މިއަދު ލިބޭ ނަތީޖާއަކީ ކިޔެވުން ހުއްޓާލަން ނިންމާ ދުވަސް ކަމަށް ނުހަދަން މިނިސްޓަރުގެ ނަސޭހަތެއް

މިއަދު ދޫކުރަން ފަށާ، އޯލެވެލް އިމްތިހާނުގެ ނަތީޖާ ކޮންމެ ގޮތަކަށް ލިބުނު ނަމަވެސް ކިޔެވުން ހުއްޓާ ނުލުމަށް އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު ދަރިވަރުންނަށް ނަސޭހަތްތެރިވެ ވަޑައިގެންފި އެވެ.

މި އަހަރު މެއި/ޖޫންގައި ބޭއްވި އޯލެވެލް އިމްތިހާނުގެ ނަތީޖާ ދޫކުރަން ފަށާނީ މިއަދު މެންދުރު ފަހު 1:00ގަ އެވެ.

ސޯޝަލް މީޑިއާގައި މިނިސްޓަރު ކުރެއްވި ޕޯސްޓެއްގައި ވިދާޅުވީ ހުރިހާ ދަރިވަރުންނަކީ ނަތީޖާގައި އެންމެ ރަނގަޅު ކުދިންނަށް ނުވެދާނެ ކަމަށާއި އޯލެވެލްގެ ނަތީޖާއަކީ ދަރިވަރުންގެ ކިޔެވުމުގައި ގޮތް ނިންމާ ދުވަސް ކަމަށް ކުރިން އޮތް އޮތުން މިހާރު މާޒީވެފައިވާ ކަމަށެވެ.

"މާދަމާ [މިއަދު] ލިބޭ ނަތީޖާއަކީ ކިޔެވުން ހުއްޓާލަން ނިންމާ ދުވަސްކަމުގައި ނުހަދާށެވެ... އޯލެވެލް ނަތީޖާއަކީ ތިޔަ ދަރިވަރުންގެ ކިޔެވުމުގައި ސިއްކަޖެހޭ ދުވަސް ކަމުގައިވެފައި ވަނީ މާޒީގަ އެވެ،" އޯލެވެލް ނިންމާ ކޮންމެ ކުއްޖަކަށް ވެސް އޭލެވެލްއަށް ކިޔެވުމުގެ ފުރުސަތު އޮތްކަން ފާހަގަކުރައްވަމުން މިނިސްޓަރު ރޭގެ ވަގުތެއްގައި ކުރެއްވި ޕޯސްޓުގައި ލިޔުއްވާފައިވެ އެވެ.

އޭ ލެވެލް ކިޔެވުމުގެ ފުރުސަތު ވީހާ ވެސް ގިނަ ކުދިންނަށް ދޭން ގްރޭޑް 11، 12 އަށް ވައްދާ ކްރައިޓީރިއާ ދަށްކޮށް އުސޫލު ބަދަލުކުރުމަށް ފަހު އިއުލާނުކުރީ އިއްޔެ އެވެ.

މިނިސްޓަރު ވަނީ އޯލެވެލް ނިންމާ ކުދިންނަށް އޭލެވެލް ކިޔެވުމާ އެކު ކުރިއަށްދިއުމުގެ ތަފާތު މަގުތަކެއް މިނިސްޓްރީން ފަހިކޮށްދީފައިވާކަން ފާހަގަކުރައްވައިފަ އެވެ. އެއީ އެކަޑަމިކް ޕާތުވޭ، ސްކޫލުގައި ކުރިއަށްގެންދާ ވޮކޭޝަނަލް އެޑިއުކޭޝަން ޕާތުވޭ އަދި މަސައްކަތުގެ މާހައުލުގައި (ވޯކް-ބޭސްޑް) ކިޔެވުމުގެ އެޕްރެންޓިސްޝިޕް ޕާތުވޭ އެވެ.

ކޮންމެ ކުއްޖަކީ މިހާރު ހުޅުވާލާފައިވާ ކޮންމެވެސް އެއް ލާނިން ޕާތުވޭއެއްގައި ކިޔެވުމުގެ ފުރުސަތު ލިބޭނެ ކުއްޖެއް ކަމަށް އުންމީދުކުރައްވާ ކަމަށް ވެސް މިނިސްޓަރު ވިދާޅުވި އެވެ.

އޭ ލެވެލް ކިޔަވާ ދަރިވަރުންގެ އަދަދު އިތުރު ކުރުމަށް ސަރުކާރުން ވަނީ ގިނަ ކަންތައްތަކެއް މިހާރު ވެސް ކޮށްފަ އެވެ. އޭގެތެރޭގައި މާލޭގައި ޒަމާންވަންދެން ހިންގި އޭ ލެވެލް ސްކޫލް، ސީއެޗްއެސްއީ އިމާރާތް އަލުން ހުޅުވައި ކިޔަވައި ދޭން ފެށުން ހިމެނެ އެވެ. އަދި އޯ ލެވެލް އަށް ކިޔަވައިދޭ 23 ސްކޫލެއްގައި މި އަހަރު އޭ ލެވެލް ކިޔަވައިދޭން ވެސް ވަނީ ފަށައިފަ އެވެ.