ސަރުކާރުން އުޅެނީ ކައުންސިލަތަކަށް އޮންނަ އިތުބާރު ގެއްލުވާލަން: ފައްޔާޒު

ސަރުކާރުން ކުރަން އުޅޭ ކަމަކީ ކައުންސިލްތަކަށް ރައްޔިތުން ކުރާ އިތުބާރު ގެއްލުވާލުން ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް މިއަދު ވިދާޅުވެއްޖެ އެވެ.

ހދ. ކުޅުދުއްފުށީގައި މިހާރު ކުރިއަށް ގެންދާ އެމްޑީޕީގެ "ލާމަރުކަޒީ ގުޅުން" ކޮންފަރެންސްގެ ތެރެއިން ބޭއްވި ޕެނަލް ޑިސްކަޝަނެއްގައި ބައެއް ރަށްރަށުގެ ކައުންސިލަރުން ކުރެއްވި ސުވާލުތަކަށް ފައްޔާޒް ވަނީ ޖަވާބު ދެއްވައިފަ އެވެ.

ފައްޔާޒް ވިދާޅުވީ ސަރުކާރުން ކައުންސިލަރުންގެ އަދަދު މަދުކޮށް، ގާނޫނުތަކަށް ބަދަލު ގެންނަނީ ކައުންސިލްތަކުން ރައްޔިތުން ލިބިދީފައި އޮންނަ ބާރު ކަނޑުވާލުވުމުގެ މަގުސަދުގައި ކަމަށެވެ.

"ރައްޔިތުންގެ ކުރިމަތީގައި ކައުންސިލަރުންނަކީ ބޭކާރު ބައެކޭ، ބޭކާރު ބޮޑު ހަރަދެކޭ، ކޮރަޕްޝަނެއް މީގައި އޮންނަނީ، އެއްވެސް ކަމެއް ވަނީކީ ނޫނޭ، އަމިއްލައަށް ދަތުރުފަތުރު ގޮސްގެން އެންޓަޓެއިންމަންޓުގައޭ މި އުޅެނީ ކިޔަނީ،" ފައްޔާޒް ވިދާޅުވި އެވެ.

އެއީ ދޮގެއްކަން އަންގައިދިނުމަށް ކައުންސިލަރުން ކުރާ މަސައްކަތް ރައްޔިތުންނަށް ދައްކައިދޭން ޖެހޭ ކަމަށާއި އެ ހަގީގަތް ރައްޔިތުންނަށް ހާމަކޮށްދިނުމަށް އެމްޑީޕީން ބައެއް ކަންކަން ރާވަމުން އަންނަ ކަމަށް ވެސް އޭނާ ވިދާޅުވި އެވެ.

ކައުންސިލްތަކުގެ ބާރު ގެއްލޭ ގޮތަށް ބިނާވެށި ޕްލޭން ކުރުމާއި ހިންގުމުގެ ގާނޫނާއި އިދާރީ ދާއިރާތައް ލާމަރުކަޒީ އުސޫލު ހިންގުމުގެ ގާނޫނަށް ރައްޔިތުންގެ މަޖިލީހުން ގެނައި އިސްލާހު މަޖިލީހުން ފާސްވިޔަނުދީ ނުހިފެހެއްޓީ ކީއްވެގެންތޯ ވެސް ކައުންސިލަރަކު ސުވާލުކުރެއްވި އެވެ.

ފައްޔާޒް ވިދާޅުވި ގޮތުގައި، މަޖިލީހުގައި އެމްޑީޕީގެ އެންމެ 12 މެމްބަރުން ތިބެ، ޕީއެންސީގެ ސުޕަމެޖޯރިޓީ އޮތުމުން އެކަން ހުއްޓުވޭނެ ގޮތެއް ނެތެވެ. އެކަމަކު، ޕީއެންސީގައި ވެސް ތިބީ ރައްޔިތުންގެ ހޮވާފައި ތިބި މެމްބަރުން ކަމަށާއި ރައްޔިތުންގެ އަޑު އެ މެމްބަރުންނަށް އިއްވައިގެން މިކަން ހައްލުކުރެވިދާނެ ކަމަށް އޭނާ ވިދާޅުވި އެވެ.

"އަޅުގަނޑުމެންގެ [އެމްޑީޕީގެ] ވިސްނުން އޮތީ ހަމަ މިހާރު އޮތް ގޮތަށް ކައުންސިލަރުންގެ އަދަދު ވެސް، ޑަބްލިއުޑީސީގެ މެމްބަރުން ވެސް އަދި ޑަބްލިއުޑީސީގެ މެމްބަރުންނަކީ ވެސް ފުލްޓައިމް ބައެއްގެ ގޮތުގައި ބޭތިއްބުން،" ފައްޔާޒް ވިދާޅުވި އެވެ.

އެމްޑީީޕީގެ ވެރިކަމުގައި 2019 ވަނަ އަހަރު ލާމަރުކަޒީ ނިޒާމަށް ގެނައި ބަދަލުތަކަކީ ދިރާސާތައް ކުރުމަށް ފަހު ގެނައި ބަދަލުތަކެއް ކަމަށް އެ ޕާޓީން ބުންޏެވެ.

ނަމަވެސް، މި ސަރުކާރުން ގެންނަ ބަދަލުތަކާ އެކު އެ ނިޒާމު "ފުނޑޭނެ" ކަމަށް އެމްޑީޕީން ވަނީ ސިފަކޮށްފަ އެވެ.

ބިނާވެށި ޕްލޭން ކުރުމާއި ހިންގުމުގެ ގާނޫނާއި އިދާރީ ދާއިރާތައް ލާމަރުކަޒީ އުސޫލު ހިންގުމުގެ ގާނޫނަށް ރައްޔިތުންގެ މަޖިލީހުން ގެނައި އިސްލާހު ރައީސް ޑރ. މުހައްމަދު މުއިއްޒު ވަނީ މިދިޔަ މަހު ތަސްދީގުކުރައްވައިފަ އެވެ.

ބިނާވެށި ޕްލޭން ކުރުމާއި ހިންގުމާ ބެހޭ ގާނޫނުގައިވާ ގޮތުން ގައުމީ ސިޔާސަތު ކަނޑައަޅާނީ ވަޒީރުންގެ މަޖިލީހުގެ ލަފާގެ މަތިން ރައީސެވެ. އަދި އެ ގާނޫނު ތަންފީޒު ކުރުމުގެ އިސް ޒިންމާ އަދާކުރާނީ ޕްލޭނިން މިނިސްޓަރެވެ.

އެހެންވެ، އެ ގާނޫނުގެ ސަބަބުން ލާމަރުކަޒީ އުސޫލާ ހިލާފަށް، ރައްޔިތުންގެ ބައިވެރިވުމެއް ނެތި ރަށްރަށުގެ ބިން ޕްލޭންކުރަން ސަރުކާރަށް ފުރުސަތު ލިބިގެންދާނެ ކަމަށް އެމްޑީޕީން ބުންޏެވެ.

މި ސަރުކާރުން ވަނީ ކައުންސިލްތަކުގައި ތިބޭ މެމްބަރުންގެ އަދަދު މަދުކުރަން ވެސް ނިންމައިފަ އެވެ. އެކަމަށް ވެސް އެމްޑީޕީން ވަނީ ވަރަށް ބޮޑަށް ފާޑުކިޔައިފަ އެވެ.