ޓްރެފިކް މައްސަލަ އިތުރަށް ގޯސްވުމުން ލޯންޗް ފެރީތައް އަލުން އެމްއެމްއޭ ކުރިމައްޗަށް

މާލެއިން ލޯންޗު ފެރީތައް ފުރާ ސަރަހައްދު ބަދަލުކުރުމުން، ޓްރެފިކް ތޮއްޖެހުމުގެ މައްސަލަ އިތުރަށް ބޮޑުވެފައި ވާތީ، ކުރިން އޮތް ގޮތަށް އެމްއެމްއޭ ކުރިމަތިން ލޯންޗު ފެރީތައް ލަފާފުރާ ގޮތަށް ހަމަޖައްސައިފި އެވެ.

މާލޭ ސިޓީ ކައުންސިލްގެ މީޑިއާ އޮފިޝަލް މަރިޔަމް ޝިއުނާ މިއަދު "މިހާރު" އަށް ވިދާޅުވީ، ލޯންޗު ފެރީތައް ފުރާ ސަރަހައްދަށް ފަހުން ގެނައި ބަދަލު އުވާލައި، ކުރިން އޮތް ގޮތަށް ބަދަލުކޮށްފައިވާ ކަމަށެވެ. އަދި އެ ބަދަލު ގެންނަން ޖެހުނީ އެމްއެމްއޭ ސަރަހައްދަށް ބާރު ބޮޑުވާތީ ކަމަށް ވިޔަސް، އެ ބަދަލާ އެކު ކުރިއަށް ވުރެ ވެސް ބާރުބޮޑުވިކަން ފާހަގަކުރެވިފައިވާ ކަމަށެވެ.

"އަލަށް ގެނައި ބަދަލުގެ ސަބަބުން ޓްރެފިކް ޖޭމްވުން ކުރިއަށް ވުރެ ވެސް އިތުރުވާކަން ފާހަގަކުރެވުމުން ކުރިން އޮތް ގޮތަށް ބަދަލު ކުރީ،" އޭނާ ވިދާޅުވި އެވެ.

އެމްއެމްއޭ ކުރިމަތިން ރަށްރަށަށް ފުރާ ލޯންޗު ފެރީތަކުގެ ސަބަބުން އެ ސަރަހައްދުގެ ޓްރެފިކް ތޮއްޖެހޭ މައްސަލަ ހައްލުކުރުމުގެ ގޮތުން ސިޓީ ކައުންސިލުން އެ އުޅަނދުތަކަށް ނަސަންދުރާ ކުރިމަތީ ޖެޓީ ހަމަޖެއްސި ނަމަވެސް އެތަން ބޭނުންނުކޮށް ބަނދަރުގެ އެކި ސަރަހައްދުތަކަށް ކައިރިކުރަން ފެށުމުން ޓްރެފިކްގެ މައްސަލަ އިތުރަށް ބޮޑުވި އެވެ.

ލޯންޗުތަކަށް ނަސަންދުރާ ކުރިމަތީ ޖެޓީ ހަމަޖެއްސި ނަމަވެސް ލޯންޗުތައް ގާތްކުރީ ބޭންކް އޮފް ސިލޯން ކުރިމަތިން ފެށިގެން މަސްވެރިންގެ ޕާކާ ދެމެދުގައި އޮންނަ ޖެޓީއަށެވެ. ނަސަންދުރަ ކުރިމައްޗަށް އެއްވެސް ލޯންޗެއް ނުދެ އެވެ.

ނަސަންދުރަ ކުރިމަތީ ޖޭޓީ ބޭނުން ނުކޮށް ލޯންޗުތައް ގާތްކުރާ ބޭންކް އޮފް ސިލޯން ކައިރިއަކީ ވަރަށް ގިނަ އޮފީސްތައް ވެސް ހުންނަ ހިސާބަކަށް ވުމުން، އޮފީސްތައް ނިމޭ ގަޑި އާއި ފެރީތައް ފުރާ ގަޑި ދިމާވުމުން އެ މަގުގައި ޓްރެފިކަށް ވަރަށް ބާރު ބޮޑުވި އެވެ.

ސިޓީ ކައުންސިލުން ކުރިން ބުނި ގޮތުގައި އެ ބަދަލު ގެންނަން ނިންމީ ވަރަށް ބޮޑަށް ދިރާސާކުރުމަށް ފަހު، ނަސަންދުރަ ކުރިމަތިން ލޯންޗު ފެރީތައް ފުރާ ގޮތަށް ހަމަޖެއްސުމުން ދަތުރުވެރިންނަށް ވެސް ވަރަށް ބޮޑު ލުޔަކަށް ވާނެ ކަމަށް ބެލެވިގެންނެވެ.

އެމްއެމްއޭ ކުރިމަތިން ލޯންޗު ފެރީތައް ފުރުން ކުރިން މަނާކުރީ އެއީ ބާރާޒުމަތި ސަރަހައްދަށް ވުމުން އެ ސަރަހައްދުގައި ކޮންމެ ދުވަހަކު ވެސް ޓްރެފިކް ބާރުބޮޑުވެ، އާންމުންނަށް އުނދަގޫތަކާ ކުރިމަތިވަމުން ދާތީ އެ މައްސަލަ ހައްލުކުރަން ކަމަށް ބުނެ އެވެ.