އެމްޕީއެލުން ސިޓީ ކައުންސިލާ ބައްދަލެއް ނުކުރި، ޓީޖެޓީ ހަވާލެއް ވެސް ނުކުރި

އެމްޕީއެލްގެ ބެލުމުގެ ދަށުގައި އޮންނަ ޓީޖެޓީއާ އަމިއްލަ އަށް ހަވާލުވާން މާލޭ ސިޓީ ކައުންސިލުން ދިއުމުން އެ ކުންފުނީގެ ވެރިން ސިޓީ ކައުންސިލްގެ މެމްބަރުންނާ ބައްދަލުނުކޮށް، އެތަން ހަވާލުކުރަން މިއަދު ދެކޮޅު ހަދައިފި އެވެ.

މާލޭގެ ޑެޕިއުޓީ މޭޔަރު އަހްމަދު ނަރީޝް އާއި ކައުންސިލްގެ އިތުރު ބައެއް މެމްބަރުންނާއި މުވައްޒަފުން ވަނީ މިއަދު ހެނދުނު ޓީޖެޓީއާ ހަވާލުވާން އެތަނަށް ގޮސްފަ އެވެ.

އެތަނުގައި ހުންނަވައި މީޑިއާއަށް ދެއްވި އިންޓަވިއުގައި ނަރީޝް ވިދާޅުވީ، ޓީޖެޓީ ހުސްކުރަން އެމްޕީއެލް އަށް ދީފައިވާ 90 ދުވަހުގެ މުއްދަތު މިދިޔަ ހަފުތާ އަށް ހަމަވުމުން، އާންމު އިއުލާނަކާ އެކު އިތުރު ހަފުތާއެއްގެ މުއްދަތު ދިނުމުން ވެސް އެތަން ހުސްކުރަން އެ ކުންފުނިން ދެކޮޅު ހަދައިފައިވާ ކަމަށެވެ. ކައުންސިލުން އެތަނާ ހަވާލުވާން މިއަދު ދިއުމުން ވެސް އެމްޕީއެލްގެ އިސްވެރިން ބައްދަލުކުރައްވަން ވަޑައިނުގެންނެވި ކަމަށް ވިދާޅުވި އެވެ.

ނަރީޝް ވިދާޅުވީ ގޮތުގައި، މާލޭގެ ނޯތު ހާބަރާއި ޓީޖެޓީ ކައުންސިލްއާ ހަވާލުކުރަން އެދި އެމްޕީއެލްއާ އެކު ބޭއްވި ފުރަތަމަ ބައްދަލުވުމުގައި އެ ކުންފުނިން ބޮޑަށް ފޯކަސްކުރަން ބޭނުންވަނީ މާލެ މައި ބަނދަރަށް ކަމަށާއި ދެން އޮތް ދެ ބަނދަރަކީ އެހާ މުހިންމު ތަނެއް ނޫން ކަމަށް ބުނެފައިވެ އެވެ.

ބަނދަރާ ހަވާލުވާން އެމްޕީއެލުން އަމިއްލަ އަށް އެދުނު

ޓީޖެޓީ އާއި ނޯތު ހާބަރާ ކައުންސިލުން ހަވާލުވާން އެމްޕީއެލުން އަމިއްލަ އަށް ވެސް އެދުނު ކަމަށް ނަރީޝް ވިދާޅުވި އެވެ. އެކަމަކު އޭނާ ވިދާޅުވި ގޮތުގައި އެމްޕީއެލްގެ ބޯޑުން ފަހުން ނިންމީ ސިޓީ ކައުންސިލުން އެތަން ބޭނުންވާ ނަމަ، ޕްލޭނިން މިނިސްޓްރީ އާއި ޓްރާސްޕޯޓް މިނިސްޓްރީއާ ގުޅިގެން އެކަން ކުރިއަށް ގެންދިއުމަށެވެ. އެކަމަކު މި މައްސަލައިގައި އެ ދެ މިނިސްޓްރީއާ މުއާމަލާތު ކުރަން ޖެހޭނެ ކަމަކަށް ކައުންސިލުން ގަބޫލެއް ނުކުރެ އެވެ.

