ހިތަދޫގެ މާރާމާރީގެ ތުހުމަތު ކުރެވޭ މީހާ ހަތަރު ދުވަސް ފަހުން ހައްޔަރުކޮށްފި

މިދިޔަ ހުކުރު ދުވަހު އައްޑޫ ހިތަދޫގައި ހިންގި ދެ މާރާމާރި އަށް ހަތަރު ދުވަސްވީ ފަހުން، އެތަނުން އެއް މާރާމާރީގެ ތުހުމަތު ކުރެވޭ މީހާ ރޭ ހައްޔަރުކޮށްފި އެވެ. އެއީ އައްޑޫ ފުލެޓް ސަރަހައްދުގައި މީހަކަށް ތޫނު އެއްޗަކުން ހަމަލާދީ ޒަހަމްކޮށްލި މައްސަލައިގައި ތުހުމަތުވާ މީހެކެވެ.

ފުލުހުން މިއަދު ބުނީ، ކޯޓު އަމުރެއްގެ ދަށުން އުމުރުން 31 އަހަރުގެ ދިވެހި ފިރިހެނަކު ރޭގެ ވަގުތެއްގައި ހައްޔަރުކޮށްފައިވާ ކަމަށެވެ.

ހުކުރު ދުވަހުގެ މެންދުރު 12 ޖަހާކަންހާއިރު، ހިތަދޫގެ ފްލެޓެއްގެ ތެރޭގައި ހުއްޓައި، ހަމަލާދީ ވަރަށް ބޮޑަށް ޒަހަމްކޮށްލާފައި ވަނީ އުމުރުން 29 އަހަރުގެ ފިރިހެނެކެވެ. އައްޑޫ އިކުއަޓޯރިއަލް ހޮސްޕިޓަލުން އެ ދުވަހު ބުނެފައި ވަނީ އެ މީހާގެ ބޮލާއި ގައިގެ އެހެން ތަންތަން ވެސް ޒަހަމް ކޮށްލާފައިވާ ކަމަށެވެ. އެ މީހާ ވެއްޓިފައި އޮތް މަންޒަރު ފެންނަ ފޮޓޯތަކާއި ވީޑިއޯއެއް ވެސް ސޯޝަލް މީޑިއާގައި އާންމުވި އެވެ.

ހަމަ އެ ދުވަހުގެ ރޭ ހިތަދޫގައި ވަނީ ސައިކަލަކުން ދިޔަ ދެ މީހަކަށް ތޫނު އެއްޗަކުން ހަމަލާދީ ޒަހަމްކޮށްލައިފަ އެވެ. އެ މާރާމާރީގައި ޒަހަމްވެފައި ވަނީ އުމުރުން 27 އަހަރުގެ ފިރިހެނަކާއި 23 އަހަރުގެ އަންހެނެކެވެ. އެ މީހުންނަށް ވެސް ވަނީ އައްޑޫ އިކުއަޓޯރިއަލް ހޮސްޕިޓަލުގައި ފަރުވާ ދީފަ އެވެ.

"މިހާރު" އަށް އެނގިފައިވާ ގޮތުގައި އެ ސައިކަލުގައި އިން އަންހެން މީހާ އަކީ އައްޑޫ އިކުއަޓޯރިއަލް ހޮސްޕިޓަލުގައި މަސައްކަތް ކުރާ ނަރުހެކެވެ. އޭނާ އިނީ ސައިކަލުގެ ފަހަތުގަ އެވެ. އަދި ސައިކަލު ދުއްވަން އިނީ އޭނާގެ ފިރިމީހާ އެވެ.

ހޮސްޕިޓަލުން ބުނިގޮތުގައި، އެ ފިރިހެން މީހާގެ ކަނާތު ކޮނޑު ވަނީ ތޫނު އެއްޗަކުން ހަމަލާދީ ކަފާލައިފަ އެވެ. އަންހެން މީހާ އަށް މާ ބޮޑު އަނިޔާއެއް ނުލިބެ އެވެ.

މި ދެ މާރާމާރީ ވެސް ގުޅެނީ ހިތަދޫގެ ދެ ގޭންގެއްގެ ދެމެދުގައި ޖެހުނު މައްސަލައަކާ އެވެ. އެކަމަކު ޖެހުނީ ކޮން މައްސަލައެއް ކަމެއް އަދި ސާފެއް ނުވެ އެވެ. އެ މާރާމާރީތަކަކީ ދެ ގޭންގެއްގެ ދެމެދުގައި ހިނގި ކަމެއް ކަމަށް އައްޑޫގެ މޭޔަރު އަލީ ނިޒާރު ވެސް ވަނީ ވިދާޅުވެފަ އެވެ.