ބާރުތައް އަތުލުން ރައްޔިތުން ގަބޫލެއް ނުކުރާނެ، ދެކޮޅަށް ތެދުވާނެ: އިބޫ

ގާނޫނުން ރައްޔިތުންނަށް ލިބިދީފައި އޮތް ބާރުތައް ސަރުކާރުން އަތުލަން އުޅެފި ނަމަ ރައްޔިތުން އެކަން ގަބޫލުނުކޮށް، އެކަމާ ދެކޮޅަށް ތެދުވާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) މިއަދު ވިދާޅުވެއްޖެ އެވެ.

އެމްޑީޕީގެ "ލާމަރުކަޒީ ގުޅުން" ކޮންފަރެންސް ހދ. ކުޅުދުއްފުށީގައި ފެށުމަށް މިއަދު ހެނދުނު ބޭއްވި ރަސްމިއްޔާތުގައި އިބޫ ވިދާޅުވީ ލާމަރުކަޒީ ނިޒާމު އެއްކޮށް ފުނޑާލުމުގެ މަސައްކަތް މި ސަރުކާރުން ފަށާފައިވާ ކަމަށެވެ.

"އެޓޯލްސް މިނިސްޓްރީއެއް" އުފައްދައި، ކައުންސިލްތަކުގެ ހުރިހާ ބާރުތައް ސަރުކާރަށް ޖަމާކުރަމުން ގެންދާ ކަމަށް ވެސް މި ސަރުކާރުގައި އުފައްދާފައިވާ ސިޓީސް އެންޑް ލޯކަލް ގަވަމަންޓް މިނިސްޓްރީއަށް އިޝާރާތް ކުރައްވައި އިބޫ ވިދާޅުވި އެވެ.

ހުރިހާ ބާރެއް ސަރުކާރަށް އޮތުމަކީ އެމްޑީޕީން އެއްއިރަކު ވެސް ގަބޫލުކުރި ކަމަކަށް ނުވިޔަސް، ޕީޕީއެމް/ޕީއެންސީން ވެރިކަމަށް އަންނަ ކޮންމެ ފަހަރަކު މި ނިޒާމު ފުނޑާލައި ރައްޔިތުން ބާރު ކަނޑުވާލަން މަސައްކަތްކުރާ ކަމަށް އިބޫ ތުހުމަތުކުރެއްވި އެވެ.

"ވެރިކަމުގައި ތިބީ ރައްޔިތުން ދައްކާ ވާހަކަ ގަބޫލުކުރާ ބައެއް ނޫން،" އިބޫ ވިދާޅުވި އެވެ.

"ހުދުމުހުތާރު ވެރިކަމަކީ މިހާރު މި އޮތް ސަރުކާރު މިސްރާބު ޖަހާފައި އޮތް ދިމާ."

އިބޫ ވިދާޅުވި ގޮތުގައި، ޑިމޮކްރަސީއަކީ ހަމައެކަނި ރައްޔިތުންގެ ވޯޓެއް ނަގައިގެން ސަރުކާރު ބަދަލުކުރުމެއް ނޫނެވެ. ޑިމޮކްރަސީއަކީ އެއަށް ވުރެ މާ ފުޅާ ދާއިރާއެއްގައި މާ ގިނަ ކަންތައްތަކެއް އެކުލެވޭ ކަމެއް ކަމަށާއި ޑިމޮކްރަސީއެއް ހިންގުމަކީ ފަސޭހަ ވެސް ކަމެއް ނޫން ކަން އެ މަނިކުފާނު ފާހަގަކުރެއްވި އެވެ. އެގޮތުން، އިބޫ ވިދާޅުވި ގޮތުގައި، ޑިމޮކްރަސީއެއްގައި ރައްޔިތުންނާ މަޝްވަރާކުރެވި، ރައްޔިތުންގެ އަޑުއަހައި، ކައިރިން ހިދުމަތް ދެވެން ޖެހެ އެވެ.

ހުރިހާ ބާރެއް ރައީސް އޮފީހަށް ނެގުމަކީ ވަރަށް ފަސޭހަ ކަމަކަށް ވިޔަސް، ރައްޔިތުން މިހާރު އެގޮތް ގަބޫލުނުކުރާނެ ކަމަށް އިބޫ ވިދާޅުވި އެވެ.

"އެކަމަކު، މިއަދަކީ ރައްޔިތުން އެކަން [ބާރުތައް އަތުލުން] ގަބޫލުކުރާނެ ދުވަހެއް ނޫން. އެއާ އިދިކޮޅަށް ތެދުވަން ޖެހިއްޖެއްޔާ ތެދުވެ، ކުރަން ޖެހޭ ކޮންމެ ކަމެއް އަޅުގަނޑު ހިތުން ދިވެހި ރައްޔިތުން ކުރާނެ،" އިބޫ ވިދާޅުވި އެވެ.

