ޗައިނާ-މޯލްޑިވްސް ކަލްޗަރަލް އެސޯސިއޭޝަންގެ ސަރަހައްދީ އޮފީހެއް ހަނިމާދޫގައި ހުޅުވައިފި

ރާއްޖެ އާއި ޗައިނާ ގުޅިގެން ދެ ގައުމުގެ ސަގާފަތްތައް ކުރިއަރުވަން މަސައްކަތް ކުރާ، ޗައިނާ މޯލްޑިވްސް ކަލްޗަރަލް އެސޯސިއޭޝަން (ސީއެމްސީއޭ) ގެ ސަރަހައްދީ އޮފީހެއް ހދ. ހަނިމާދޫގައި އިއްޔެ ހުޅުވައިފި އެވެ.

މި އެސޯސިއޭޝަންގެ މައި އޮފީސް މާލޭގައި ހިންގާއިރު، ސަރަހައްދީ އޮފީހެއް ރާއްޖޭގައި ގާއިމްކުރި މިއީ ފުރަތަމަ ފަހަރެވެ.

ސީއެމްސީއޭގެ ރައީސް މުހައްމަދު ރަޝީދު "މިހާރު" އަށް މިއަދު ވިދާޅުވީ ހަނިމާދޫގައި އެ އެސޯސިއޭޝަނުގެ އޮފީހެއް ހުޅުވީ، އެ ރަށު ކައުންސިލުން ވެސް އެ ކަމަށް ވަރަށް ބޮޑަށް ޝައުގުވެރިވެ، އެއްބާރުލުން ދިނުމުން ކަމަށެވެ.

މި އޮފީސް ހާއްސަ ވާނީ ތިލަދުންމަތީގެ އަތޮޅުތައް ކަމަށްވާ ހއ އާއި ހދ އަދި ށ އަށެވެ.

"އަޅުގަނޑުމެން ކުރާ ގިނަ ކަންކަން އަދިވެސް މި އޮންނާނީ މާލޭގައި. އެކަމަކު މި ސަރަހައްދީ އޮފީހާ އެކު ރަށްރަށުގައި ތިބޭ މީހުންނަށް ވެސް އަޅުގަނޑުމެން މި ކުރާ ކަންކަމުގައި ބައިވެރިވުމުގެ ފުރުސަތު ލިބިގެންދާނެ،" ކުރީގެ ރައީސް މުހައްމަދު ނަޝީދާއި ކުރީގެ ރައީސް މުހައްމަދު ވަހީދުގެ ވެރިކަމުގައި މިނިސްޓަރުކަން ކުރެއްވި ރަޝީދު ވިދާޅުވި އެވެ.

މި އޮފީސް ހުޅުވުމާ އެކު، ޗައިނާގެ ބަސް ދަސްކޮށްދިނުމުގެ ޕްރޮގުރާމްތަކާއި ކަލްޗަރަލް އެކްސްޗޭންޖު ވިޒިޓްތަަކަށް މީހުން ފޮނުވުމާއި ދެ ގައުމުގެ ސަގާފަތަށް މީހުން ހޭލުންތެރިކުރުމާއި އަދިވެސް އިތުރު ހަރަކާތްތައް ކުރިއަށް ގެންދަން އަންނަނީ ރާވަމުންނެވެ.

ސީއެމްސީއޭ އުފެއްދީ 2015 ވަނަ އަހަރު އެވެ. އޭގެ ފަހުން މި އެސޯސިއޭޝަނުން ވަނީ ރާއްޖެ އާއި ބޭރުގެ އެކި ޖަމިއްޔާތަކާ ގުޅިގެން ތަފާތު ހަރަކާތްތައް ބާއްވައިފަ އެވެ. އެ އެސޯސިއޭޝަންގެ ފުރަތަމަ ޔޫތު އެކްސްޖޭންޖު ވިޒިޓް ޕްރޮގްރާމް 2016 ގައި ބާއްވައި، ޗައިނާ އަށް ވަނީ ދިވެހި ޒުވާނުންގެ ޓީމެއް ފޮނުވައިފަ އެވެ.