އެފްއޭއެމުން ނުދީ ހުރި މުސާރަ ބައެއް މުވައްޒަފުންނަށް ދޭން ފަށައިފި

އެފްއޭއެމްގެ ބައެއް މުވައްޒަފުންނަށް މުސާރަ ނުދޭތާ، ގިނަ ދުވަސްތަކެއް ފަހުން، މުސާރަ ޖަމާ ކުރަން ފަށައިފި އެވެ.

ބައެއް މުވައްޒަފުންނަށް މުސާރަ ނުދޭތާ ނުވަވަރަކަށް މަސް ވެއްޖެ އެވެ. އެ އެސޯސިއޭޝަންގެ މައުލޫމާތު އެނގޭ ފަރާތަކުން "މިހާރު" އަށް ކަށަވަރުކޮށް ދިން ގޮތުގައި ބައެއް މުވައްޒަފުންނަށް ވަނީ ނުދީ ހުރި މަސް މަހުގެ މުސާރަތައް ގަނޑުކޮށް ޖަމާކޮށްފަ އެވެ.

"ކުދި މުސާރަތައް ލިބޭ މުވައްޒަފުންނަށް ވަނީ ޖަމާކުރަން ފަށާފަ،" އޭނާ ބުންޏެވެ.

އިންޑިއާގައި މިހާރު ސާފް ޗެމްޕިއަންޝިޕްގައި ގައުމީ ޓީމާ އެކު ދިޔަ ކޯޗިން ސްޓާފުންނަށް މުސާރަ ނުދޭތާ އަށެއްކަ މަސް ވެއްޖެ އެވެ. އެނގިފައިވާ ގޮތުގައި ގޯލްކީޕިން ކޯޗު އަސްލަމް އަބްދުރަހީމް ގައުމީ ޓީމާ އެކު ސާފް ޗެމްޕިއަންޝިޕަށް ނުދިޔައީ ނުވަ ވަރަކަށް މަސް ފާއިތުވީ އިރު ވެސް އޭނާ އަށް މުސާރަ ދީފައި ނުވުމުންނެވެ.

އެކަމަކު، ގައުމީ ޓީމަށް ނުދިޔަ ސަބަބާ ބެހޭގޮތުން މީޑިއާ އާ ވާހަކަ ދައްކާކަށް އަސްލަމް ބޭނުމެއް ނުވެ އެވެ.

މުސާރައިގެ އިތުރުން ރޯދަ އިނާޔަތާއި ޕެޝަން ފައިސާ، ޖަމާކުރުމުގައި ވެސް އެފްއޭއެމުން ފަރުވާކުޑަކުރާ މައްސަލަ ވަނީ މީގެ ކުރިން ވެސް ފެންމަތިވެފަ އެވެ.

މިދިޔަ ދެ އަހަރުގެ ރޯދަ މަހު ވެސް މުވައްޒަފުންނަށް ރޯދައިގެ އިނާޔަތް ދިނީ ގާނޫނުގައި ދޭން ކަނޑައަޅައިފައިވާ މުއްދަތު ފަހަނައަޅައި ދިޔަ ފަހުންނެވެ.