ހިޔާ ފްލެޓްތަކަށް ބަސް ދަތުރުތައް ފަށަން މަޝްވަރާކޮށްފި

ހިޔާ މަޝްރޫއުގެ ދަށުން ހުޅުމާލޭގައި ތަރައްގީކޮށްފައިވާ ފްލެޓްތައް ހިމެނޭ ސަރަހައްދަށް ބަސް ދަތުރުތައް ފެށުން އަވަސްކުރުމާ ބެހޭ ގޮތުން މަޝްވަރާކޮށްފި އެވެ.

ހިޔާ ޔޫނިއަންގެ ހެޑް ފައުންޑަރު، އަބްދުﷲ އަމްޒަލް، "މިހާރު" އަށް ވިދާޅުވި ގޮތުގައި ފްލެޓް ލިބުނު ބައެއް މީހުން އަންނަ މަހުގެ ތެރޭގައި އެތަނަށް ދިރިއުޅުން ބަދަލުކުރުމަށް ތައްޔާރުވަމުންދާތީ އެ މީހުންނަށް ދަތުރުކުރެވޭނެ ލުއި އިންތިޒާމެއް ހަމަޖައްސައިދިނުމަށް އިއްޔެ ޓްރާންސްޕޯޓް މިނިސްޓްރީގެ އިސް ބޭފުޅުންނާ އެ ޔޫނިއަނުން ބައްދަލުކުރި އެވެ.

އެ ޔޫނިއަނުން އެދިފައި ވަނީ ފޭސް ދެއަކަށް ބަސް ދަތުރުތައް ފެށުމަށް ކުރަންޖެހޭ މަސައްކަތްތައް ވީހާ ވެސް އަވަސްކޮށްދިނުމަށެވެ. އަމްޒަލް ވިދާޅުވީ ވަގުތީ ގޮތުން ބަސް ދަތުރުތައް ފެށިދާނެ ކަމަށާއި އެކަމާ ގުޅޭ ގޮތުން މިއަދު އެމްޓީސީސީއާ ބައްދަލުކޮށް މަޝްވަރާކުރާނެ ކަމަށް މިނިސްޓްރީން ބުނި ކަމަށެވެ.

"ވަގުތީ ގޮތުން ބަސް ދަތުރު ފެށިދާނެ ކަމަށް ބުނީ. އެއީ މިހާރު ވެސް ވަށައިގެން ބަސް ދަތުރުކުރެވޭ މަގުން މި ބަސް ދަނީ. އެހެންވީމާ އެ އިންތިޒާމުތައް އަވަސް ކުރުމަށް މަސައްކަތްކުރާނެ ކަމަށް ވަނީ ބުނެފައި."

ފްލެޓް ލިބުނު ބައެއް މީހުން އެތަނުގެ އެތެރޭގެ މަސައްކަތް ނިންމާފައިވާއިރު އަނެއް ބަޔަކު ތައްޔާރުވަމުން ދަނީ ކިރިޔާ އުޅެލެވޭ ވަރު ކުރުމަށް ފަހު އެތަނަށް ބަދަލުވުމަށެވެ. އަޒްމަލް ވިދާޅުވި ގޮތުގައި އެއްވެސް ކުއްޔަކާ ނުލައި ޑިސެމްބަރު މަހުގެ ނިޔަލަށް އެތަނުގައި އުޅެވޭނެތީ ގިނަ ބަޔަކު ތަނުގެ މަސައްކަތް އަވަހަށް ނިންމައި އެތަނަށް ބަދަލުވުމަށް އަންނަނީ ތައްޔާރުވަމުންނެވެ.

"އެތަނަށް ބަދަލުވާއިރު ސްކޫލު ކުދިންނާއި އޮފީސްތަކަށްދާ މީހުން ވެސް އެބަ ބަދަލުވޭ. އެމީހުންނަށް ވަގުތީ ގޮތުން ނަމަވެސް ބަސް ދަތުރުތައް ހުރުމުން އެބަ ފަސޭހަވޭ،" އޭނާ ވިދާޅުވި އެވެ.

މިކަމާ ބެހޭ ގޮތުން ޓްރާންސްޕޯޓް މިނިސްޓްރީގެ ބަހެއް ނުލިބުނެވެ.

ހިޔާ މަޝްރޫއުގެ ދަށުން ފްލެޓް ލިބުނު 6،720 މީހުންގެ ތެރެއިން ގިނަ ބަޔަކާ އެކު ފްލެޓް އެއްބަސްވުން މިހާރު ވަނީ ހަދައިފަ އެވެ. އަދިވެސް ސޮއިކުރުމުގެ މަސައްކަތް ކުރިއަށް އެބަދެ އެވެ.

ފްލެޓްތަކުގެ މަސައްކަތް ނިންމަން ސެޕްޓެމްބަރުން ފެށިގެން ޑިސެމްބަރު މަހުގެ ނިޔަލަށް އެ ތަންތަނުން އެއްވެސް ކުއްޔެއް ނުނަގަން ސަރުކާރުން ވަނީ ނިންމައިފަ އެވެ. އެ ފްލެޓްތަކުން ނަގަން ނިންމާފައިވާ ކުއްޔަކީ 7،500ރ. އެވެ. އަދި ސާވިސް ފީގެ ގޮތުގައި 1،000ރ. ނަގާނެ އެވެ.