އެމްޑީޕީގެ "ލާމަރުކަޒީ ގުޅުން" ކޮންފަރެންސްގެ މައިގަނޑު މަގުސަދަކީ ވެސް ލާމަރުކަޒީ ނިޒާމުގެ ބާރު ކަނޑުވާލުމަށް ސަރުކާރުން ކުރަމުން ގެންދާ ކަންކަމުގެ މައުލޫމާތު ކައުންސިލްތަކާ ހިއްސާކުރުން ކަމަށް އެ ޕާޓީން ވަނީ ބުނެފަ އެވެ. މިއަދުން ފެށިގެން އަންނަ އަންގާރަ ދުވަހުގެ ނިޔަލަށް މި ކޮންފަރެންސްގެ ހަރަކާތްތައް ކުރިއަށް ގެންދާއިރު، އެމްޑީޕީގެ ޓީމުތަކުން ށ، ހއ. އަދި ހދ. އަތޮޅުގެ ރަށްތަކަށް ދާނެ އެވެ. އެ ދަތުރުތަކުގައި ޕާޓީގެ ހިންގުން ހަރުދަނާ ކުރުމާ ގުޅޭ ގޮތުން މެމްބަރުންގެ ހިޔާލު ހޯދުން ވެސް އޮންނާނެ އެވެ.

ވެރިކަމަށް އައީ ދޮގާއި މަކަރުންކަން ހާމަވެއްޖެ: އިބޫ

އިބޫގެ ވާހަކަފުޅުގައި ވަނީ މިހާރުގެ ސަރުކާރަށް ވަރަށް ފާޑުވިދާޅުވެފަ އެވެ.

އިބޫ ވިދާޅުވި ގޮތުގައި، ރައީސް ޑރ. މުހައްމަދު މުއިއްޒުގެ ސަރުކާރު ވެރިކަމަށް އައީ، އެމްޑީޕީން ކުރިން ވެސް ބުނަމުން އައި ގޮތަށް ދޮގާއި އޮޅުވާލުމާއި ފިތުނަ އާއި ފަސާދަތަކެއްގެ ތެރެއިންނެވެ.

"ދޮގު ދޮލަނގު ބޮލަށް ލައިގެން ދާ ވާހަކަ، މި އިންނެވި އަބްދުﷲ ޝާހިދު ތަކުރާރުކޮށް ވިދާޅުވަމުން ގެންދެވި. މިއަދު އެކަން އެ ދަނީ ހާމަވަމުން. ވެރިކަމަށް އައީ، ދޮގުވެރި، މަކަރުވެ، ހީލަތްތެރި ރޭވުންތަކުގެ ތެރެއިން. މިއަދު އެދަނީ އެކަން ސާފުވަމުން،" އިބޫ ވިދާޅުވި އެވެ.

އެމްޑީޕީގެ ސަރުކާރުގައި އިންޑިއާއާ އެކު އަޑި ނޭނގޭ ސިއްރު ގުޅުންތަކެއް އޮތް ކަމަށާއި ރާއްޖޭގެ ސިޔާދަތީ މިނިވަންކަން ގެއްލޭ ކަހަލަ އެއްބަސްވުންތަކެއް ހެދި ކަމަށް ވެސް މިހާރު ވެރިކަމުގައި ތިއްބެވި ބޭފުޅުން ތުހުމަތުކުރެއްވިޔަސް، މިހާރު އެއީ ބޮޑު ދޮގެއްކަން ހާމަވެއްޖެ ކަމަށް އިބޫ ވިދާޅުވި އެވެ.

"އަވަށްޓެރި ގައުމުތަކާ ދޭތެރޭގައި، އެ ތަންތަނުގެ ވެރިންނާ ދޭތެރޭގައި ނުދައްކަނީ ކޮން ވާހަކައެއް. ހަޑިހުތުރުވެގެން ނުބުނަން ނުގޮވަނީ ކޯއްޗެއްތޯ. އޭގެ ސަބަބުން މުޅި ގައުމަށާއި އަޅުގަނޑުމެން ރައްޔިތުންނަށް ވީ ގެއްލުންތައް ގުނާ އަދަދު ނުކުރެވޭ. ހަމައެކަނި ޓޫރިޒަމް ސެކްޓާއަށް ތިޔަ ބޭފުޅުން ބައްލަވާ،" އެ މަނިކުފާނު ވިދާޅުވި އެވެ.

އިބޫ ވިދާޅުވީ ރައީސް ޑރ. މުހައްމަދު މުއިއްޒު އެންމެފަހުން އިންޑިއާއަށް ކުރެއްވި ދަތުރުފުޅުގައި ވެސް އެމްޑީޕީގެ ސަރުކާރުން އޭރު އިންޑިއާއާ އެކު ހެދި އެއްބަސްވުންތައް އަލުން އާކޮށް، އޭގެ އެއްވެސް އަކުރެއް ފިއްޔަކަށް ވެސް ބަދަލެއް ނުގެނެސް ކުރިއަށް ގެންދަން ނިންމަވާފައިވާ ކަމަށެވެ. މި ސަރުކާރުން ރައްޔިތުންނަށް ކަންކަން އޮޅުވާލާ ވަރު ހަމައެކަނި އެކަމުން ވެސް އެނގިއްޖެ ކަމަށް އިބޫ ވިދާޅުވި އެވެ.