ރަޝިއާގައި މިހާރު ޓިކްޓޮކް ވީޑިއޯ ނުހެދޭނެ

ރަޝިއާގައި ޓިކްޓޮކް ވީޑިއޯ އަޕްލޯޑް ނުކުރެވޭ ގޮތް ހަދައި، ލައިވް ސްޓްރީމް ވެސް ނުޖެއްސޭނެ ގޮތަށް އިއްޔެ ހަދައިފި އެވެ.

ޓިިކްޓޮކުން ނެރުނު ބަޔާނެއްގައި ބުނީ ރަޝިއާގައި އެ އެޕްގެ މުހިންމު ދެ ފީޗާ ބޭނުންނުކުރެވޭނެ ގޮތް ހަދަން މަޖުބޫރުވީ މިދިޔަ ހަފުތާގައި ރަޝިއާގެ ސަރުކާރުން ފާސްކުރި "ފޭކް ނިއުސް" ގާނޫނާ ހެދި ކަމަށެވެ. އެ ދެ ފީޗާ ބޭނުންނުކުރެވުނަސް، އެ އެޕް މެދުވެރިކޮށް އަދިވެސް މެސެޖުކުރެވޭނެ ކަމަށް ބުންޏެވެ.

ރަޝިއާގެ "ފޭކް ނިއުސް" ގާނޫނު ބުނާ ގޮތުން، އެ ގައުމާއި އެ ގައުމުގެ އަސްކަރިއްޔާއާ ގުޅޭ ގޮތުން ދޮގު ޚަބަރު ފަތުރާ ނަމަ، އަދަބުގެ ގޮތުގައި ބޮޑު އަދަދަކުން ޖޫރިމަނާކޮށް، 15 އަހަރަށް ޖަލަށް ލެވޭނެ އެވެ.

ރަޝިއާ އިން ޔުކްރެއިނަށް ދެމުންދާ ހަމަލާތަކާ ގުޅިގެން އެ ގައުމާ ދެކޮޅަށް ދުނިޔޭގެ މަޝްހޫރު ކުންފުނިތަކުން ދަތިކުރުމުގެ ފިޔަވަޅު އަޅަމުންދާ ދަނޑިވަޅުގައި އެ ގައުމުން ދަނީ އެ ކުންފުނިތަކާ ދެކޮޅަށް ވެސް ފިޔަވަޅުތައް އަޅަމުންނެވެ.

ޓިކްޓޮކް ވީޑިއޯ ނުހެދޭ ގޮތް ހެދި އިރު، ރަޝިއާގެ ސަރުކާރުން ފަންޑުކުރާ ކޮންޓެންޓްތައް އެ ޕްލެޓްފޯމުން ނުފެންނަ ގޮތް ހެދުމުން މިދިޔަ ހަފުތާގައި ރަޝިއާ ސަރުކާރުން ވަނީ އެ އެޕަށް ފިޔަވަޅު އަޅާނެ ކަމުގެ އިންޒާރު ވެސް ދީފަ އެވެ.

އެހެން ސޯޝަލް މީޑިއާ އެޕްތަކުގެ ތެރެއިން، ފޭސްބުކަށް ނުދަދެވޭ ގޮތް ހަދައި، ޓުވިޓާ ބޭނުންކުރަން ވެސް ރަޝިއާ ސަރުކާރުން ވަނީ ދަތިކޮށްފަ އެވެ. އަދި އިނގިރޭސިވާލުގެ ބީބީސީ ނިއުސް އަށް ނުވަދެވޭ ގޮތް ވެސް ވަނީ ހަދައިފަ އެވެ.