ޓިކެޓް ވިއްކުމުގައި ކޮރަޕްޝަނެއް ނޯންނާނެ: ބައްސާމް

ރާއްޖޭގައި މިހާރު ކުރިއަށް ގެންދާ އުރީދޫ ސާފް ޗެމްޕިއަންޝިޕް މުބާރާތުގެ ޓިކެޓް ވިއްކުމުގައި ކޮރަޕްޝަން ނޯންނާނެ ކަމަށް އެފްއޭއެމް ރައީސް ބައްސާމް އަދީލް ޖަލީލް މިއަދު ވިދާޅުވެއްޖެ އެވެ.

ސާފް ޗެމްޕިއަންޝިޕްގެ ގުރޫޕް ސްޓޭޖުގެ ފަހު މެޗުތަކަށް ޓިކެޓް ވިއްކުމުގެ އިންތިޒާމު ސޯޝަލް ސެންޓަރުގައި ހަމަޖެއްސުމަށް ފަހު، އެ ތަނުގައި ބޭއްވި ޕްރެސް ބްރީފިންއެއްގައި ބައްސާމް ވިދާޅުވީ ޓިކެޓް ވިއްކުގައި ކޮރަޕްޝަނަށް ޖާގައެއް ނޯންނާނެ ކަމަށެވެ.

"ކޮރަޕްޝަންގެ ކަންތައްތަކެއް ހިންގާނެ ޖާގައެއް ނޯންނާނެ ޓިކެޓް ވިއްކުމުގައި މި އަންނަ އަގުތަކަށް ބަލާއިރު،" ބައްސާމް ވިދާޅުވި އެވެ.

"އަޅުގަނޑު މި ދެންނެވިހެން 5،000 ޓިކެޓްގެ ތެރެއިން ފުދޭ ވަރެއްގެ ބައެއް އެބަދޭ ކުޅުންތެރިންގެ އާއިލާތަކަށާއި ކްލަބުތައް އަދި ސްޕޮންސަރުންނަށް. ދެން ބާކީ އޮތް އެއްޗެއް ވަރަށް ތަފުސީީލުކޮށް މި އޮންނަނީ ވިއްކޭނެ ގޮތް. އެހެންވީމާ ޓިކެޓް ވިއްކުމުގައި ކޮރަޕްޝަން ހިނގާ ކަމަކަށް އަޅުގަނޑު ގަބޫލެއް ނުކުރަން."

ޓިކެޓް ވިއްކުމުގައި ކޮރަޕްޝަން އޮތް ކަމުގެ ތުހުމަތު ބައްސާމާއި އެފްއޭއެމްގެ މައްޗަށް ކުރީ މިދިޔަ ހޮނިހިރު ދުވަހު ޓިކެޓް ވިއްކި އިރު ގަލޮޅު ދަނޑަށް ވިއްކަން ގެންދިޔަ ޓިކެޓްތަކުގެ އަދަދު ސާފުނުވުމުންނެވެ. އެ ދުވަހުގެ ހެނދުނު 10 ޖެހި އިރު ޓިކެޓް ވިއްކަން ފެށި ނަމަވެސް މާ ގިނައިރުތަކެއް ނުވެ ހުރިހާ ޓިކެޓެއް ހުސްވީ އެވެ. އެކަމަކު، ދަނޑަށް ގެންދިޔަ ޓިކެޓުގެ އަދަދެއް ފުޓުބޯޅައާ ބެހޭ އިދާރާ އިން މިހާތަނަށް ރަސްމީކޮށެއް ނުބުނެ އެވެ.

