ކޮންމެ ގޮތެއް ވިޔަސް ލަންކާގެ ރައީސް އިސްތިއުފާއެއް ނުދެއްވާނެ

ކޮލަމްބޯ (އެޕްރީލް 6) - ސިޔާސީ ގޮތުން ކިތަންމެ ވަރަކަށް ފިއްތި ނަމަވެސް ލަންކާގެ ރައީސް ގޯޓާބޭ ރާޖަޕަކްސާ އިސްތިއުފާ ނުދެއްވާނެ ކަމަށާއި ސަރުކާރު އޮތީ މިހާރު އުފެދިފައިވާ މައްސަލަތަކަށް ކުރިމަތިލާން ތައްޔާރަށް ކަމަށް ސަރުކާރުގެ ޗީފް ވިޕް ޖޯންސްޓަން ފެނާންޑޯ ވިދާޅުވެއްޖެ އެވެ.

ޕާލަމެންޓުގައި ޖޯންސްޓަން ވިދާޅުވީ ގޯޓާބޭ ރައީސް ކަމަށް އިންތިޚާބުވެވަޑައިގެންފައި ވަނީ 6.9 މިލިއަން މީހުންގެ މެންޑޭޓާ އެކު ކަމަށެވެ.

"ޒިންމާދާރު ސަރުކާރެއްގެ ގޮތުގައި، ރައީސް ގޯޓާބޭ ރާޖަޕަކްސާ، ކޮންމެ ގޮތެއް ވިޔަސް އިސްތިއުފާއެއް ނުދެއްވާނެ،" ހައިވޭ މިނިސްޓަރުގެ މަގާމު ވެސް އަދާކުރައްވާ ޖޯންސްޓަން ވިދާޅުވި އެވެ.

ގައުމުގެ އިގްތިސާދީ ހާލަތު އިންތިހާ އަށް ދަށަށް ގޮސް އާއްމުންގެ ދިރިއުޅުމަށް ނޭދެވޭ އަސަރުކުރަން ފެށުމުން އެތައް ބަޔަކު ނުކުމެ ދަނީ ރައީސްގެ އިސްތިއުފާ އަށް ގޮވާލަމުންނެވެ. މުޒާހަރާތައް ހޫނުވެ އެންމެ ފަހުން ސަރުކާރުން ވަނީ ގިނަ ޕާޓީތައް އެކުލެވޭ ވެރިކަމެއް ގާއިމްކުރުމުގެ ގޮތުން ކެބިނެޓް އިސްތިއުފާ ދީފަ އެވެ. ނަމަަވެސ ސިޔާސީ ޕާޓީތަކުން ވަނީ ސަރުކާރުގައި ބައިވެރިވާން ދެކޮޅު ހަދައި ގޯޓާބޭ އިސްތިއުފާ ދެއްވަން ޑިމާންޑްކޮށްފަ އެވެ. އަދި ސަރުކާރު ކޯލިޝަނުގައި ހިމެނޭ 43 މެންބަރަކު ވަނީ ވަކިވެފަ އެވެ.

އަނެއްކޮޅުން ސަރުކާރުން ވަނީ ލަންކާގައި ކުއްލި ނުރައްކަލުގެ ހާލަތު އިއުލާން ކުރުން ދިފާއު ވެސް ކޮށްފަ އެވެ. އެޑިއުކޭޝަން މިނިސްޓަރު ދިނޭޝް ގުނަވަރުދަނާ ވިދާޅުވީ ކުއްލި ނުރައްކަލުގެ ހާލަތު އިއުލާން ކުރަން ޖެހުނީ ރައީސް އޮފީހަށާއި ސަރުކާރުގެ ތަންތަނަށް އާއްމުން ނުކުމެ ހަމަލާ ދޭން ފެށުމުން ކަމަށެވެ. ނަމަވެސް ރައީސް ގޯޓާބޭ އިއްޔެ ވަނީ ކުއްލި ނުރައްކަލުގެ ހާލަތު އުވާލައްވައިފަ އެވެ.