12 އޮކްޓޯބަރ 2021
އަފްގާނިސްތާނުގެ އާންމު ހާލަތު ރަނގަޅު ކުރަން ބައިނަލްއަގުވާމީ މުޖްތަމައުން އެދޭ ނަމަ، ދުނިޔޭގެ ގައުމުތަކުން އަފްގާނިސްތާނަށް ފިއްތުންތައް ކުރިމަތިކުރުމުގެ ބަދަލުގައި، އެހީތެރިކަން ފޯރުކޮށްދޭންވީ ކަމަށް، އެ ގައުމުން މިއަދު ބުނެފި އެވެ.
އަފްގާނިސްތާނުގެ އާންމު ހާލަތު ރަނގަޅު ކުރަން ބައިނަލްއަގުވާމީ މުޖްތަމައުން އެދޭ ނަމަ، ދުނިޔޭގެ ގައުމުތަކުން އަފްގާނިސްތާނަށް ފިއްތުންތައް ކުރިމަތިކުރުމުގެ ބަދަލުގައި، އެހީތެރިކަން ފޯރުކޮށްދޭންވީ ކަމަށް، އެ ގައުމުން މިއަދު ބުނެފި އެވެ.
ގަތަރުގެ ސެންޓާ ފޮ ކޮންފްލިކްޓް އެންޑް ހިއުމެނިޓޭރިއަން ސްޓަޑީޒްގެ ފަރާތުން އިންތިޒާމުކުރި ހަފްލާއެއްގައި ވާހަކަ ދައްކަވަމުން އަފްގާނިސްތާނުގެ ވަގުތީ ސަރުކާރުގެ ހާރިޖީ ވަޒީރު އަމީރު މުއްތަގީ ޚާން ވިދާޅުވި ގޮތުގައި އަފްގާނަށް ބޭނުންވަނީ ބައިނަލްއަގުވާމީ މުޖްތަމައުގެ އެއްބާރުލުމާއި އެހީތެރިކަމެވެ.
"ބައިނަލްއަގުވާމީ މުޖްތަމައުން އަހަރެމެންނަށް އެއްބާރުލުން ދިނުން ވަރަށް ބޮޑަށް ބޭނުން. އަފްގާނުގައި ސަލާމަތާއި ރައްކާތެރިކަން ކަށަވަރުކުރެވޭނީ އެ އެހީތެރިކަން އަހަރެމެންނަށް ލިބިގެން. އަދި ދުނިޔޭގެ އެހެން ގައުމުތަކާ އެކުގައި ރަނގަޅު މުއާމަލާތެއް ވެސް އަހަރެމެންނަށް ކުރެވޭނީ އޭރުން،" އަމީރު ޚާން މުއްތަގީ ވިދާޅުވި އެވެ.
އޭނާ ވިދާޅުވި ގޮތުގައި ގައުމު ހިންގުމުގެ ކަންކަމުގައި ތާލިބާނުން ކުރިއަށް ދަނީ ވަރަށް ބަލައިގެން ފަރުވާވެރިކަމާ އެކުގަ އެވެ. ތާލިބާނުން ވެރިކަމުގައި އަދި މި ހޭދަވީ މަދު ހަފުތާތަކެއް ކަމަށާއި، 20 އަހަރުގެ ތެރޭގައި ބައިނަލްއަގުވާމީ މުޖްތަމައުން އަފްގާނިސްތާނަށް ނުގެނެވުނު އިސްލާހުތަކެއް، މަދު ހަފުތާތަކެއްގެ ތެރޭގައި ތާލިބާނުންނަށް ގެނެވިދާނެ ކަމަށް ބަލައިގެން ނުވާނެ ކަމަށް ވެސް އޭނާ ވިދާޅުވި އެވެ.
"އެމީހުންގެ އަތުގައި ވަރަށް ބައިވަރު މާލީ ވަސީލަތްތައް ހުރި. ބައިނަލްއަގުވާމީ މުޖްތަމައުގެ ވަރަށް ބޮޑު ތާއީދެއް އޮތް. އަދި އެމީހުން 20 އަހަރު ހޭދަކޮށްފި. އެކަމަކުވެސް އަހަރެމެންގެ ހުރިހާ މުދަލެއް ހިފަހައްޓާފައި އެންމެ ދެތިން ހަފުތާގެ ތެރޭގައި ހުރިހާ ކަމެއް ފުރިހަމަކުރަންތޯ ތި އެދެނީ؟" އަމީރް ޚާން ވިދާޅުވި އެވެ.
