ޔުކްރެއިނުގައި ތިބި ދިވެހިންގެ ހާލު ވަރަށް ގާތުން އެބަ ބަލަން: ފޮރިން މިނިސްޓްރީ

ޔުކްރެއިންގައި ކިޔަވަން ތިބި ދިވެހި ދަރިވަރުންގެ ހާލު ވަރަށް ގާތުން ބަލަމުން އަންނަ ކަމަށް ރާއްޖޭގެ ފޮރިން މިނިސްޓްރީން މިއަދު ބުނެފި އެވެ.

އެ މިނިސްޓްރީން މިހެން ބުނީ، ޔުކްރެއިންގެ މަސްރަހު ވަރަށް ބޮޑަށް ގޯސްވަމުންދާއިރު ވެސް، އެ ގައުމުގައި ކިޔަވަން ތިބި ދިވެހި ދަރިވަރުންނަށް ރާއްޖޭގެ ފޮރިން މިނިސްޓްރީގެ އެއްވެސް އެހީތެރިކަމެއް ނުލިބޭ ކަމަށް ބުނެ ބައެއް ބެލެނިވެރިން މިއަދު އެ މިނިސްޓްރީ އަށް ގޮސް، އެތަނުގެ އިސްވެރިންނާ ބައްދަލުކޮށްފައި ވަނިކޮށެވެ.

އެ ބައްދަލުވުމަށް ފަހު، ފޮރިން މިނިސްޓްރީން ބުނީ ޔުކްރެއިންގެ ހާލަތު ވަރަށް ގާތުން ބަލައި، މޮނީޓާކުރަމުން އަންނަ ކަމަށާއި ދިވެހި ދަރިވަރުންނާ މުއާމަލާތު ކުރުމަށް ވަޓްސްއެޕް ގުރޫޕެއް ހަދައިފައިވާ ކަމަށެވެ.

"އެ ގްރޫޕާއި ސްޓޫޑެންޓް ލީޑާސް މެދުވެރިކޮށް، ބަރާބަރަށް އެ ކުދިންނާ މި އަންނަނީ މުއާމަލާތް ކުރަމުން،" މިނިސްޓްރީން ބުންޏެވެ.

ޔުކްރެއިނަށް ގިނަ ދިވެހި ދަރިވަރުން ގޮސް ތިބީ ޑޮކްޓަރުކަން ކިޔަވަން ކަމަށް ވާއިރު، އެ ގައުމުގެ ސިޓީއެއް ކަމަށްވާ ޚަރްކިވްގައި ހުރި ދިވެހި ދަރިވަރަކު "މިހާރު" އަށް މިއަދު ބުނީ މިނިސްޓްރީން އެންމެ ފަހުން ދަރިވަރުންނާ މުއާމަލާތު ކޮށްފައި ވަނީ މީގެ ދެ ދުވަސް ކުރިން ކަމަށެވެ.

ޔުކްރެއިނުގެ މަސްރަހު ހޫނުވެ، ހަނގުރާމައެއް ފެށިދާނެ ކަމުގެ ބިރުވެރިކަން އުފެދިފައި ވާތީ، އެ ގައުމަށް ދިވެހިން ދަތުރުނުކުރަން ދިވެހި ސަރުކާރުން މިއަދު ވަނީ އަންގައިފަ އެވެ. އެ ގައުމުގައި މިހާރު ދިރިއުޅޭ ދިވެހިން ޔުކްރެއިންގެ ސަރުކާރުގެ ނިންމުންތަކާއި އެންގުންތަކަށް ވަރަށް ބޮޑަށް ސަމާލުވެ، ރައްކާތެރިކަމުގެ ފިޔަވަޅުތައް އެޅުމަށް ވެސް އެންގި އެވެ.

އެ ގައުމުގައި މިހާރު ތިބި ދިވެހިން، ޔުކްރެއިނާ އެންމެ ކައިރީގައި ހުރި ރާއްޖޭގެ ޑިޕްލޮމެޓިކް މިޝަން، ޖަރުމަނުގައި ހުންނަ ދިވެހި އެމްބަސީ އާއި ފޮރިން މިނިސްޓްރީގައި ރަޖިސްޓަރީ ކުރުމަށް އެ މިނިސްޓްރީން މިއަދު ވަނީ އަންގައިފަ އެވެ.

ރަޝިއާ އިން ޔުކްރެއިން ހިފައިފާނެ ކަމުގެ ބިރު ބޮޑުވީ އެ ދެ ގައުމު ގުޅޭ ބޯޑަރު ކައިރި އަށް ރަޝިއާގެ ގިނަ އަދަދެއްގެ ސިފައިން ޖަމާ ކުރުމުންނެވެ. އެމެރިކާ އިން ބުނަމުން ދަނީ ކޮންމެ ވަގުތެއްގައި ވެސް ރަޝިއާގެ ސިފައިން ޔުކްރެއިނަށް އަރައިފާނެ ކަމުގެ ބިރު އެބައޮތް ކަމަށާ އެކަން ކޮށްފި ނަމަ، ރަޝިއާއާ ދެކޮޅަށް ވަރުގަދަ ފިޔަވަޅުތައް އަޅާނެ ކަމަށެވެ.

ޔުކްރެއިން ހިފަން އުޅޭ ކަމުގެ ތުހުމަތު ރަޝިއާ އިން ދޮގު ކުރިޔަސް، އަސްކަރީ ފައުޖުތައް ފަހަތަށް ޖައްސަން އެ ގައުމުން ދަނީ ދެކޮޅު ހަދަމުންނެވެ.