މައްސަލަ ހޫނުވުމުން އެފްއޭއެމުން ނެރެފައިވާ ބަޔާނުގައި ބުނެފައި ވަނީ ކުޅުންތެރިންގެ އާއިލާތަކަށާއި ކްލަބުތަކަށް އަދި ސްޕޮންސަރުންނަށް 2،500 ޓިކެޓް ދިނުމަށް ހަމަޖެހިފައިވާ ކަމަށެވެ. ނަމަވެސް ގިނަ ބަޔަކަށް ޓިކެޓް ނުލިބުމުން އެ 2،500 ޓިކެޓްގެ ތެރެއިން 1،000 ޓިކެޓް ސޯޝަލް ސެންޓަރުގައި މީހަކަށް ޓިކެޓެއްގެ މަގުން ވިއްކާނެ ކަމަށް އެފްއޭއެމުން ހޮނިހިރު ދުވަހު ބުންޏެވެ.

ހޮނިހިރު ދުވަހުގެ ރޭ 1،000 ޓިކެޓް ވިކި ހުސްވީ އެންމެ ހަތަރުގަޑިއިރުގެ ތެރޭގަ އެވެ. އެ ދުވަހުގެ ރޭގަނޑު އަށެއް ޖެހިރު ޓިކެޓް ވިއްކަން ފެށި ގޮތަށް ޓިކެޓް ވިއްކައި ނިމުނީ ދަންވަރު 12:30 ގަ އެވެ. އޭރު ޓިކެޓް ނުލިބި 21 މީހުން ކިއޫގައި ވެސް ތިއްބެ އެވެ.

އާންމުންނަށް ޓިކެޓްތައް ދޫކޮށްލަން ކުޅުންތެރިން އެއްބަސް

ސްޕޯޓްސް މިނިސްޓަރު އަހްމަދު މަހްލޫފާއެކު މިއަދު ބޭއްވި ބްރީފިންގައި ބައްސާމް ވިދާޅުވީ، ކްލަބުތަކަށާއި ސްޕޮންސަރުންނަށް ލިބޭ ޓިކެޓް ތަކުގެ ތެރެއިން އަދި ވަކިން ހާއްސަކޮށް ކުޅުންތެރިންގެ އާއިލާތަކަށް ދޭ ޓިކެޓް ތަކުގެތަކުގެ ތެރެއިން ބައެއް އާންމުންނަށް ދޫކޮށްލަން ކުޅުންތެރިން ނިންމުމުން އެ ކަމަށް ޝުކުރު ހައްގު ކަމަށެވެ.

ސާފް ޗެމްޕިއަންޝިޕްގައި ޓިކެޓް ވިއްކުމުގައި ހަމަހަމަކަން ގެއްލިފައިވާ ކަމަށް ބުނެ، މިދިޔަ ހޮނިހިރު ދުވަހު ގިނަ އަދަދެއްގެ ބަޔަކު ވަނީ ގަލޮޅު ދަނޑު ސަރަހައްދުގައި މުޒާހަރާ ވެސް ކޮށްފަ އެވެ. ލަންކާއާ ދެކޮޅަށް ރާއްޖެ ކުޅުނު މެޗުގެ ޓިކެޓް ނުލިބުމުން ގިނަ ބަޔަކު ވަނީ ބައްސާމްގެ އިސްތިއުފާ އަށް ގޮވި އެވެ. ބައެއް މީހުން ދަނޑުގެ އެތެރެއަށް ވެސް ވަދެގަތެވެ.

އަންނަ ބުދަ ދުވަހުގެ ރޭ އޮންނަ އިންޑިއާ އާއި ރާއްޖޭގެ މެޗުގެ ޓިކެޓް ސޯޝަލް ސެންޓަރުގައި ވިއްކުމަށް ހަ ކައުންޓަރުން ބެހެއްޓުމަށް ޔޫތު، ސްޕޯޓްސް މިނިސްޓްރީން މަސައްކަތް ކުރާ ކަމަށް ބައްސާމް މިއަދު ވިދާޅުވި އެވެ. ސޯޝަލް ސެންޓަރުގައި ދިވެހިންނަށް 3،000 ޓިކެޓް ވިއްކާނެ އެވެ. މީހަކަށް ގަނެވޭނީ މަދުވެގެން ދެ ޓިކެޓެވެ. ކޮންމެ ޓިކެޓެއް ވެސް ވިއްކާނީ އައިޑީ ކާޑާއި ކޮވިޑް ވެކްސިން ކާޑު ދެއްކުމުންނެވެ.

