ޔޫކްރެއިންގައި ތާށިވި ދަރިވަރުން ހަންގޭރީއަށް ގެންގޮސްފި

ހަނގުރާމައިގެ ތެރޭގައި އޮތް ޔޫކްރެއިންގައި ކިޔަވަމުންދިޔަ ދިވެހި ނުވަ ދަރިވަރުން އެ ގައުމުން ބޭރުކޮށް ހަންގޭރީއަށް އެތެރެވެފައިވާ ކަމަށް ފޮރިން މިނިސްޓްރީން މިއަދު ބުނެފި އެވެ.

މިދިޔަ ހަފްތާގެ ބުރާސްފަތި ދުވަހު ރަޝިއާ އިިން ޔޫކްރެއިނަށް ހަމަލާތައް ދޭން ފެށުމާ އެކު އެ ގައުމުގެ ވައިގެ ދަތުރުތައް ހުއްޓާލި އެވެ.

އޭރު ޔޫކްރެއިންގައި 24 ދިވެއްސަކު އުޅުނެވެ. އެކަަމަކު އޭގެ ތެރެއިން އިވާނޯގައި ކިޔަވަމުން ދިޔަ 15 ދަރިވަރުން މިހާރު ރާއްޖެ ގެނެސްފައިވާއިރު ބާކީ ތިބީ ކާކީވްގައި ތިބި އަށް ދަރިވަރަކާއި ނިޕްރޯގައި ހުރި ދަރިވަރެއްގެ އިތުރުން ދިވެއްސަކާ ކައިވެނިކޮށްގެން އުޅޭ ޔޫކްރެއިން އަންހެނަކާއި އެ މީހުންގެ ދެ ދަރިންނެވެ.

ފޮރިން މިނިސްޓްރީން ބުނީ އިއްޔެ މެންދުރުގެ ވަގުތެއްގައި ޔޫކްރެއިންގައި ތިބި ދިވެހިން އެ ގައުމުގެ ހުޅަނގުގައި އޮންނަ ލިވީވްއަށް ދަތުރުކޮށްފައިވާ ކަމަށާއި އަދި ރޭ ދަންވަރުގެ ވަގުތެއްގައި ބޯޑަރު ހުރަސްކޮށް ހަންގޭރީއަށް އެތެރެވެފައިވާ ކަމަށެވެ.

މިނިސްޓްރީން ބުނީ އެ މީހުން ބޯޑަރު ހުރަސް ކުރުމުގެ ކުރިން ސަރުކާރުން ވަނީ ވިސާ އާއި އެހެން ހުރިހާ އިންތިޒާމުތަކެއް ހަމަޖައްސާފައި ކަމަށެވެ. އަދި ފޮރިން މިނިސްޓްރީގެ ޓީމްގެ ބެލުމުގެ ދަށުން ދަރިވަރުން ހަންގޭރީގެ ވެރިރަށް ބުޑަޕެސްޓަށް ދަތުރުކޮށްފައިވާ ކަމަށާއި އެ ދަރިވަރުން މާދަމާ މާލެއަށް އައުމަށް ފުރާނެ ކަމަށް ވެސް ބުންޏެވެ.

އެމީހުން ސަލާމަތްކޮށް ހަންގޭރީއަށް އެތެރެކުރިއިރު މިއީ ޔޫކްރެއިންގެ އިރުމަތީ ފަރާތުގައި އުޅެމުން ދިޔަ މީހުންނެވެ. އެ ސަރަހައްދުގައި ހަމަލާތައް ދެމުންދާތީ ކާފިއު ވެސް ހިންގަމުން އެބަދެ އެވެ. ގާތްގަނޑަކަށް 15 ވަރަކަށް ގަޑިއިރު ދަތުރެއް ނިންމައި އެ ދަރިވަރުން ހަންގޭރީއަށް އެތެރެވިއިރު މިނިސްޓަރު އަބްދުﷲ ޝާހިދު ވަނީ އެ ދަރިވަރުންނަށް ގުޅައި ހާލު ބައްލަވައިފަ އެވެ.

އަދި މި ދަތުރު އެ ދަރިވަރުން ފެށުމުގެ ކުރިން ޝާހިދު ވަނީ ހަންގޭރީގެ ފޮރިން މިނިސްޓަރާ ގުޅުއްވާ އެ ދަރިވަރުން ބޯޑަރު ހުރަސް ކުރުމުގެ ކަންކަމާ ގުޅޭ މަޝްވަރާތައް ވެސް ކުރައްވައިފަ އެވެ.

ސަރުކާރުގެ އެހީގައި އެ ދަރިވަރުން ރާއްޖެއަށް ގެންނަ ގޮތަށް ހަމަޖެހިފައިވާއިރު ޔޫކްރެއިން ކައިރީ އޮންނަ ބެލަރޫސްގެ އެކި ސިޓީތަކުގައި 137 ދިވެހިންނާއި ރަޝިއާގައި ވެސް 88 ދިވެހިން އެބަ ތިއްބެވެ. ބޭނުން ނަމަ. އެމީހުންނަށް ވެސް ސަރުކާރުގެ ހަރަދުގައި ރާއްޖެއަށް އައުމުގެ ފުރުސަތު ވަނީ ދީފަ އެވެ.