ރާއްޖެއަށް ޑިޖިޓަލް ފައިސާ ތައާރަފްކުރަން ދިރާސާކުރަނީ

ރާއްޖެއަށް ޑިޖިޓަލް ފައިސާ ތައާރަފުކުރުމަށް ބޭނުންވާ ދިރާސާތައް ކުރަމުން އަންނަ ކަމަށް އެމްއެމްއޭގެ ގަވަރުނަރު އަލީ ހާޝިމް މިއަދު ވިދާޅުވެއްޖެ އެވެ.

އުރީދޫގެ އެމްފައިސާ ހިދުމަތް ވައިބަ މެދުވެރިކޮށް ދޭން ފެށުމަށް ބޭއްވި ރަސްމިއްޔާތުގައި ގަވަރުނަރު ވިދާޅުވީ ރާއްޖޭގެ ޕޭމަންޓް ސިސްޓަމް ތައާރަފުކުރުން ކޮވިޑާ ހެދި ލަސްވިޔަސް އަންނަ ސެޕްޓެމްބަރު މަހު އެ ސިސްޓަމް ލައިވްކުރެވޭނެ ކަމަށެވެ. އަދި ޕޭމަންޓް ޕްރޮޖެކްޓުގެ ދަށުން ކުރިއަށް އޮތްތަނުގައި ބައިނަލްއަގުވާމީ ޓްރާންސެކްޝަން ހެދޭނެ ކަމަށް ވެސް އޭނާ ވިދާޅުވި އެވެ.

ކުރިއަށް އޮތްތަނުގައި ޑިޖިޓަލް ފައިނޭންސް ކުރިއަރުވަން ރާއްޖޭގައި ޑިޖިޓަލް ކަރަންސީ ތައާރަފުކުރުމަށް ބޭނުންވާ ދިރާސާތައް ކުރަމުން އަންނަ ކަމަށް ވެސް ހާޝިމް ވިދާޅުވި އެވެ.

"އަޅުގަނޑުމެން މި ދަނީ ޑިޖިޓަލް ކަރަންސީ ތައާރަފުކުރުމަށް އޭގަ ހުރި ޗެލެންޖުތަކާއި ފުރުސަތުތަކުގެ ދިރާސާތައް ކުރަމުން،" ހާޝިމް ވިދާޅުވި އެވެ.

ޑިޖިޓަލް ފައިސާ އާއި ކްރިޕްޓޯ ކަރަންސީއާ ތަފާތުތަކެއް ހުރެ އެވެ. ކްރިޕްޓޯ ކަރަންސީއަކީ ޑީސެންޓްރަލައިޒްޑް ފައިސާއަކަށްވާއިރު މި ފައިސާގެ ބެލެނިވެރި ފަރާތެއް ނޯންނާނެ އެވެ. ނަމަވެސް ޑިޖިޓަލް ފައިސާ އަކީ ބެލެނިވެރި ފަރާތެއް އޮވެ، ސެންޓްރަލައިޒްޑްކޮށް ދޫކުރާ އެއްޗެކެވެ.