ލޯންޗް ފެރީތައް އެތަންމިތަނަށް، ޓްރެފިކް ތޮއްޖެހުން ވީ ގޯސް

އެމްއެމްއޭ ކުރިމަތިން ރަށްރަށަށް ފުރާ ލޯންޗު ފެރީތަކުގެ ސަބަބުން އެ ސަރަހައްދުގެ ޓްރެފިކް ތޮއްޖެހޭ މައްސަލަ ހައްލުކުރުމުގެ ގޮތުން އެ އުޅަނދުތަކަށް ނަސަންދުރާ ކުރިމަތީ ޖެޓީ ހަމަޖެއްސި ނަމަވެސް އެތަން ބޭނުން ނުކޮށް ބަނދަރުގެ އެކި ސަރަހައްދުތަކަށް ކައިރިކުރާތީ ޓްރެފިކްގެ މައްސަލަ އިތުރަށް ބޮޑުވެއްޖެ އެވެ.

ލޯންޗުތަކަށް ނަސަންދުރާ ކުރިމަތީ ޖެޓީ ހަމަޖެއްސި ނަމަވެސް ލޯންޗުތައް މިހާރު ގާތްކުރަނީ ބޭންކް އޮފް ސިލޯން ކުރިމަތިން ފެށިގެން މަސްވެރިންގެ ޕާކާ ދެމެދުގައި އޮންނަ ޖެޓީއަށެވެ. ނަސަންދުރަ ކުރިމައްޗަށް އެއްވެސް ލޯންޗެއް ނުދެ އެވެ.

ނަސަންދުރަ ކުރިމަތީ ޖޭޓީ ބޭނުން ނުކޮށް ލޯންޗުތައް މިހާރު ކައިރިކުރާ ހިސާބަކީ ވަރަށް ގިނަ އޮފީސްތައް ވެސް ހުންނަ ހިސާބަކަށް ވުމުން، އޮފީސްތައް ނިމޭ ގަޑި އާއި ފެރީތައް ފުރާ ގަޑި ދިމާވުމުން އެ މަގުގައި ޓްރެފިކަށް ވަރަށް ބާރު ބޮޑުވެ އެވެ.

"ކުރިން ވެސް ސިލޯނު ބޭންކް ކުރިމަތިން ލޯންޗުތައް ފުރާ. އެކަމަކު އާންމުކޮށް މާލެ އަތޮޅު ރަށްރަށާއި ރިސޯޓް ލޯންޗުތައް މިތަނަށް ގާތްކުރަނީ. އެކަމަކު މިހާރު އެހެން ރަށްރަށުގެ ލޯންޗުތައް ވެސް މިތަނަށް އަންނަން ފެށީމާ އިތުރަށް ބާރުބޮޑުވެފައި އޮންނަނީ،" ލޯންޗެއްގެ ކައްޕިއަކު ބުންޏެވެ.

މާލޭ ސިޓީ ކައުންސިލްގައި މާލޭގެ ފަޅާ ގުޅޭ ކަންކަމުގައި އިސްކޮށް ހުންނަވާ ހެންވޭރު މެދު ދާއިރާގެ ކައުންސިލް މެމްބަރު އާދަމް ރަމީޒް މިއަދު "މިހާރު" އަށް ވިދާޅުވީ، ނަސަންދުރަ ކުރިމަތިން ލޯންޗު ފެރީތައް ފުރާ ގޮތަށް ހަމަޖެއްސި ނަމަވެސް، އެތަނަށް އެއްވެސް ލޯންޗެއް ގާތް ނުކުރާ ކަމަށާއި އެހެންވެ އެކަން ބަލަމުން އަންނަ ކަމަށެވެ.

އޭނާ ވިދާޅުވި ގޮތުގައި މިހާރު ވާނީ އެމްއެމްއޭ ކުރިމަތިން ލޯންޗު ފެރީތައް ފުރުމުގެ ހުއްދަ އަނެއްކާ ވެސް ދީފަ އެވެ. އެކަމަކު މިހާރު އެތަނަށް ވެސް ގާތްކުރަނީ ވަރަށް މަދު ލޯންޗެއް ކަމަށް އޭނާ ވިދާޅުވި އެވެ.

