ހަނގުރާމައާ ހެދި ދުނިޔޭގެ ބާޒާރުގައި ކާބޯތަކެތީގެ އަގު ރެކޯޑް އަދަދަކަށް އުފުލުއްޖެ

ރަޝިއާއިން ޔުކްރެއިނަށް އަރައި ފެށި ހަނގުރާމައާ ހެދި ދުނިޔޭގެ ބާޒާރުގައި ކާބޯތަކެތީގެ އަގު ރެކޯޑު އަދަދަކަށް އުފުލިފައިވާކަމަށާއި މިއީ ފަހުގެ ތާރީހެއްގައި މަސް ދުވަހެއްގެެ ތެރޭގައި ކާނާގެ އަގު މިހާ ބޮޑަށް އުފުލުނު ފުރަތަމަ ފަހަރު ކަމަށް އދ. ގެ ފުޑް އެންޑް އެގްރިކަލްޗާ އޯގަނައިޒޭޝަން (އެފްއޭއޯ) އިން ބުނެފި އެވެ.

އެ އިދާރާއިން ބުނީ ފެބްރުއަރީ މަހުގެ 24 ވަނަ ދުވަހުން ފެށިގެން އެ ބަދަލުތައް ފެންނަން ފަށާފައިވާ ކަމަށާއި އެކަމުގެ ސަބަބުން ދުނިޔޭގެ ބައެއް ގައުމުތަކަށް ތަދުމަޑުކަމާ ކުރިމަތިވުމުގެ ބިރު އެބަ އޮތް ކަމަށެވެ. މި ބިރު އޮތް ގައުމުތަކުގެ ތެރޭގައި ހިމެނެނީ މެދުއިރުމައްޗާއި އެފްރިކާގެ ގައުމުތަކެވެ.

ދުނިޔޭގެ ބާޒާރުގައި އެންމެ ގިނަ އަދަދަކަށް ކާނާގެ ބާވަތްތައް އުފައްދާ އެއް ބަޔަކީ ރަޝިއާ އާއި ޔުކްރެއިނެވެ. އޭގެ ތެރޭގައި ކާޑުގެ ބާވަތްތަކާއި ގޮދަނާއި ތަރުކާރީ ތެލާއި ޒުވާރި ފަދަ ތަކެތި ހިމެނެ އެވެ.

އެފްއޭއޯ އިން ބުނި ގޮތުގައި މިދިޔަ މަސް ނިމުނު އިރު ދުނިޔޭގެ ބާޒާރުގައި ކާބޯތަކެތީގެ އަގު ވަނީ 12.6 ޕަސެންޓަށް އުފުލިފަ އެވެ. މިއީ 1990 ވަނަ އަހަރުގެ ފަހުން އަގަށް އެހާ ބޮޑު ބަދަލެއް އައި ފުރަތަމަ ފަހަރެވެ.

އެ އިދާރާގެ ރިޕޯޓުތައް ދައްކާ ގޮތުގައި އެންމެ ބޮޑަށް އަގު އުފުލިފައިވަނީ ވެޖިޓަބަލް އޮއިލް އާއި ސީރިއަލް އާއި މަހުގެ ބާވަތްތަކުގެ އެވެ. ހަކުރާއި ކިރުގެ ބާވަތްތަކުގެ އަގު ވެސް އުފުލިފައިވާ ކަމަށް ވަނީ ރިޕޯޓު ކޮށްފަ އެވެ.

ދުނިޔޭގެ ބާޒާރުގައި ގޮދަނުގެ އަގު ވަނީ 20 ޕަސެންޓަށް އުފުލިފަ އެވެ. އެއީ ޔުކްރެއިނާއި ރަޝިއާއިން ގޮދަނުގެ އެކްސްޕޯޓުގެ 20-30 ޕަސެންޓް ހިއްސާކުރާތީ އެވެ.

ކައްކާ ތެލުގެ އަގު އުފުލިފައިވަނީ ސަންފްލާވާ ތެލުގެ އަގު އުފުލުމާ ގުޅިގެންނެވެ. ސަންފްލާވާ ތެލުގެ އެންމެ ބޮޑު އެކްސްޕޯޓަރަކީ ރަޝިއާ އެވެ. ބައެއް ގައުމުތަކުން ވަނީ ސަންފްލާވާ ތެޔޮ ވިއްކުން ލިމިޓު ވެސް ކޮށްފަ އެވެ.

ކާބޯތަކެތީގެ އިތުރުން ތެލާއި ގޭހުގެ އަގު ވެސް ދުނިޔޭގެ ބާޒާރުގައި ދަނީ އުފުލެމުންނެވެ. ރަޝިއާއިން ހަމަލާތައް ހުއްޓާނުލައިފި ނަމަ ދުނިޔޭގެ އިގްތިސާދު މަޑުޖެހި ބޮޑެތި ގެއްލުންތަކެއް ވާނެ ކަމަށް ތަޖުރިބާކާރުން ލަފާކުރެ އެވެ.