އެފްއޭއެމުން އެންމެ ފުރަތަމަ ޓިކެޓް ވިއްކަމުން ދިޔައީ މީހަކަށް ފަސް ޓިކެޓްގެ މަގުންނެވެ.

ރާއްޖެ-އިންޑިއާ ކުޅޭ މެޗަށް، އިންޑިއާގެ ސަޕޯޓަރުންނަށާއި އެ ދުވަހު ހަވީރު ނޭޕާލް- ބަންގްލަދޭޝްގެ މެޗަށް ޓިކެޓް ވިއްކާނީ ގަލޮޅު ދަނޑުންނެވެ. ރާއްޖޭގެ މެޗަށް އިންޑިއާގެ ސަޕޯޓަރުންނަށް ވިއްކާނީ 200 ޓިކެޓެވެ.

އިންޑިއާ - ރާއްޖެ މެޗުގެ ޓިކެޓް ވިއްކާ ގޮތް

- ދިވެހިންނަށް 3،000 ޓިކެޓް.

- ވިއްކާނީ މީހަކަށް ދެ ޓިކެޓް.

- ޓިކެޓް ވިއްކާނީ ސޯޝަލް ސެންޓަރުން.

- ޓިކެޓް ވިއްކަން ފަށާނީ އަންގާރަ ދުވަހުގެ ހެނދުނު 10 ޖަހާއިރު.

- ކޮންމެ ޓިކެޓެއް ވެސް ވިއްކާނީ އައިޑީ ކާޑާއި ވެކްސިން ކާޑު ދެއްކުމުން.

- އަވޭ ސަޕޯޓަރުންނަށް ޓިކެޓް ވިއްކާނީ ގަލޮޅު ދަނޑުން.

ދިވެހިންނަށް ހާއްސަ ކޮށްފައިވާ ޓިކެޓްގެ ތެރެއިން ކުޅުންތެރިންގެ އާއިލާތަކަށާއި ކްލަބުތަކަށާއި މުބާރާތުގެ ސްޕޮންސަރުންނަނަށް ހާއްސަކޮށްފައިވަނީ 1،800 އެއްހާ ޓިކެޓެވެ.

އިންޑިއާއާ ދެކޮޅަށް ރާއްޖެ ކުޅޭ މެޗު ފަށާނީ ބުދަ ދުވަހުގެ ރޭ 9 ޖަހާއިރު އެވެ. އެ މެޗު އެއްވަރު ކޮށްލައިގެން ވެސް ރާއްޖެ އަށް ފައިނަލަށް ދެވޭނެ އެވެ. ތިން މެޗު ކުޅެ ރާއްޖެ އަށް ހޯދިފައި ވަނީ ހަ ޕޮއިންޓެވެ. ނޭޕާލް ވެސް ވަނީ އެ އަދަދަށް ޕޮއިންޓް ހޯދައިފަ އެވެ. ނޭޕާލް އެއްވަނައިގައި އޮތީ ރާއްޖެ އަތުން މޮޅުވެވެފައި ވުމުން ހެޑް-ޓު-ހެޑް އުސޫލުން ކުރި ލިބޭތީ އެވެ.

ބުދަ ދުވަހުގެ ހަވީރު ނުކުންނާނީ ނޭޕާލް އާއި ބަންގްލަދޭޝް އެވެ. އެ މެޗު އެއްވަރު ކޮށްލައިގެން ނޭޕާލަށް ވެސް ފައިނަލަށް ދެވޭނެ އެވެ. ފައިނަލް މެޗު އޮންނާނީ އަންނަ ހޮނިހިރު ދުވަހުގެ ރޭގަ އެވެ.