"ފޮރިން މިނިސްޓްރީ ކުރިމަތިން އެ އޮންނަ ހިސާބުން ފުރަން އެއްވެސް ލޯންޗަކަށް ހުއްދައެއް ނުދެން. ނަސަންދުރަ ކުރިމައްޗާއި އެމްއެމްއޭ ކުރިމަތިން ލޯންޗު ފެރީތަކަށް ލަފާފުރޭނީ،" ރަމީޒް ވިދާޅުވި އެވެ.

އޭނާ ވިދާޅުވީ، އެ ސަރަހައްދުގެ ޓްރެފިކް ބާރުބޮޑުވާ ކަމުގެ ޝަކުވާ ކައުންސިލަށް ލިބޭތީ މިއަދު ވެސް އެ ސަރަހައްދަށް ކައުންސިލްގެ ޓީމެއް ގޮސް، ވެގެން އުޅޭ ގޮތް ބަލާފައިވާ ކަމަށެވެ. އަދިވެސް ލޯންޗުތައް ދުއްވާ ގިނަ ފަރާތްތަކަށް، ކައުންސިލުން ގެނައި ބަދަލު ސާފުނުވާ ކަމަށް އޭނާ ވިދާޅުވި އެވެ.

ސިޓީ ކައުންސިލުން ކުރިން ބުނެފައި ވަނީ މިގޮތަށް ބަދަލު ގެންނަން ނިންމީ ވަރަށް ބޮޑަށް ދިރާސާކުރުމަށް ފަހުގައި ކަމަށާއި ނަސަންދުރަ ކުރިމަތިން ލޯންޗު ފެރީތައް ފުރާ ގޮތަށް ހަމަޖެއްސުމުން ދަތުރުވެރިންނަށް ވެސް ވަރަށް ބޮޑު ލުޔަކަށް ވާނެ ކަމަށެވެ.

ނަސަންދުރަ ކުރިމަތިން މިހާރު ލަފާ ފުރަނީ އެއާޕޯޓާއި ހުޅުމާލެއަށް ދާ މަދު ފެރީތަކެވެ. މަސްވެރިންގެ ޕާކާ ދިމާލުން ކުރިން އެ ފަޅު ތެރޭގައި ފެރީ ދޯނިތައް އަޅާފައި ބޭއްވިޔަސް، ލޯންޗު ފެރީތަކަށް އެ ސަރަހައްދު ހާއްސަކުރުމުން ސިޓީ ކައުންސިލުން މިދިޔަ ހަފުތާގައި ވަނީ އެތަނުން އެ ދޯނިތައް ނަގަން ވެސް އަންގައިފަ އެވެ. އެކަމަކު އަދިވެސް އެތަނުގައި އެ ދޯނިތައް ވެސް އޮވެ އެވެ.

އެމްއެމްއޭ ކުރިމަތިން ލޯންޗު ފެރީތައް ފުރުން ކުރިން މަނާކުރީ ބާރާޒުމަތި ސަރަހައްދަށް ވުމުން އެ ސަރަހައްދުގައި ކޮންމެ ދުވަހަކު ވެސް ޓްރެފިކް ބާރުބޮޑުވެ، އާންމުންނަށް އުނދަގޫތަކާ ކުރިމަތިވަމުން ދާތީ އެ މައްސަލަ ހައްލުކުރަން ކަމަށް ބުނެ އެވެ. ނަމަވެސް ބައެއް މީހުން ބުނަނީ އެމްއެމްއޭ ކައިރިން ލޯންޗްތައް ބޭނުންކުރާ ހިސާބަކީ އެއްކޮޅަށް ދުއްވޭ ގޮތަށް އޮންނަ ހިސާބަކަށް ވުމުން ކުރިމަތިވާ އުނދަގުލަށް ވުރެ، ނަސަންދުރާ ކައިރިން މާ އުނދަގޫވާނެ ކަމަށެވެ. އެއީ އެ ސަރަހައްދަކީ ހުޅުމާލެއަށް ދާ މީހުން ވެސް ހިމެނޭ ގޮތުން ގިނަ އަދަދެއްގެ ވެހިކަލް ދެކޮޅަށް ދުއްވާ ހިސާބަކަށް ވާތީ އެވެ.