އެއާޕޯޓް ހަދާ ސަރަހައްދު މަގޫދޫގެ އިހުތިސާސުން ވަކިކޮށްފި

ފ. މަގޫދޫގައި އެއާޕޯޓް ހަދާ ސަރަހައްދު އެ ރަށުގެ އިހުތިސާސުން، ރައީސް އިބްރާހިމް މުހައްމަދު ސޯލިހު އިއްޔެ ވަކިކުރައްވައިފި އެވެ.

ރައީސުލްޖުމްހޫރިއްޔާ އަށް ގާނޫނު އަސާސީން މަތިކޮށްފައިވާ ސިޓީ ކައުންސިލްތަކާއި ރަށު ކައުންސިލްތަކުގެ އިހުތިސާސް ކަނޑައެޅުމުގެ މަސްއޫލިއްޔަތުގެ ދަށުން މަގޫދޫގެ އިދާރީ އިހުތިސާސުން، އެ ރަށުގައި އެއާޕޯޓް ހަދާ ސަރަހައްދު ވަކި ކުރި ކަމަށް ރައީސް ކަނޑައެޅުއްވި ގަރާރު ރައީސް އޮފީހުން އިއްޔެ ވަނީ ގެޒެޓްކޮށްފަ އެވެ.

ރާއްޖޭގައި ހުރިހާ އެއާޕޯޓެއް ވެސް ހިންގަމުން އަންނަނީ ކުންފުނިތަކާ ހަވާލުކޮށްގެން، އެ އެއާޕޯޓު އޮންނަ ރަށުގެ އިހުތިސާސުން ވަކިކޮށްގެންނެވެ.

އެމްޓީސީސީއާ ހަވާލުކޮށްގެން މި ސަރުކާރުން ހަދަން ފެށި މަގޫދޫ އެއާޕޯޓްގެ މަސައްކަތަށް އެ ރަށުން 30.8 ހެކްޓަރުގެ ސަރަހައްދެއް ވަނީ ހިއްކައިފަ އެވެ. އަދި އެހެނިހެން ބޭނުންތަކަށް 17 ހެކްޓަރުގެ ސަރަހައްދެއް ހިއްކި އެވެ.

ބިން ހިއްކުމަށް ދައުލަތުގެ ބަޖެޓުން 207 މިލިއަން ރުފިޔާ ހަރަދުކުރި އިރު، އެއާޕޯޓް ހަދަން 252 މިލިއަން ރުފިޔާ ހަރަދުވެ އެވެ.

މަގޫދޫ އެއާޕޯޓް ހަދަނީ 1،800 މީޓަރުގެ ދިގު ރަންވޭއަކާ އެކު، ޕްރައިވެޓް ޖެޓްތައް ވެސް ޖެއްސޭ ގޮތަށެވެ. އެ އެއާޕޯޓުގައި ޖެޓުތައް ޕާކު ކުރެވޭނެ ސަރަހައްދަކާއި ފިއުލް ފާމަކާއި ވީއައިޕީ ލައުންޖެއް އަދި ސިޓީ ހޮޓަލެއް ވެސް ހަދަން ނިންމާފައިވެ އެވެ.