަމަކު ދީމާ ވަނީ 3-1 ސެޓުން މެޗު ކާމިޔާބު ކޮށްފަ އެވެ. ފުރަތަމަ ސެޓް އޭނާ ކާމިޔާބު ކުރީ 11-4 ންނެވެ. ދެވަނަ ސެޓް ޝުބާސްތީ ކާމިޔާބު ކުރީ 11-9 ންނެވެ. އެކަމަކު ފަހު ދެ ސެޓް ފަސޭހަ ކާމައެކު ދީމާ ކާމިޔާބު ކުރި އެވެ. ތިންވަނަ ސެޓުގައި އޭނާ ކާމިޔާބު ހޯދީ 11-1 ގެ ބޮޑު ތަފާތަކުންނެވެ. މެޗުން މޮޅުވީ 11-4 ންނެވެ.