އިސްލާމް ޕޭޕަރުން ދަރިވަރުން "ޖާމިނު" ނުވި ސުވާލު ސޯޝަލްމީޑިއާއަށް

މިދިޔަ އާދީއްތަ ދުވަހު ފެށި އެސްއެސްސީ އިމްތިހާނުގެ އިސްލާމް ޕޭޕަރުގައި އޮތް އެންމެ މާކުހެއްގެ ސުވާލެއް ދަރިވަރުންނަށް މާ ބޮޑުވެ އެ ވާހަކަ ސޯޝަލް މީޑިއާގައި ވައިރަލްވެއްޖެ އެވެ.

ސުވާލަކީ "ޖާމިނުވުމަކީ ކޮބާ" ތޯ އެވެ.

ގްރޭޑް 10 ނިންމައި އިމްތިހާން ހެދި ބައެއް ކުދިންނަށް މި ލަފުޒު ފެނުނީ އަލަށެވެ.

އިސްލާމްގެ ފުރަތަމަ ޕޭޕަރުގައި ޖާމިނުވުމާ ގުޅޭ ގޮތުން އޮތް ސުވާލު ދަރިވަރުންނަށް މާ ބޮޑު ވާހަކައަކަށް ވީ ދުވަހަކުވެސް އަޑު އެހި ބަހެއް ނޫން ކަމަށް ބުނެ އެވެ. އެއާއެކު ސޯޝަލްމީޑިއާގައި ވެސް މި ކުދިން މިކަން ބޮޑު މަޖާގަނޑަކަށް ހަދައިފި އެވެ.

ސޯޝަލް މީޑިއާގައި އެކަމާ ގުޅޭ މަޖާ ވީޑިއޯތައް ޝެއާ ކުރަމުން އެބަދެ އެވެ. އެ ސުވާލު ފެނިފައި ހޭނެތިފައި އެނދުމަތީގައި ކުއްޖަކު އޮންނަ ވީޑިއޯއެއް ވެސް އެބަ އުޅެ އެވެ. ގިނަ ބަޔަކަށް އެކަން މަޖާވީ، މިއީ އެ މީހުންގެ ހާލަތާ ވެސް ގުޅޭތީ އެވެ. އެއްބަޔަކަށް ދޭނެ ޖަވާބެއް ނޭނގިގެން ތިބީ ލޮލުން ކަރުނަ އަންނަ ހިސާބުގަ އެވެ.

ބައެއް ކުދިން ހީވި ގޮތަކަށް ޖަވާބު ލިއެފައި ޕޭޕަރު ހަވާލުކުރިއަސް ސިކުނޑީގައި އެ ބަސް ހަރުލީ އެވެ.

ޖާމިނުވުމަކީ ކޮބައިކަމާ މެދު އުފެދުނު ސުވާލުގައި ބައެއް ދަރިވަރުން ޖަވާބު ހޯދަން ބެލީ ރަދީފެވެ. އޭގައި އޮތީ ޖާމިނުވުމަކީ "ކަމެއް ބޮލުގައި އެޅުން ނުވަތަ ހަވާލުވުން" ކަމަށެވެ.

ނަމަވެސް މި ބަހާ މެދު ސުވާލު އުފެދުނު ގިނަ ކުދިންނަށް މިއީ އިސްލާމް ފޮތުގައި އޮތް، ދީނީ ކަންކަމާ ގުޅުން ހުރި ބަހެއް ކަމެއް ވެސް ނޭނގުނެވެ.

ޓިކްޓޮކްގައި ބައެއް ކުދިން ހަދާފައިވާ ވީޑިއޯތަކުގައި ވެސް އެއްބަޔަކު އަނެއް ބަޔަކަށް "ޖާމިނުވުން" އެ ކުއްޖަކަށް އެނގޭ ގޮތަކަށް ކިޔައިދީފައި އެބަހުއްޓެވެ.

ޖާމިނުވުމަކީ ތަބާވުން ކަމަށް އެއް ބަޔަކު ލިޔުނެވެ. އަނެއް ބަޔަކު ލިޔެފައިވަނީ އެއީ ކަމަކަށް އެއްބަސްވެ ތައުބާވުން ކަމަށެވެ. އަދި ޖާމިނުވުމަކީ ކަމެއްގައި ބައިވެރިވުން ކަމަށާއި ގަބޫލުކުރުން ކަމަށް ވެސް ބައެއް ކުދިން ޖަވާބުގައި ލިޔެފައިވެ އެވެ.

ޖާމިނުވުމަކީ ކިޔަމަންތެރިވުން ކަމަށް ވެސް ބުނެފައިވެ އެވެ.

ޖާމިނުވުމަކީ ކޮބައިކަމާ މެދު ބަހުސް ބޮޑުވެ، އެއީ ހަމަ ހަގީގަތުގައި ވެސް އިސްލާމް ފޮތުގައި ބުނެދީފައި އޮތް ބަހެއްތޯ އާއި އޮތް ނަމަ އޮތް ތަނެއް ބުނެދޭން އިސްލާމް ޓީޗަރުންނާ ވެސް ސުވާލުކޮށްފައިވެ އެވެ. ބައެއް ކުދިން ޓެސްޓު ނިންމާފައި އަލުން އިސްލާމް ފޮތް ނަގައި އެއްކޮޅުން އަނެއްކޮޅަށް ބެލި އިރު އެއީ ދޫ ރައްކާތެރިކުރުމާ ގުޅޭ ފިލާވަޅުގެ ދަށުން އައިސްފައި އޮތް ވާހަކައެއްކަން ފަހުން އެނގުނެވެ.

ޖަވާބު ރަނގަޅަށް ލިޔުނު ކުދިން، ޖާމިނުވުން އޮތް ސޮފްހާ ނަމްބަރު ވެސް ކިޔައިދީފައި އޮތެވެ. އެއް މާކްސް ލިބޭ ޖާމިނުވުމުގެ ސުވާލުގެ ޖަވާބަކީ "ހަވާލުވުން" ނުވަަތަ "ޒިންމާވުން" ކަން ބައެއް ކުދިން ލިއެފައި ހުއްޓެވެ.

އެކަމަކު ވަގުތު ފާއިތުވެއްޖެ އެވެ. ޖާމިނުވުމަކީ ކޮބައިކަން ދަރިވަރުންނަށް ސާފުކޮށް މި އެނގުނީ އިމްތިހާނު ނިމުނު ފަހުންނެވެ.

އެކަމަކު މާނަ ނޭނގުނު ކުދިންނަށް އެ ވާހަކަ އަދިވެސް ނުހުއްޓެވެ. މިވަގުތަށް ހިތްހަމަޖައްސާލަނީ، ދެން ދުވަހަކު ވެސް އަތްނުލާނެ ކަމަށް ބުނެ އެވެ.