"އެއީ މިތަން ހިންގަން [އެމްޕީއެލް] އަށް ދީފައިވާ މުއްދަތު ހަމަވެގެން ތިން އަހަރު ހިންގައްޖެ އޯލްރެޑީ. ތިން އަހަރު ފާއިތުވީއިރު، ނޯތު ހާބަރާއި ޓީޖެޓީގެ ރަޖިސްޓްރީ މި އިންނަނީ ސިޓީ ކައުންސިލްގައި. މިއީ ސިޓީ ކައުންސިލްގެ އިހުތިސާސުގެ ތެރޭގައި ހިމެނޭ ތަނެއް،" ނަރީޝް ވިދާޅުވި އެވެ.

"މާލޭ ރައްޔިތުންގެ ދެ ބިމެއް، މާލޭ ރައްޔިތުންނަށް އެންމެ ލޯ ލާރިއެއް ވެސް ނުލިބޭ ގޮތަށް ކުންފުންޏަކުން ހިންގާ ހިންގުމަކީ އަޅުގަނޑުމެން ބަލައި ގަންނާނެ ކަމަށް ނުވި،" އޭނާ ވިދާޅުވި އެވެ.

އެމްޕީއެލުން އެ ބަނދަރު ހިންގުމަށް، ކައުންސިލުން ދެކޮޅު ނަހަދާ ކަމަށާއި ބިމު ކުއްޔަށް ވާ ފައިސާ އެ ކުންފުނިން ކައުންސިލަށް ދައްކައިގެން ވިޔަސް އެ ބަނދަރު ހިންގުމަށް އެދިފައިވާ ކަމަށާއި އެކަމަކު އެކަމާ ވެސް ދެކޮޅު ހެދި ކަމަށް ވިދާޅުވި އެވެ.

ޓީޖެޓީ އާއި ނޯތު ހާބަރު އަތުލަން އަންނަ ހަފުތާގައި ކޯޓަށް ދަނީ

ޓީޖެޓީ އާއި ނޯތު ހާބަރު ސިޓީ ކައުންސިލާ ހަވާލުކުރަން އެމްޕީއެލުން ދެކޮޅު ހަދައިފައި ވާތީ، އެތަންތަން އަތުލަން އަންނަ ހަފުތާގައި ކޯޓަށް މައްސަލަ ހުށަހަޅަން ކައުންސިލުން މިއަދު ވަނީ ނިންމައިފަ އެވެ.

ލާމަރުކަޒީ ގާނޫނު ބުނާ ގޮތުން، އެ ގާނޫނުގެ ކުރިން ކުންފުންޏެއް ނުވަތަ އެހެން މީހެއްގެ ބެލުމުގެ ދަށުގައި އޮތް ކައުންސިލްގެ އިހުތިސާސުގެ ތެރޭގައި ހިމެނޭ ބިމެއް ކައުންސިލުގެ ބެލުމުގެ ދަށަށް ގެންދެވޭނީ ކޯޓު މެދުވެރިކޮށެވެ.

"މާލޭގެ ރައްޔިތުންނަށް އަގު ނުލިބޭ ގޮތަށް، މާލޭގެ އެއްވެސް ބިމެއް، އެއްވެސް ކުންފުންޏަކަށް މަންފާވާ ގޮތަށް، ބޭނުންކުރެވޭނެ ކަމަށް ގަބޫލެއް ނުކުރަން،" ނަރީޝް ވިދާޅުވި އެވެ.

މާލޭ ޓީޖެޓީ ބަލަހައްޓަން އެމްޕީއެލް އަށް ދީފައިވާ މުއްދަތު ހަމަވެފައިވާ ކަމަށް ކައުންސިލުން ބުންޏަސް، ސަރުކާރާ އެކު އެމްޕީއެލް އިން އެކަމާ ބެހޭ ގޮތުން ސޮއިކޮށްފައިވާ އެމްއޯޔޫގައި ވަކި މުއްދަތެއް ކަނޑައަޅާފައި ނެތް ކަމަށް އެ ކުންފުނިން ވަނީ ބުނެފަ އެވެ. ރައީސް އޮފީހުން ވެސް ވަނީ މި ބަނދަރު ކައުންސިލާ ހަވާލުނުކުރަން ނިންމައިފަ އެވެ.