ޕޫޓިންއާ މަޝްވަރާކުރައްވަން ބައިޑަން އެއްބަސް

ރަޝިޔާ ސިފައިން ޔޫކްރޭނަށް ހަމަލާއެއް ނުދޭހާ ހިނދަކު، ސުލްހަވެރި ގޮތުގައި މައްސަލަ ހައްލުކުރެއްވުމުގެ ގޮތުން، ރަޝިޔާގެ ރައީސް ލަޑިމިއާ ޕުޓިންއާ އެކުގައި މަޝްވަރާ ބައްދަލުވުމެއް ބާއްވަން، އެމެރިކާގެ ރައީސް ޖޯ ބައިޑެން ތައްޔާރަށް ހުންނެވި ކަމަށް، އެމެރިކާ އިން ބުނެފި އެވެ.

އެމެރިކާ އާއި ރަޝިޔާގެ ރައީސުން ބައްދަލުކުރެއްވުމަށް އުސޫލެއްގެ ގޮތުން އެއްބަސްވެވަޑައިގަތީ، ފަރަންސޭސި ރައީސް އިމަނުއެލް މެކްރޯން މެދުވެރިވެވަޑައިގެން ކުރެއްވި މަސައްކަތުންނެވެ. މެކްރޯންގެ އޮފީހުން އިއްޔެ ބުނި ގޮތުގައި ދެ ބޭފުޅުން ވެސް މިހާރު ވަނީ، މަޝްވަރާ ބައްދަލުކުރެއްވުމެއް ބާއްވަން އެއްބަސްވެވަޑައިގެންފަ އެވެ.

ފަރަންސޭސި ވިލާތުގެ ރިއާސީ ގަނޑުވަރު އެލީޒޭ އިން ނެރުނު ބަޔާނެއްގައި ބުނެފައިވާ ގޮތުގައި، ޔޫރަޕްގެ ސަލާމަތާއި ސްޓްރެޓީޖިކް ހަމަޖެހުމާ ބެހޭ ގޮތުން މަޝްވަރާ ކުރެއްވުމަށް ދެ ބޭފުޅުން މިހާރު ވަނީ އެއްބަސްވެވަޑައިގެންފަ އެވެ. ނަމަވެސް، ރަޝިޔާ ސިފައިން ޔޫކްރޭންގެ ސަރަހައްދީ ރޮނގު ކައިރިއަށް ޖަމާކޮށްފައިވާ މައްސަލައިގައި ޔޫރަޕުން ކަންބޮޑުވާ ދަނޑިވަޅެއްގައި، ރަޝިޔާ އިން ޔޫކްރޭނަށް ހަމަލާއެއް ދީފި ނަމަ، އެފަދަ ބައްދަލުވުމެއް ބޭއްވުން މުސްތަހީލުވާނެ ކަމަށް އެ ބަޔާނުގައި ބުނެފައިވެ އެވެ.

އެމެރިކާގެ ރައީސް ޖޯ ބައިޑެންގެ ޕްރެސް ސެކްރެޓަރީ ޖެން ސާކީ ވިދާޅުވީ ރަޝިޔާގެ އުދުވާނީ ހަމަލާއެއް ފެށުމުގެ ވަގުތު ޖެހުމާ ހަމައަށް ވެސް، ޑިޕްލޮމެޓިކް ގޮތުން މައްސަލަ ހައްލުކުރަން އެމެރިކާ މަސައްކަތް ކުރާނެ ކަމަށެވެ.

"ރައީސް ޕުޓިންއާ އެކުގައި ބައްދަލުކުރެއްވުމަށް އުސޫލެއްގެ ގޮތުން ރައީސް ބައިޑެން ވަނީ އެއްބަސްވެވަޑައިގެންފައި. ނަމަވެސް އެއީ، އުދުވާނީ ހަމަލާއެއް ނުދޭނަމަ،" ސާކީގެ ބަޔާނުގައިވެ އެވެ.

"ސުލްހަވެރިކަން ދޫކޮށް، ރަޝިޔާ އިން ހަނގުރާމަ އިޚްތިޔާރުކޮށްފި ހާލަތެއްގައި، ވަރަށް އަވަސް އަދި އެހާމެ ވަރުގަދަ އުގޫބާތްތަކެއް ރަޝިޔާ އަށް ދިނުމަށް އަހަރެމެން މި ތިބީ ތައްޔާރުވެގެން. އަދި މިހާރު ފެންނަ ގޮތުން ރަޝިޔާ ތައްޔާރުވަމުން އެ ދަނީ، ޔޫކްރޭނާ ދެކޮޅަށް ވަރަށް އަވަހަށް އެންމެ ފުޅާމިނުގައި ވަރުގަދަ އުދުވާނީ ހަމަލާއެއް ދޭން،" ވައިޓް ހައުސް އިން ނެރުނު ބަޔާނުގައިވެ އެވެ.

އެމެރިކާ އާއި ފަރަންސޭސި ވިލާތުން ބުނާ ގޮތުގައި، ރައީސް ޕުޓިން އާއި ރައީސް ބައިޑެންގެ ބައްދަލުވުމުގެ ކަންތައް މުޅިން ހަމަޖެހިގެން ދާނީ، މި މަހުގެ 24 ވަނަ ދުވަހު، އެމެރިކާގެ ހާރިޖީ ވަޒީރު އެންޓޮނީ ބްލިންކެން އާއި ރަޝިޔާގެ ހާރިޖީ ވަޒީރު ސަރްގޭ ލަވްރޯވްއާ ދެމެދު ބާއްވާ މަޝްވަރާތަކުގަ އެވެ.