ދައުލަތުގެ މުވައްޒަފުންގެ މުސާރައިގެ ފަރަގު އަންނަ އަހަރު ނައްތައިލެވޭނެ: ޕޭ ކޮމިޝަން

ދައުލަތުގެ އިދާރާތަކުގެ މުވައްޒަފުންގެ މެދުގައި މުސާރައިގެ ފަރަގު ނައްތާލައި، އެއް ހަމައަކުން މުސާރަ އާއި އިނާޔަތްތައް ދެވޭނެ އޮނިގަނޑެއް އެކުލަވައިލުމުގެ މަސައްކަތް ކުރަމުން އަންނަ ކަމަށާއި އެ އޮނިގަނޑަށް މުއައްޒަފުން ބަދަލު ކުރުމުގެ މަސައްކަތް އަންނަ އަހަރު ފަށާނެ ކަމަށް ނޭޝަނަލް ޕޭ ކޮމިޝަނުން މިއަދު ބުނެފި އެވެ.

އެ ކޮމިޝަނުން ނެރުނު ބަޔާނެއްގައި މިހެން ބުނީ، ސިވިލް ސާވަންޓުންގެ މުސާރަ ކުޑަވުމުގެ މައްސަ އަނެއްކާ ވެސް ހޫނުވެފައި ވަނިކޮށެވެ

ޕޭ ކޮމިޝަނުން ބުނީ، ދައުލަތުގެ ހުރިހާ ފަންނުތަކެއް ހިމެނޭ ގޮތަށް އެއް ހަމައެއްގައި މުސާރަ ދޭ އޮނިގަނޑެއް އެކުލަވައިލުމުގެ މަސައްކަތް މިހާރު އޮތީ އެންމެ ފަހުގެ މަރުހަލާގައި ކަމަށާއި މި އަހަރުގެ ތެރޭގައި އެ މަސައްކަތް އެއްކޮށް ނިންމައިލެވޭނެ ކަމަށެވެ.

ޕޭ ކޮމިޝަނުން ބުނިގޮތުގައި، މުސާރަ ދޭ އާ އޮނިގަނޑުގެ ސަބަބުން ދައުލަތުގެ ހުރިހާ އިދާރާތަކުގެ މެދުގައި ހުރި މުސާރައިގެ ފަރަގު ނައްތައިލެވޭނެ އެވެ. އެހެންވެ، އެއް ހަމަ މިންގަނޑަކުން މުސާރަ އާއި އިނާޔަތްތައް ކަނޑައެޅޭނެ ކަމަށް ބުންޏެވެ. އަދި އެ އޮނިގަނޑުގައި ދައުލަތުގެ އިދާރާތަކަށް ބޭނުންވާ ހުރިހާ ފަންނުތަކުގެ ގިންތިތަކާއި ފަންތިތައް ކަަނޑައަޅައި، ކޮންމެ ފަންނަކަށް ވެސް އެކަށޭނެ މުސާރަ އާއި އިނާޔަތްތައް ކަނޑައަޅާނެ ކަމަށް ޕޭ ކޮމިޝަނުން ބުންޏެވެ.

އެގޮތުން ކަނޑައަޅާ މުސާރަ އާއި އިނާޔަތްތަކަކީ މަގާމުގެ މަސްއޫލިއްޔަތު އަދާކުރުމަށް ބޭނުންވާ އިލްމީ ގާބިލު ކަމާއި ފަންނުވެރިކަމާއި މަގާމުގެ މަސްއޫލިއްޔަތާއި ޒިންމާތަކުގެ ބުރަކަމަށް ރިއާޔަތްކޮށް ކަނޑައަޅާ މުސާރައަކަށް ވާނެ ކަމަށް ޕޭ ކޮމިޝަނުން ބުނެ އެވެ. މީގެ އިތުރުން ތަފާތު ވައްތަރުގެ ހިރާސްތަކާއި މަސައްކަތުގެ މާހައުލުގައި ކުރިމަތިލާން ޖެހޭނެ ޖިސްމާނީ ބުރަތަކަށް ވެސް ރިއާޔަތް ކުރާނެ ކަމަށް އެ ކޮމިޝަނުން ބުންޏެވެ.

"...އާ ފްރޭމްވޯކުގެ ސަބަބުން ސިވިލް ސާވިސް މުއައްޒަފުންގެ މެދުގައި މުސާރައާ މެދު ހުރި ގިނަ ކަންބޮޑޫވުންތަކަށް ހައްލެއް ލިބިގެންދާނެ،" ޕޭ ކޮމިޝަނުން ބުންޏެވެ.

އެންމެ ކުޑަ އުޖޫރައެއް ކަނޑާނާޅާ މައްސަލަ އާއި އެކި އިދާރާތަކާއި ފަންތިތަކުގެ މެދުގައި މުސާރައިގެ ބޮޑު ފަރަގެއް އޮންނަ މައްސަލާގައި ސިވިލް ސާވަންޓުންތަކެއް އިއްޔެ ވަނީ ކަޅު ހެދުމުގައި ހިމޭން އިހުތިޖާޖު ކޮށްފަ އެވެ. އަދި ސަރުކާރުން ޖަވާބުދާރީ ނުވެއްޖެ ނަމަ މަސައްކަތަށް ނުނިކުންނާނެ ކަމުގެ އިންޒާރެއް ވެސް ވަނީ ދީފަ އެވެ.

އެންމެ ކުޑަ އުޖޫރަ ކަނޑައެޅުމާ ބެހޭ ގޮތުން ޕޭ ކޮމިޝަނުން މި އަހަރުގެ ތެރޭގައި އެކަން އިއުލާން ކުރާނެ ކަމަށެވެ. އަދި އެންމެ ދަށް ފަންތީގެ މުއައްޒަފުންނަށް ލިބޭ އިނާޔަތްތަކަށް ހެޔޮ ބަދަލެއް އަންނާނެ ކަމަށް އެ ކޮމިޝަނުން ބުންޏެވެ.