ތާލިބާނުންގެ ވެރިކަމުގެ ފަރާތުން ފުރިހަމަކުރަންޖެހޭ ކަންކަން އަދިވެސް ނުކުރާ ކަމަށް ބުނެ ބައިނަލްއަގުވާމީ މުޖްތަމައުން އަންނަނީ، ތާލިބާނުންނަށް ފިއްތުންތައް ކުރިމަތިކޮށް ވަރަށް ބޮޑަށް ފާޑު ކިޔަމުންނެވެ. އެ ގޮތުން ފާހަގަކުރާ އެންމެ މުހިންމު ކަމަކީ، ތާލިބާނުން އެ ގައުމު ހިފުމަށް ފަހު، އަންހެން ކުދިންނަށް ކިޔަވައިދިނުން ހުއްޓާލާފައި އޮތުމާއި އަންހެނުން ވަޒީފާތަކުން ވަކި ކުރުމެވެ.
އޮކްޓޫބަރ 12، 2021؛ އަފްގާނިސްތާނުގައި ތާލިބާނުން އެކުލަވައިލި ސަރުކާރާއި ހުޅަނގުގެ ޑިޕްލޮމޭޓުންނާ ދެމެދު މަޝްވަރާ ކުރުމަށް ގަތަރުގެ ދޯހާގައި ބޭއްވި ބައްދަލުވުމުގައި، ތާލިބާނުންގެ މަންދޫބުން ކަމަށްވާ ޝިހާބުއްދީން ދިލްވާރު (ވ)، އަމީރު ޚާން މުއްތަގީ (މ) އާއި ޚައިރުﷲ (ކ) ބައިވެރިވަނީ. --އޭއެފްޕީ
ނަމަވެސް އެ ކަންކަމާ ގުޅޭ ގޮތުން، އަފްގާނުގެ ހާރިޖީ ވަޒީރު ވަކި އެއްޗެއް ވިދާޅެއް ނުވެ އެވެ.
އަމީރު ޚާން މުއްތަގީ ވިދާޅުވި ގޮތުގައި އަފްގާނިސްތާނުގެ މަރުކަޒީ ބޭންކުގެ ނުވަ ބިލިއަނަށް ވުރެ ގިނަ ޑޮލަރު ބޭރު ގައުމުތަކުގައި ހިފަހައްޓާފައި އެބަހުއްޓެވެ. އަދި އެފައިސާތައް ދޫކޮށްދިނުމަށް އޭނާ ތަކުރާރުކޮށް އެމެރިކާ އަށް ގޮވައިލެއްވި އެވެ.
އޭނާ ވިދާޅުވި ގޮތުގައި އަފްގާނިސްތާނު އޮތީ ތާލިބާނުންގެ ފުރިހަމަ ބާރުގެ ދަށުގަ އެވެ. އަދި އިސްލާމިކް ސްޓޭޓް (އައިއެސް) ޖަމާއަތުގެ ހަނގުރާމަވެރިންގެ ނުރައްކާތައް މައިތިރި ކުރުމުގެ ގާބިލުކަން ވެސް ތާލިބާނުންގައި އެބަހުރި ކަމަށް އޭނާ ވިދާޅުވި އެވެ.
އެހެން ނަމަވެސް، ބައިނަލްއަގުވާމީ މުޖްތަމައުން ތާލިބާނުންނަށް ކުރިމަތިކުރަމުންދާ ފިއްތުންތަކުގެ ސަބަބުން، ތާލިބާނުންނާ ދެކޮޅަށް ހަމަލާތައް ރާވައި ހިންގަން، އައިއެސް ޖަމާއަތުގެ ހަނގުރާމަވެރިންނަށް ހިތްވަރު ލިބޭ ކަމަށް ވެސް އޭނާ ވިދާޅުވި އެވެ.
"ފިއްތުންތައް ކުރިމަތިކުރުމުގެ ބަދަލުގައި އަހަރެމެން ބޭނުންވަނީ ބައިނަލްއަގުވާމީ މުޖްތަމައުގެ އެހީތެރިކަން."
އެހީ ދިނުމުގައި އަންހެނުން ބައިވެރިކުރަން ހުއްދަ ދެނީ
އަފްގާނު އަންހެނުން މޫނު ނިވައިކުރުން މަޖުބޫރުކޮށްފި
އަފްގާން އަންހެން ކުދިންގެ ސްކޫލްތައް އަނެއްކާ ބަންދު
ކިޔެވުން މަނާކުރުމުން އަފްގާނު ކުދިން ކައިވެންޏަށް
އަފްގާނަށް އެހީވުމުގެ މަހާސިންތާއަކަށް ގޮވާލައިފި
ތާލިބާނުންގެ އިސް ވަފުދެއް ތުރުކީ އަށް
އަންހެން މުވައްޒަފުން ގޭގައި މަޑުކޮށްލާ: ތާލިބާން
ސާނަވީގައި އަންހެން ކުދިންނަށް ކިޔަވައިނުދޭނެ
ދެ ޖިންސް މަސްހުނި ނުވާ ގޮތަށް އަންހެނުންނަށް ކިޔެވޭނެ
ތާލިބާނުންގެ ސަރުކާރު ބަލައިގަނެވޭކަށް ނެތް: އދ
