އަސް އުފުލާ ވެހިކަލަކުން ޕިއްޒާގެ ކާމިޔާބު ވިޔަފާރިއެއް

އިނގިރޭސިވިލާތުގެ ވެސްޓް މިޑްލޭންޑްސްގެ 19 އަހަރުގެ ހަތަރު ޒުވާނަކު، ހޯސް ބޮކްސް ނުވަތަ އަސް އުފުލާ ވެހިކަލެއްގައި ޕިއްޒާގެ ވިޔަފާރިއެއް ފަށައި ކާމިޔާބުކަމާ އެކު ވިޔަފާރި ފުޅާކުރަން ފަށައިފި އެވެ.

މިކަން ފެށުނީ މިދިޔަ އަހަރު ކޮވިޑްގައި ކުރިމަތިވި ލޮކްޑައުންގެ ތެރޭގަ އެވެ. ވިޔަފާރި އަށް އަހަރެއްވީ އިރު އާންމުންގެ ބޮޑު މަގުބޫލުކަމެއް ލިބި، އާމްދަނީ ވެސް މިހާރު ފަސް ނަމްބަރުގެ އަދަދަކުން މައްޗަށް އަރައިފި އެވެ.

ހަތަރު ޒުވާނުންގެ ޕިއްޒާ ވިޔަފާރި ހިންގަނީ ހޯސް ބޮކްސްއެއްގަ އެވެ، އޮޅުކޮށްގެން ގެންގުޅޭ އަސް އުފުލަން ބޭނުންކުރާ ހޯސް ބޮކްސް އެ މީހުން ގަތީ 2،000 ޕައުންޑަށެވެ. އަދި ޕިއްޒާގެ ވިޔަފާރިކުރެވޭ ގޮތަށް އެ ބަދަލުކުރަން އިތުރު 2.000 ޕައުންޑް ހޭދަކުރި އެވެ.

"ޑާޓީ ޑޮންކީ" ގެ ނަމުގައި ހިންގާ މި ވިޔަފާރީގެ ހިއްސާދާރުންނަކީ އެއްމާބަނޑު ދެބެއިން ކަމަށްވާ ބެނީ އާއި ޖެކްއެސް ބޭކާގެ އިތުރުން އެ މީހުންގެ ގާތް ދެ އެކުވެރިން ކަމަށްވާ ބެން ލީތު އާއި ޖެމީ މޮރާލް އެވެ.

މޮބައިލްކޮށް ބޭނުންކުރެވޭ ގޮތަށް ތައްޔާރުކޮށްފައިވާ "ޑާޓީ ޑޮންކީ" އަކީ މިހާރު އެކި އިވެންޓްތައް ކުރިއަށްދާ ތަންތަނުގައި މަޑުކޮށްލައިގެން ތިބެ، ރަހަމީރު އެތައް ވައްތަރެއްގެ ޕިއްޒާއެއް ކަސްޓަމަރުންނަށް ފޯރުކޮށްދޭ، ވަރަށް ކާމިޔާބު ވިޔަފާރިއެކެވެ.

"އަހަރެއްހާ ދުވަހުގެ ތެރޭގައި މިކަމަށް ލިބުނު ތަރުހީބު ވަރަށް ބޮޑު. އެހެންވެ ކުރިން އަހަރެމެން އުންމީދުކުރި ވަރަށް ވުރެ މާ ހަލުވިކޮށް، މި ވިޔަފާރި އަކީ ކާމިޔާބުކަމެއްކަން ވެސް އެނގިއްޖެ،" ޒުވާން ހަތަރު ވިޔަފާވެރިން ބުންޏެވެ.

ލީތު ބުނި ގޮތުގައި "ޑާޓީ ޑޮންކީ" ކާމިޔާބުވުމުގެ މައިގަނޑު ސިއްރަކީ ހަތަރު މީހުން ވެސް މި ވިޔަފާރި އަށް ވަރަށް ގަޔާވެގެން ކުރުމެވެ.

"އެ ނޫން ފޯކަސްއެއް ނުވެސް ނެތް މިހާރަކު. އެކަމަކު ޖެކްއެސް އާއި ބެނީ އަދި ޖެމީ އަކީ ކިޔަވަމުން އަންނަ ކުދިން. އަހަންނަކީ ފުލްޓައިމްކޮށް މި މަސައްކަތުގައި އުޅޭ މީހާ،" އޭނާ ބުންޏެވެ. "އެންމެ އުފާވި ކަމަކީ ލޮކްޑައުންގެ ތެރޭގައި ލިބުނު އެތައް ހުސް ވަގުތެއްގެ ބޭނުން އުފެއްދުންތެރި ގޮތަކަށް ބޭނުންކުރަން އައި ހިޔާލު."

ހަތަރު ޒުވާނުން ވެސް ބުނި ގޮތުގައި އެ މީހުންގެ ހަމައެކަނި ޕިއްޒާ ވިއްކަނީކީ ނޫނެވެ. އާންމުންގެ ސަމާލުކަން ވިޔަފާރި އަށް ހޯދުމަށްޓަކައި އެކި ކަހަލަ އާ ކަންކަން ވެސް އަންނަނީ ކުރަމުންނެވެ.

"ވަރަށް ޓްރެންޑީކޮށް، ކެޗީކޮށް އަދި ވީހާ ވެސް ބޮޑަށް އާންމުންގެ ސަމާލުކަން ލިބޭ ގޮތަށް މިކަން ކުރަން ބޭނުން ވަނީ. ކޮންމެ ވިޔަފާރިއެއްގައި ވެސް ހުންނާނެ ޔުނިކް ސިފަތަކެއް. ހަމަ ޔަގީނުން ވެސް ސްޓްރީޓް ފުޑްގެ ވިޔފާރިކުރާ މީހުންގެ ތެރެއިން އަހަރެމެން ހޯސް ބޮކްސްގައި މި ހިންގާ ވިޔަފާރި އަކީ ވެސް މިހާރު ޓްރެންޑެއް،" ލީތު ބުންޏެވެ.

އޭނާ ބުނި ގޮތުގައި މިހާރު އަންނަނީ އޯޑަރަކަށް ވެސް އެކި އިވެންޓްތަކަށް ޕިއްޒާ ހަދައިދެމުންނެވެ. މިހާރު ކައިވެނީގެ ހަފުލާތަކަށް ވެސް ޕިއްޒާ ތައްޔާރުކޮށްދޭން އޯޑަރު ލިބޭ ކަމަށް ބުންޏެވެ.

"ޑާޓީ ޑޮންކީ" އިން ބުނީ އެ މީހުންގެ ވިޔަފާރި އަދި ކުރިއަށް އޮތީ ކަމަށެވެ. އެހެންވެ ކުރިއަށް އޮތް ތަނުގައި ވިޔަފާރި ފުޅާކުރަން ފްލީޓް ބޮޑުކޮށް، މުޅި އިނގިރޭސިވިލާތަށް ހިދުމަތް ދެވޭ ފެންވަރުގެ ބަޔަކަށް އެ މީހުން ވާން ބޭނުންވާ ކަމަށް ބުންޏެވެ.