މުސާރަ ކަނޑައެޅުމުގެ ބާރު ފޮރިން މިނިސްޓްރީއަށްް ނޯންނަ ގޮތަށް ފޮރިން ސާވިސް ބިލު ބަދަލުކުރަނީ

ވަކި ހިދުމަތެއްގެ ގޮތުގައި ރާއްޖޭގެ ފޮރިން ސާވިސް އެކުލަވައިލާ އިރު، އެ ސާވިސްގެ މުވައްޒަފުންގެ މުސާރައިގެ އޮނިގަނޑު، ފޮރިން މިނިސްޓްރީން ކަނޑައަޅާ ގޮތަށްް، ފޮރިން ސާވިސް ބިލުގައި އޮތް ބައި، ބަދަލުލުކުރަން ރައްޔިތުންގެ މަޖިލީހުގެ ކަމާބެހޭ ކޮމިޓީން ފާސްކޮށްް ރިޕޯޓް އެކުލަވާލައިިފި އެވެ.

ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން ފޮރިން ސާވިސް ބިލު ދިރާސާކޮށް މަޖިލީހަށް މިއަދު ހުށަހެޅި ރިޕޯޓްގަައި ހުށަހަޅާފައި އޮތީ ފޮރިން ސާވިސްގެ މުސާރަތައް ވެސް ފިނޭންސް މިނިސްޓްރީގެ ލަފަޔާ އެކު ޕޭކޮމިޝަނުން ކަމަށް ކަނޑައެޅުމަށެވެ.

ސަރުކާރުގެ ފަރާތުން ހެންވޭރު ދެކުނު ދާއިރާގެ އެމްޑީޕީ މެމްބަރު ހުސައިން ޝަހީމް (އަނދުން ހުސައިން) މަޖިލީހަށް ހުށަހެޅުއްވި ފޮރިން ސާވިސް ބިލުގެެ 44 ވަަނަ މާއްދާގެ (ހ) ގައި އޮތީ ފޮރިން ސާވިސް މުވައްޒަފުންނާ ގުޅޭ އެންމެހާ ކަންތައްތައް ނިންމާނީ (އެ ބިލު ގާނޫނަކަށް ވުމަށް ފަހު) އެ ގާނޫނުގެ ދަށުން ހަދާ ގަވައިދެއްގެ ދަށުން ކަމަށެވެ. ކޮމިޓީން އެ މާއްދާއަށް ހުށަހަޅާފައިވާ އިސްލާހަކީ "މުވައްޒަފުންގެ މުސާރަ އާއި އިނާޔަތްތައް ކަނޑައަޅާނީ ފޮރިން މިނިސްޓްރީ އާއި ފިނޭންސް މިނިސްޓްރީގެ ލަފާގެ މަތިން ޕޭކޮމިޝަނުން" ކަމަށް ކަނޑައަޅައި އެ މާއްދާއަށް އަކުރެއް އިތުރުކުރުމަށެވެ.

ހާރިޖީ ކޮމިޓީގެ ރިޕޯޓްގައި ބުނެފައިވާ ގޮތުގައި ބިލުގައި އޮތް ގޮތަށް އެ މާއްދާ ފާސްކުރުމަކީ ދައުލަތުގެ މުސާރަ އެއްހަމަ ކުރުމުގެ މަގުސަދު ގެއްލި، ދައުލަތުން މުވައްޒަފުންނަށް ކުރާ ޚަރަދު މިހާރަށް ވުރެ ވެސް ބޮޑުވާނެ ކަމެކެވެ.

ފޮރިން ސާވިސްގައި މަސައްކަތްކުރުމަށް ފަހު ރިޓަޔާކުރާ ފަރާތްތަކަށް ދޭނެ އިނާޔަތްތައް ކަނޑައެޅުމުގެ ބާުރު ވެސް ބިލުގައި ދީފައި އޮތީ ފޮރިން މިނިސްޓަރަށެވެ. ބިލުގެ 47 ވަނަ މާއްދާގެ (ނ) ގައި އޮތް ގޮތުން ފޮރިން ސާވިސްއިން ރިޓަޔާކުރާ ފަރާތްތަަކަށް ދޭނެ މާލީ އިނާޔަތްތައް ފިނޭންސް މިނިސްޓަރުގެ ލަފާގެ މަތިން ކަނޑައަޅުއްވާނީ (ފޮރިން) މިނިސްޓަަރު ކަމަށެވެ.

ކޮމިޓީން ހުށަހަޅާފައި އޮތީ ރިޓަޔާކުރާ މުވައްޒަފުންނަށް ދޭނެ އިނާޔަތްތައް ވެސް ޕޭކޮމިޝަނުން ކަނޑައަޅާ ގޮތަށް އެ މާއްދާ އިސްލާހުކުރުމަށެވެ.

ފޮރިން ސާވިސް ބިލަށް، މިނޫނަސް ގިނަ އިސްލާހުތަކެއް، ކޮމިޓީން ހުށަހަޅާފައި އެބަހުއްޓެވެ. މަޖިލީހުގެ މިއަދުގެ ޖަލްސާ މީގެ ކުޑައިރުކޮޅެއް ކުރިން ނިންމައިލީ ބިލު ދިރާސާކޮށް، ކޮމިޓީން އެކުލަވައިލި ރިޕޯޓަށް ބަހުސް ކުރަން ހުޅުވައިލި ވަގުތު ހަމަ ނުވެ އޮއްވަ އެވެ. އެކަމަކު އޭރު އެބިލަށް ބަހުސްކުރަަން އެދިވަޑައިގަންނަވާ މެމްބަރަކު އޭރު ނެތެވެ.