ޕާކިން ސްލޮޓުގެ ޝަކުވާ އުފުލުމާއެކު ކޮމިޓީ ބަދަލުކޮށްފި

މާލޭ ސިޓީ ކައުންސިލުން ޕާކިން ސްލޮޓްތައް ދޫކުރި ގޮތާ މެދު ކަންބޮޑުވުން ފާޅުކުރި، އެ ކައުންސިލްގެ ބައެއް މެމްބަރުން ކޮމިޓީތަކުގެ މެމްބަރުކަމުން ވަކިކޮށް، އެހެން ކޮމިޓީތަކަށް ބަދަލުކޮށްފި އެވެ.

ކައުންސިލްގެ މެމްބަރަކު މިއަދު ވިދާޅުވީ، ޕާކިން ސްލޮޓްތަކާ ގުޅޭ ޝަކުވާ އުފުލުމުން، އެމްޑީޕީގެ ފަސް މެމްބަރުންގެ ތެރެއިން ހަތަރު މެމްބަރުން ތިއްބެވި ކޮމިޓީތަކަށް ބަދަލު ގެނެސްފައިވާ ކަމަށެވެ.

އެއީ ގަލޮޅު އުތުރު ދާއިރާގެ މެމްބަރު މުހައްމަދު ސައިފް ފާތިހާއި ގަލޮޅު ހުޅަނގު ދާއިރާގެ މެމްބަރު މުހައްމަދު ނާޒިމާ މުހައްމަދު ފާއިޒާއި ގަލޮޅު މެދު ދާއިރާގެ މެމްބަރު މަރިޔަމް ރީހާން ނާޒިމް އަދި މާފަންނު އުތުރު ދާއިރާގެ މެމްބަރު މުހައްމަދު އަރީޝެވެ.

އެމްޑީޕީގެ މެމްބަރުންގެ ތެރެއިން މައްޗަންގޮޅި މެދު ދާއިރާގެ މެމްބަރު އަހުމަދު ޒަމީރު އަދި ވެސް ހުންނެވީ މުނިސިޕަލް ހިދުމަތްތަކާ ބެހޭ ކޮމިޓީގެ ޑެޕިއުޓީ ޗެއާމަންގެ މަގާމުގަ އެވެ.

ސައިފް ކުރިން ހުންނެވީ ލޭންޑް، ބިލްޑިން އަދި ވައިޓްލްސް މަސައްކަތްތައް ކުރާ ކޮމިޓީގެ ޗެއާމަނަކަށެވެ. ނާޒިމާ، ޕޮލިސީ ޗެއާމަންގެ މަގާމުން އަދި ރީހާން ވަކިކޮށްފައިވަނީ ހުޅުމާލެ ކޮމިޓީގެ ނައިބު ޗެއާމަންގެ މަގާމުންނެވެ.

މީގެ ކުރިން އެ ކޮންމެ ކައުންސިލަރަކު ވެސް ދެ ކޮމިޓީއެއްގައި ތިއްބެވި އެވެ. އެކަމަކު ސައިފާއި އަރީޝް އަދި ނާޒިމާ މިހާރު ހުންނަވާނީ އެންމެ ކޮމިޓީއެއްގަ އެވެ.

ހެންވޭރު އުތުރު ދާއިރާގެ އެމްޑީޕީގެ މެމްބަރު އައިޝަތު ނިޒްލީ ރަޝީދު އިންނެވީ ޕޮލިސީ އަދި ކޯޕަރޭޓް އެފެއާޒް ކޮމިޓީގަ އެވެ. ނަމަވެސް އޭނާ ބަދަލުކުރީ ލޭންޑު، ބިލްޑިން އަދި ވައިޓްލްސް ކޮމިޓީއަށެވެ. އެކަމަކު، ޕޮލިސީ ކޮމިޓީގައި އަދި ވެސް އޭނާ ހުންނަވާނެ އެވެ.

އެ ބަދަލުތަކާ ގުޅިގެން މާލެ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝް ވިދާޅުވީ އެ ކައުންސިލް ކޮމިޓީތަކަށް ބަދަލު ގެނައުމަށް މީގެ ދެ ތިން މަސް ކުރިން އެ ވާހަކަ ދައްކާފައިވާ ކަމަށެވެ. ބޭނުމަކީ އާ ބަޔަކަށް ފުރުސަތު ދިނުން ކަމަށް އޭނާ ވިދާޅުވި އެވެ.

"ބައެއް މެމްބަރުން އެބަތިބި މަސައްކަތްތައް މަދުވެގެން ޝަކުވާ އުފުލާފައި. އެ މެމްބަރުންނަށް އިތުރު ޒިންމާތައް ހަވާލުކުރީ،" ނަރީޝް ވިދާޅުވި އެވެ.

ސިޓީ ކައުންސިލް ހިންގަނީ މައިގަނޑު ހަ ކޮމިޓީއަކުންނެވެ. އޭގެ ތެރެއިން އެންމެ ގިނަ މަސައްކަތްތައް ކުރަނީ މުނިސިޕަލް ކޮމިޓީ އަދި ލޭންޑް އެންޑް ބިލްޑިން ކޮމިޓީންނެވެ.

ޕާކިން ސްލޮޓްތަކާ ގުޅޭގޮތުން މައިގަނޑު ޝަކުވާއަކީ އެ ތަންތަން ދޫކުރި ގޮތް އިންސާފުވެރި ނުވުމެވެ. އެގޮތުން، ޕާކިން ސްލޮޓްތައް ލިބުނު މީހުން ހޮވާފައިވަނީ ވެސް ސީރިއަލް ނަމްބަރެކެވެ. އެކަމަކު އެކަން ކުރިއަށް ގެންދިޔައީ ދެފުށް ފެންނަ ގޮތަށް ކަމަށް އެ ކައުންސިލުން ބުނެ އެވެ.