ޗައިނާއަކީ ތަރައްގީގެ އެއް ބައިވެރިޔާ، ކުރިމަގުގައި ގުޅުން އިތުރަށް ބަދަހިވާނެ: ރައީސް

ޗައިނާއަކީ ރާއްޖޭގެ ތަރައްގީގެ ދަތުރުގެ މުހިންމު އެއް ބައިވެރިއެއް ކަމަށާއި ދެ ގައުމުގެ ގުޅުން ކުރިމަގުގައި އިތުރަށް ބަދަހިވާނެ ކަމުގެ ޔަގީން އެބައޮތް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ޗައިނާގެ ގައުމީ ދުވަސް ފާހަގަކުރުމަށް ދަރުބާރުގޭގައި ބޭއްވި ރަސްމިއްޔާތުގައި ރައީސް ވިދާޅުވީ، ޗައިނާއާއެކު އޮތް ޒަމާންވީ ގުޅުން ބިނާވެފައި އޮތީ އިހުތިރާމާއި އިތުބާރާއި އެއް ބަޔަކު އަނެއް ބައެއްގެ ދާހިލީ ކަންކަމަށް ނުފޫޒު ނުފޯރުވުމުގެ މައްޗަށް ކަމަށެވެ.

ރައީސް މުއިއްޒު ވިދާޅުވީ، ރާއްޖޭގެ އިޖުތިމާއީ އަދި އިގުތިސާދީ ކުރިއެރުމުގައި ޗައިނާގެ ދައުރު ވަރަށް ބޮޑު ކަމަށާއި ކުރިމަގުގައި ވެސް އެ ގުޅުން އިތުރަށް ވަރުގަދަ ވާނެ ކަމަށެވެ.

މިގޮތުން، ކުރިއަށް އޮތް ތަނުގައި އިންފްރާސްޓްރަކްޗާގެ ބަދަލުގައި ޓޫރިޒަމާއި އިގުތިސޯދީ, ވިޔަފާރި އާއި އިންވެސްޓްމަންޓް އަދި ސަގާފީ ގޮތުން ވެސް ގުޅިގެން މަސައްކަތް ކުރެވިދާނެ ކަމަށް ގަބޫލުފުޅު ކުރައްވާ ކަމަށް ރައީސް ވިދާޅުވި އެވެ.

ރައީސް މުއިއްޒު ވިދާޅުވިގޮތުގައި، ރާއްޖެ އަށް ކުރިމަތިވެފައިވާ ބޮޑެތި ކަންކަމުން އަރައިގަތުމަށް ޗައިނާއާ ގުޅިގެން އަބަދުވެސް މަސައްކަތް ކޮށްފައި ވެ އެވެ. ކުރިއަށް އޮތް ތަނުގައި ވެސް އެކަން އޮންނާނީ އެ ގޮތަށް ކަމަށް އެ މަނިކުފާނު ވިދާޅުވި އެވެ.

އަދި، ކުރިއަށް އޮތް ތަނުގައި ގުޅުން އިތުރަށް ބަދަހިވެ، ފުރުސަތުތައް އިތުވާނެ ކަމަށް ގަބޫލުފުޅު ކުރައްވާ ކަމަށް ވެސް ރައީސް ވިދާޅުވި އެވެ. ހާއްސަކޮށް ޗައިނާގެ ވަރަށް ބޮޑު އެހީތެރިކަމަކާ އެކު، ހަދާފައިވާ ސިނަމާލެ ބްރިޖަކީ ދެ ގައުމުގެ ގުޅުމުގެ "ލޭންޑްމާކް" އެއްގެ ގޮތުގައި ރައީސް ސިފަކުރެއްވި އެވެ.

އެ މަނިކުފާނު ވަނީ ޗައިނާ އިން ހޯދާފައިވާ ކާމިޔާބީތައް ވެސް ފާހަގަކުރައްވައިފަ އެވެ. އޭގެ ތެރޭގައި ދުނިޔޭގައި އިގުތިސާދީ ބޮޑު ބާރަކަށް ޗައިނާ ވުމާއި ސައިންސާއި ޓެކްނޮލޮޖީ އަދި އެ ގައުމުގެ ދުވަސްވީ ސަގާފަތުގެ ދާއިރާގެ ކާމިޔާބީ ރައީސް ފާހަގަކުރެއްވި އެވެ.