އަކްޝޭއަށް ވެސް ކުޑައިރު ޖިންސީ ގޯނާއާ ކުރިމަތިލާން ޖެހުނު

އިންޑިއާ އަކީ ރޭޕާއި ޖިންސީ ގޯނާގެ މައްސަލަތައް ހައްދުން ނައްޓާފައިވާ ގައުމެކެވެ. މިފަދަ އަނިޔާތަކުގެ ޝިކާރަކަށްވި އެ ގައުމުގެ ފިލްމީ ތަރިން ވެސް މަދެއް ނޫނެވެ. ބައެއް ތަރިން އެ މީހުންގެ ވާހަކަތައް ހާމަނުކޮށް ސިއްރު ކޮށްގެން އުޅުނަސް، ފަހަކަށް އައިސް މަޝްހޫރު ވަރަށް ގިނަ ތަރިން މިފަދަ އަނިޔާތަކާއި ފުރައްސާރަތަކުގެ ވާހަކަ ވަރަށް ފާޅުގައި މީޑިއާތަކުގައި ދައްކަ އެވެ.

މަޝްހޫރު އެކްޓަރު އަކްޝޭ ކުމާރު ބުނެފައިވާ ގޮތުގައި އޭނާ އަކީ ވެސް ކުޑައިރު ޖިންސީ ގޯނާއާ ކުރިމަތިލާން ޖެހުނު މީހެކެވެ. މީޑިއާއަކަށް ދިން އިންޓަވިއުއެއްގައި 54 އަހަރުގެ އެކްޓަރު ބުނީ އޭނާ އަށް ފިރިހެނެއްގެ ފަރާތުން ޖިންސީ ގޯނާއާ ކުރިމަތިވީ އުމުރުން 6 އަހަރުގައި ކަމަށެވެ.

ކުރީގެ ބަތަލާ ޓްވިންކަލް ކަންނާއާ ކައިވެނިކޮށް ދެ ދަރިން ވެސް ތިބި އަކްޝޭ ކިޔައިދިން ގޮތުގައި އެ ހާދިސާއާ ކުރިމަތިވީ އެއް ދުވަހަކު އަވަށްޓެރިއެއްގެ ގެއަށް ދަނިކޮށެވެ. އެގޮތުން އޭނާ މަގުމަތިން ހިފަހައްޓައި ނަގައިގެން ގޮސް ޖިންސީ ގޯނާކުރީ ކަމަށް ބުންޏެވެ.

"އެ ދުވަހު އެ ވާހަކަ ގެއަށް ގޮސް ބައްޕަ ގާތު ބުނީމަ ވަގުތުން ފުލުހުންނަށް ރިޕޯޓް ވެސް ކުރި." ބޮލީވުޑްގެ މިހާރުގެ އެންމެ ކާމިޔާބު އެއް އެކްޓަރު ބުންޏެވެ.

އަކްޝޭ ބުނީ އޭނާ އަށް ގޯނާކުރި މީހާ އެ މައްސަލާގައި ހައްޔަރުކޮށް ތަހުގީގު ވެސް ކުރި ކަމަށެވެ. އަދި އެ މީހާ އަކީ ކުޑަކުދިންނާ ބެހުމުގެ ބޮޑު ރެކޯޑެއް އޮތް މީހެއް ކަމަށް ވެސް ބުންޏެވެ.

"އަހަރެން އުފާކުރަން އެ ވާހަކަ އާއިލާގެ މީހުންގެ ގާތުގައި ދެއްކުނީތީ. ހަގީގަތުގައި އަހަންނަކީ ކުޑައިރު ވަރަށް ލަދުރަކި ކުއްޖެއް. ނަމަވެސް ކުރިމަތިވި ގޯނާގެ ވާހަކަ ދައްކަން ހިތްވަރު ލިބުމަކީ ރައްކާތެރިކަން ހޯދަން ކުރެވުނު ވަރަށް މުހިއްމު ކަމެއް،" އަކްޝޭ ބުންޏެވެ. "އެކަމަކު މިހާރު ވެސް އަހަންނަކީ އެފަދަ ވާހަކަތައް ދެއްކުމުގައި ޖެހިލުން ކަމެއް ހުންނަ މީހެއް."