ތުޅާދޫ އެއާޕޯޓްގެ މަސައްކަތް އޮތީ ބިޑް އިވެލުއޭޝަން މަރުހަލާގައި

ބ. ތުޅާދޫގައި އެއާޕޯޓެއް އެޅުމުގެ މަސައްކަތް މިހާރު އޮތީ ބިޑް އިވެލުއޭޭޝަން މަރުހަލާގައި ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.

ރައީސް އޮފީހުން ބުނީ ތުޅާދޫ އެއާޕޯޓް އެޅުމުގެ މަޝްރޫ އާއި ސަރުކާރުން ހިންގަން ނިންމާފަިއވާ އެހެން މަޝްރޫއުތަކުގެ މައުލޫމާތު ރައީސް މިއަދު ވަނީ ތުޅާދޫ ކައުންސިލަށް ދެއްވާފައިވާ ކަމަށެވެެ. ރައީސް އެމައުލޫމާތު ދެއްވީ ތުޅާދޫ ކައުންސިލްގެ މެމްބަރުންނާ އެކު މިއަދު ހަވީރު ރައީސް އޮފީހުގައި ބޭއްވި ބައްދަލުވުމެއްގަ އެވެ.

ރައީސްއާ އެކު ބޭއްވި ބައްދަލުވުމުގައި ތުޅާދޫ ކައުންސިލުން ވަނީ ރަށާ ގުޅުން ހުރި ކަންބޮޑުވުންތައް ވެސް ހިއްސާކުރައްވައިފަ އެވެ. އެގޮތުން، ތުޅާދޫގައި އިމާރާތްކޮށްފައިވާ 50 ހައުސިން ޔުނިޓް ދޫނުކޮށް ހުުރުމާއި ހަމަ އެ މަޝްރޫއުގެ ދަށުން އަޅަން ޖެހޭ އިތުރު 50 ހައުސިން ޔުނިޓްގެ މަސައްކަތް ލަސްވާ މައްސަލަ އޭގެ ތެރޭގައި ހިމެނެ އެވެ. ހައުންސން ޔުނިޓްގެ މައްސަލައިގައި ކަމާގުޅޭ މިނިސްޓްރީން އެ ޔުނިޓްތައް އިވެލުއޭޓްކުރުމަށް ފަހު ރަނގަޅު ހައްލެއް ހޯއްދެވުމަށް މަސައްކަތް ކުރައްވާނެ ކަމަށް ރައީސް ދެންނެވި ކަމަށް ރައީސް އޮފީހުން ބުންޏެވެ.

ކައުންސިލުން ކަންބޮޑުވުން ފާޅުކުރި އެހެން މައްސަލަތަަކަށް ހައްލު ހޯއްދަވައިދެއްވަން މަސައްކަތް ކުރައްވާނެ ކަމަށް ވެސް ރައީސް ވިދާޅުވި އެވެ.

ތުޅާދޫގައި އެއާޕޯޓް އަޅަން ނިންމާފައިވާކަން ސަރުކާރުން އިއުލާނުކުރީ މިދިޔަ އަހަރުގެ ނޮވެމްބަރުމަހު އެވެ. ސަރުކާރުން ކުރިން ބުނެފައިވާ ގޮތުގައި ސަރުކާރުގެ އަމާޒަކީ ރާއްްޖޭގެ ކޮންމެ ރަށަކުން ވެސް 30 މިނެޓްގެ ތެރޭގައި ދަތުރުކުރެވޭ ހިސާބުގައި އެއާޕޯޓެއް އޮތުމެވެ.