ކުރީގެ ލަވަކިޔުންތެރިޔާ ޝަހުބާން ނިޔާވެއްޖެ

ކުރީގެ ލަވަކިޔުންތެރިޔާ މުހައްމަދު ޝަހުބާން އިއްޔެ ނިޔާވެއްޖެ އެވެ.

ރީތިކޮށް ތާނައާ އަރަބި ލިޔުމުގެ ދާއިރާގައި ފާހަގަކޮށްލެވޭ ތަބައް އަލިފުޅުގެ ކާފަ ދަރިފުޅު، މއ. ތަބައްގެ، ޝަހުބާން، 53، ނިޔާވީި މަޣުރިބު ނަމާދުކުރުމަށް ވުޟޫކުރަން ފާހަނާގައި ހުއްޓާ ފިޓުޖެހިގެން ކަމަށްވެ އެވެ. އޭނާގެ ހަބަރެއް ނުވެ ލަސްވުމުން އާއިލާއިން އެކަން ފުލުހުންނަށް ރިޕޯޓުކުރި އެވެ.

ދިވެހިރާއްޖޭގެ އަޑުގައި ވެސް ގިނަ ދުވަސްތަކެއް ވަންދެން މަސައްކަތްކުރި ޝަހުބާން މީގެ ކުރިން ވަނީ ބައެއް ބޭންޑުތަކަށް ލަވަކިޔައިދީފަ އެވެ. ޝާޒްގެ ބޭންޑުގައި މަސައްކަތްކުރިއިރު ޝަހުބާން، އޭނާގެ އަމިއްލަ އަލްބަމެއް ނެރުނެވެ. އާއްމުންގެ ބޮޑު މަގުބޫލުކަމެއް ލިބުނު "ރީތި ނަލަނަަލަ ހަނދެއްކުރި އަލީގައި" އަކީ އެ އަލްބަމްގައި ހިމެނޭ ލަވައެކެވެ.

އޭނާ ދެން ގުޅުނީ ދިވެހިރާއްޖޭގެ އަޑުގެ ވޭވްސް ބޭންޑާ އެވެ. އެ ބޭންޑުގައި ވެސް ލަވަކިޔުމަށްފަހު، އެންސީއޭގެ ޓެކްނިކަލް ވަޒީފާއާ ގުޅުމަށްފަހު ޝަހުބާން ބޮޑަށް މަސައްކަތްކުރީ ޓެކްނިކަލް ކަންކަމުގަ އެވެ. އޭނާ ނިޔާވުމާ ހަމައަށް ވެސް މަސައްކަތްކުރީ އެ ސެންޓަރުގަ އެވެ.

މަޝްހޫރު ލަވަކިޔުންތެރިޔާ އަދި ޝަހުބާން އާ ވަރަށް ގިނަ ދުވަހު އެކުގައި މަސައްކަތްކުރި އިބްރާހިމް ޒައިދު އަލީ (ކުޑައިއްބެ) ބުނިގޮތުގައި ޝަހުބާނަކީ މަޖާ، އެންމެންނާ ގުޅޭ ރަހުމަތްތެރިއެކެވެ.

"އެންމެންނާ ވެސް ވަރަށް ވާހަކަދައްކާ، އާ ކަންތައްތައް އީޖާދުކޮށް އަމިއްލައަށް އެ ކަންތައްތައް ކުރާނެ. މިސާލަކަށް ގަސްހެއްދުމާ ގުޅޭ ކަންކަން،" އިއްބެ ބުންޏެވެ.

ސްޓްރޯކެއް ޖެހިގެން މީގެ ކުރިން ފަރުވާ ހޯދި ޝަހުބާން ލަވަކިޔުމާ ދުރުގައި ހުންނަތާ މިހާރު 10 ވަރަކަށް އަހަރުވެއްޖެ އެވެ.

ޝަހުބާންގެ މައްޗަށް ކުރާ ކަށުނަމާދު އޮންނާނީ މިއަދު މެންދުރު ނަމާދަށް ފަހު އާސަރަހާ މިސްކިތުގަ އެވެ.