ހުޅުމާލޭގެ ރަޖިސްޓްރީ ބާތިލްކުރި ނިންމުމަށް އަމަލުކުރުން ފަސްކުރަން އަމުރުކޮށްފި

ހުޅުމާލޭގެ ރަޖިސްޓްރީ ބާތިލްކޮށް، މާލޭ ސިޓީ ކައުންސިލްގެ ދަށަށް ހުޅުމާލޭ ބަދަލުކުރަން ސިޓީ ކައުންސިލުން ނިންމި ނިންމުމަށް އަމަލުކުރުން ފަސްކުރަން ސިވިލް ކޯޓުން މިއަދު އަމުރުކޮށްފި އެވެ.

ހުޅުމާލެ ބެލެހެއްޓުމާއި ހުޅުމާލޭގެ ބިމުގެ މިލްކުވެރިކަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ދަށުގައި ވަނިކޮށް މާލޭ ސިޓީ ކައުންސިލުން ކުއްލި ގޮތަކަށް ހުޅުމާލޭގެ ރަޖިސްޓްރީ ބާތިލްކޮށް، އެ ކައުންސިލްގެ ދަށަށް ގެންދަން ނިންމި މައްސަލަ އެޗްޑީސީން ކުރިން ވަނީ ސިވިލް ކޯޓަށް ހުށަހަޅައިފަ އެވެ. އަދި ކޯޓުން އެ މައްސަލަ ނިމެންދެން ކައުންސިލްގެ ނިންމުމަށް އަމަލު ކުރުން ފަސްކުރުމުގެ އަމުރަކަށް ވެސް އެޗްޑީސީން އޮތީ ކޯޓުގައި އެދިފަ އެވެ.

ސިވިލް ކޯޓުން މިއަދު ނެރުނު އަމުރުގައިވަނީ ހުޅުމާލޭގެ ބިން އެޗްޑީސީއަށް މިލްކުވެފައި އޮތީ ހުޅުމާލެ ހިއްކަން ސަރުކާރުން ކުރި ޚަރަދާއި ނެގި ލޯނުތަކަށް އެ ކުންފުނިން ޒިންމާވާ ގޮތަށް ކަމަށް ވާއިރު، އެ މައްސަލާގައި ވަގުތީ އަމުރެއް ނެރެ ނުދީފި ނަމަ އިއާދަ ނުކުރެވޭނެ ގެއްލުންތަކެއް އެ ކުންފުންޏަށް ލިބިގެން ހިނގައިދާނެ ކަމަށެވެ. އެހެންވެ، އެ މައްސަލަ ނިމެންދެން މާލޭ ސިޓީ ކައުންސިލްގެ ނިންމުމަށް އަމަލުކުރުން ފަސްކުރަން އަންގާ ކަމަށް އެ އަމުރުގައިވެ އެވެ.

މީގެ އިތުރުން ހުޅުމާލޭގެ ބިމުގެ މިލްކުވެރިކަމާއި ހުޅުމާލެ ތަރައްގީ ކުރުމަށް އެޗްޑީސީއަށް ލިބިފައި އޮތް ހައްގަށް ހުރަސް އެޅޭ ފަދަ އެއްވެސް ކަމެއް އެއްވެސް ފަރާތަކުން ނުކުރުމަށާއި އަދި މާލޭ ސިޓީ ކައުންސިލްގެ ނިންމުން ތަންފީޒު ކުރުމުގެ ގޮތުން އެއްވެސް ކަމެއް ނުކުރަން އަންގާ ކަމަށް އެ އަމުރުގައިވެ އެވެ. އަދި އެފަދަ ކަމެއް ކުރާ ނަމަ އެކަން ހުއްޓުވަން ފުލުހުންނާއި ދައުލަތުގެ މައްޗަށް އަމުރުކުރާ ކަމަށް ވެސް އެ އަމުރުގައިވެ އެވެ.

ހުޅުމާލޭގެ ރަޖިސްޓްރީ ސިޓީ ކައުންސިލުން ބާތިލްކުރީ ޕީޕީއެމްގެ ޖަލްސާއެއް ހުޅުމާލޭގައި ބާއްވަން އުޅުމުން އެއީ ހުއްދަ ނެތި ބާއްވާ ޖަލްސާއެއް ކަމަށްވާތީ އެކަން އެޗްޑީސީން ހުއްޓުވުމުންނެވެ. ކައުންސިލްގެ ނިންމުމަށް އަމަލުނުކުރަން ލޯކަލް ގަވަމެންޓް އޮތޯރިޓީ(އެލްޖީއޭ) އިން ވެސް ކުރިން އޮތީ އަންގައިފަ އެވެ.