9 މަސް ފަހުން އެންޑީއޭ އަށް ސީއީއޯއެއް ހޯދަން އިއުލާންކޮށްފި

ނޭޝަނަލް ޑްރަގް އެޖެންސީ (އެންޑީއޭ) ގެ ހުސްވެފައިވާ ސީއީއޯގެ މަގާމަށް މީހަކު ހޯދަން ނުވަ މަސް ފަހުން އިއުލާންކޮށްފި އެވެ.

އާ ސީއީއޯއަކު ހޯދަން މިދިޔަ ހަފުތާގެ އަންގާރަ ދުވަހު ކުރި އިއުލާނުގައިވާ ގޮތުން، އެ މަގާމަށް މީހަކު ހޯދަނީ ތިން އަހަރުގެ މުއްދަތަކަށެވެ. މުސާރައިގެ ގޮތުގައި މަހަކު 31،500ރ. ދޭން ކަނޑައަޅާފައިވާ އެ މަގާމަށް ކުރިމަތިލާން މި މަހުގެ 31 ގެ ނިޔަލަށް ފުރުސަތު އޮންނާނެ ކަމަށް އެންޑީއޭ އިން ބުންޏެވެ.

ޒިންމާތައް ވަރަށް ބޮޑު އެންޑީއޭގެ ސީއީއޯގެ މަގާމަށް މީހަކު ހޯދުން ލަސްވީ އިދާރީ އޮނިގަނޑު މުރާޖައާ ކުރާތީ ކަމަށް އެ އެޖެންސީން ބުންޏެވެ. އާ ސީއީއޯ ހޯދަން އިއުލާންކުރީ އެކުލަވައިލި އެ އާ އޮނިގަނޑުގެ ތެރެއިންނެވެ.

އެންޑީއޭގެ ސީއީއޯގެ މަގާމުގައި އެންމެ ފަހުން ހުންނެވި މުހައްމަދު ހަބީބު ވަނީ މިދިޔަ އަހަރު މޭ 16 ގައި އެ މަގާމުން ވަކިކޮށްފަ އެވެ. އޭގެ ފަހުން އެ މަގާމަށް މީހަކު ހޯދަން އިއުލާނެއް ނުކުރެ އެވެ. ހަބީބު ވަކިކުރީ ޕްރޮބޭޝަންގެ މުއްދަތުގައި ކުރެއްވި މަސައްކަތުގެ އިވެލުއޭޝަނުން ރަނގަޅު ނަތީޖާއެއް ނެރެދެވިފައިނުވާ ކަމަށް ބުނެ އެވެ.

ސީއީއޯއެއް ހަމަޖެހެންދެން އެ އެޖެންސީގެ ހިންގުން ވަގުތީ ގޮތުން ހަވާލުކުރީ އެންޑީއޭގެ ޒިންމާދުވެރިޔާ އައިޝަތު ވަހީދާއާ އެވެ.

އެންޑީއޭގެ ކަންކަން ރަނގަޅުކުރުމަށް އެ އެޖެންސީ ވަނީ ޖެންޑާ މިނިސްޓްރީގެ ދަށުން ނަގައި، ހެލްތު މިނިސްޓްރީގެ ދަށަށް މިދިޔަ އަހަރުޭ މަހުގައި ބަދަލުކޮށްފަ އެވެ. އޭގެ ފަހުން އެ ތަނުގެ ބޯޑަށް ބޮޑެތި ބަދަލުތައް ގެނެސްފައިވެ އެވެ.

މަސްތުވާތަކެތި ބޭނުންކުރާ މީހުންނަށް ފަރުވާދީ މުޖުތަމައުއަށް ނެރުމުގެ މަސައްކަތްތައް ހަވާލުކޮށްފައިވާ އެންޑީއޭ އަށް އެންމެ ފަހުން ސީއީއޯއެއް ވެސް އައްޔަންކުރީ، ކުރިން އެ މަގާމުގައި ހުންނެވި ހަސަން ޝަހީލް އިސްތިއުފާ ދެއްވިތާ ހަތަރު މަސް ފަހުންނެވެ.

މަސްތުވާތަކެތީގެ ގާނޫނުގައިވާ ގޮތުން، އެންޑީއޭ ބޯޑުގެ މަސައްކަތަކީ އެކި ކަންކަމުގައި ލަފަ އާއި އިރުޝާދު ދިނުމެވެ. އެ ކަންކަމަށް ރިއާޔަތްކޮށް ތަން ހިންގުމުގައި އިސްކޮށް ހަރަކާތްތެރިި ވާނީ ސީއީއޯ އެވެ.