ތިން މިނިސްޓަރުންނަށް ރުހުން ދިނުމުގެ މައްސަލަ ކޮމިޓީއަށް

ސަރުކާރުން ކެބިނެޓަށް ގެނައި ބަދަލުތަކާ އެކު މަގާމްތަކަށް އަލަށް އައްޔަންކުރެއްވި ތިން މިނިސްޓަރުންނަށް ރުހުން ދިނުމުގެ މައްސަލަ ކޮމިޓީއަށް ފޮނުވައިފި އެވެ.

މިއަދު ފެށި މަޖިލީހުގެ ތިން ވަނަ ދައުރުގެ ފުރަތަމަ ޖަލްސާގައި ރިޔާސަތުން ވަނީ ރައީސް ޑރ. މުހައްމަދު މުއިއްޒު ފޮނުވި ސިޓީފުޅު ވަނީ މަޖިލީހަށް ހުށަހަޅައިފަ އެވެ.

އެ ސިޓީފުޅުގައި ރައީސް ވިދާޅުވެފައި ވަނީ މިދިޔަ މަހު 30 ގައި އެމަނިކުފާނު ވަޒީރުންގެ މަޖިލީހުގެ މެންބަރުންގެ ގޮތުގައި އައްޔަންކުރެއްވި ތިން ބޭފުޅުންގެ ނަންތައް ގާނޫނުއަސާސީގައިވާ ގޮތުގެ މަތިން މަޖިލީހަށް ހުށަހަޅާ ކަމަށެވެ.

އެއީ ފޮރިން މިނިސްޓްރީ އަށް މޫސާ ޒަމީރުގެ ބަދަލުގައި ކުރިން ހެލްތު މިނިސްޓަރުގެ މަގާމުގައި ހުންނެވި ޑރ. އަބްދުﷲ ހަލީލް އައްޔަން ކުރުމާއި ހެލްތު މިނިސްޓްރީ އަށް ރައީސް އޮފީހުގެ މިނިސްޓަރުގެ މަގާމުގައި މިހާތަނަށް ހުންނެވި އަދި މީގެ ކުރިން ވެސް ހެލްތު މިނިސްޓަރު ކަން ކުރެއްވި އަބްދުﷲ ނާޒިމް އިބްރާހީމް އައްޔަން ކުރުމަށެވެ. އަދި ޒަމީރު ފިނޭންސް މިނިސްޓަރީ އަށް ވަނީ ބަދަލު ކުރައްވައިފަ އެވެ.

މަޖިލީހުގެ ރިޔާސަތު ބެލެހެއްޓެވި މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް ވަނީ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީ އަށް ފޮނުއްވައިފަ އެވެ.

މިއީ މިދިޔަ އަހަރުގެ ނޮވެމްބަރު 17 ގައި މަގާމުގެ ހުވާކުރެއްވި ފަހުން ރައީސް މުއިއްޒުގެ ކެބިނެޓަށް ބަދަލު ގެންނެވި ފުރަތަމަ ފަހަރެވެ.