ކެންސަރު ބަލީގެ ކުދިންނަށް އެހީވި ކުއްޖާ ކެންސަރާ ހަނގުރާމަކުރަނީ

ކެންސަރަށް ފަރުވާ ހޯދާއިރު ކީމޯތެރަޕީގެ ސަބަބުން ބޮލުގެ އިސްތަށި ފައިބާތީ އެކަން ތަހަންމަލްކުރާ ކުދިންނަށް ބޭނުންވާ ވިގް ފޯރުކޮށް ހޯދައިދޭން މަސައްކަތްކުރާ ޗެރިޓީއަކަށް އަމިއްލަ އިސްތަށިގަނޑު ކޮށާލައި ހަދިޔާކުރި ފުރާވަރުގެ އަންހެން ކުއްޖަކު ކެންސަރަށް ފަރުވާ ހޯދަން ޖެހި، އަމިއްލަ އަށް ވިގެއް ޖަހައިފި އެވެ.

އިނގިރޭސިވިލާތުގެ ލީސެސްޓަޝަޔާ އަށް ނިސްބަތްވާ ކިޔާ، 15، އަށް ކެންސަރުގެ ބާވަތެއް ކަމަށްވާ ހޮޖްލިންސް ލީމްފޯ ކަނދުރާ އަށް ޖެހިފައިވާކަން އެނގުނީ ޗެރިޓީ، ލިޓްސް ޕްރެސެސް ޓްރަސްޓް އަށް އޭނާގެ އިސްތަށިގަނޑު ހަދިޔާކުރިތާ އަހަރެއް ފަހުންނެވެ. އެކަން އެނގުނީ މިދިޔަ އަހަރު ޖީސީއީ އޯ ލެވެލް އިންތިހާނުގައި އިށީން ދުވަހު އެވެ.

"އިމްތިހާނަށް ދާން އޮތް ދުވަހު އެކަން އެނގުނީމާ ވަރަށް ދެރަވި. އެކަމަކު ބައްޔާ އެކު ވެސް އަހަރެން އިމްތިހާނު ފުރިހަމަކުރިން،" ކިޔާ ބުންޏެވެ.

އޭނާ މިހާރު ހުރީ ކެންސަރުގެ ހަތަރު ވަނަ ސްޓޭޖްގަ އެވެ.

ކެންސަރަށް ފަރުވާ ހޯދާ ކުދިންނަށް އެހީވާން މަސައްކަތްކުރި ކުއްޖަކު ކެންސަރުގެ ޝިކާރައަކަށްވުމުން ވަރަށް ގިނަ ބައެއްގެ އެހީ މިހާރު ވަނީ ލިބެން ފަށައިފަ އެވެ.

ކިޔާ އަށް ކެންސަރު ޖެހުނުކަން އެނގުމުން ލިޓްލް ޕްރިންސެސް ޓްރަސްޓްގެ ބާނީ ވެންޑީ ޓާޕްލީ-މޮރިސް ބުނީ އެކަމާ ވަރަށް ދެރަވި ކަމަށެވެ.

"އެ ޚަބަރު ލިބުނު ދުވަހަކީ ވަރަށް ހިތްދަތިވި ދުވަހެއް. ކިޔާ އަށް އެފަދަ ހާލަތެއް ދިމާވުމަކީ އަހަރެމެން އެންމެން ފެންކަޅިކޮށްލި ކަމެއް،" އޭނާ ބުންޏެވެ.

ވެންޑީ ބުނި ގޮތުގައި ކިއާ އަށް ކެންސަރު ޖެހުނުކަން އެނގުމާ އެކު މީހުން އަންނަނީ ދެވެން އޮތް ހުރިހާ އެހީތެރިކަމެއް ދެމުންނެވެ.

ކިޔާ މިހާރު ފަރުވާ ހޯދަމުން އަންނަ އިރު، ފަރުވާ އަށް ބޭނުންވާ ފަންޑް ހޯދަން ކުރާ މަސައްކަތުގައި މަޝްހޫރު ބައެއް މީހުން ވެސް އަންނަނީ ބައިވެރިވަމުންނެވެ. އޭގެ ތެރޭގައި ލިވަޕޫލް އަށް ކުޅޭ ސްކޮލޭންޑްގެ ފުޓްބޯޅަ ތަރި އެންޑޫ ރޮބަޓްސަން ހިމެނެ އެވެ.

"ކިޔާއާ އެކު އަހަރެމެން އެންމެން މި ތިބީ. އެހެންވީމާ ބައްޔާ ދެކޮޅަށް ވަރަށް ހިތްވަރުކުރަން ވާނެ،" ކިޔާ އަށް އެންޑީ ފޮނުވި މެސެޖެއްގައި ބުންޏެވެ.