ދީން ހިމާޔަތް ކުރަން މި ސަރުކާރު ކުރި ވަރަށް އެއްވެސް ބަޔަކު މަސައްކަތެއް ނުުކުރޭ: ޔައުގޫބު

ރާއްޖޭގައި ގިނަ ސިޔާސީ ޕާޓީތައް އުފެދުނު ފަހުން އިސްލާމް ދީން ހިމާޔަތް ކުރަން އެންމެ ބޮޑަށް މަސައްކަތް ކުރީ މި ސަރުކާރުން ކަމަށާއި އެގޮތުގައި ދެމިތިބޭނެ ކަމަށް ދާންދޫ ދާއިރާގެ މެންބަރު ޔައުގޫބް އަބްދުﷲ މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގައި މިއަދު ވާހަކަ ދައްކަވަމުން ޔައުގޫބް ވިދާޅުވީ ގާނޫނުއަސާސީ ބަދަލު ކުރެވޭ ވަރަށް އެމްޑީޕީ އަށް ބާރު ލިބިފައިވާ ކަމަށާއި ސަރުކާރުން ދީނާ ހިލާފު ކަމެއް ކުރަން ބޭނުން ނަމަ މިއަދު އޮންނާނީ އެކަން ކޮށްފައި ކަމަށެވެ. ނަމަވެސް އެފަދަ ކުޑަވެސް އަމަލެއް ނުކުރައްވާ ކަމަށާއި ދީން ހިމާޔަތް ކުރުމާއި އެހެން ދީނަކަށް ޖާގަ ނުދެއްވާނެ ކަމަށް ރައީސް ތަކުރާރުކޮށް ވިދާޅުވަމުން އަންނަ ކަމަށް ޔައުގޫބް ވިދާޅުވި އެވެ.

"އަޅުގަނޑަށް ފެންނަ ފެނުމުގައި މަލްޓި ޕާޓީ ވެރިކަމެއް ފެށުމުގެ ފަހުން އިސްލާމް ދީނުގެ އުސޫލުތައް ހިފެހެއްޓުމާއި ނެގެހެއްޓުމަށްޓަކައި މި ސަރުކާރުން ކުރާ ވަރުގެ މަސައްކަތް ކުރި އެއްވެސް ސަރުކާރެއް މިވީހާ ތަނަކަށް ފެނިފައެއް ނެތް،" ޔައުގޫބް ވިދާޅުވި އެވެ.

ކުރީގެ ރައީސް އަބްދުﷲ ޔާމީންގެ ސަރުކާރުގައި ފެނިގެން ދިޔައީ ހަރުކަށި ފިކުރުގެ އެއްވެސް ފަރާތަކާ މެދު ފިޔަވަޅެއް ނާޅައި، އެ މީހުންނަށް ފުރުސަތު ދީގެން ވެރިކަން ކުރާ މަންޒަރު ކަމަށް ޔައުގޫބް ވިދާޅުވި އެވެ. ހަރުކަށި ފިކުރުގެ މީހުންނާއި ދީނަށް ފުރައްސާރަ ކުރާ މީހުންނާ ދެކޮޅަށް ވެސް ހަމައެކަނި މަސައްކަތް ކުރެއްވީ މި ސަރުކާރު ކަމަށް އޭނާ ވިދާޅުވި އެވެ.

"ދީނަށް އެއްވެސް ވަރަކަށް ފުރައްސާރަ ކުރުމުގެ ޖާގަ މި ގައުމުން ލިބިގެނެއް ނުވާނެ. މީގެ ކުރިން ނަފްރަތާ ގުޅިގެން ހުށަހެޅުނު ބިލުގައި ވެސް އަޅުގަނޑު ވާނީ އެ ބިލާ ގުޅޭ ގޮތުން ވެސް ވާހަކަ ދައްކާފައި އަދި އިސްލާހު ވެސް ހުށަހަޅާފައި،" ޔައުގޫބް ވިދާޅުވި އެވެ.

ގާނޫނުލްއުގޫބާތުގެ 617 ވަނަ މާއްދާގައި މިހާރު އޮންނަ ގޮތުން މުއާސަލާތީ ވަސީލަތެއް ބޭނުން ކޮށްގެން ނުވަތަ އާންމުންގެ ކުރިމަތީގައި އިސްލާމް ދީނަށް ތައުހީނު ކުރުމުގެ ނިޔަތުގައި އިސްލާމް ދީނަށް ފާޑު ކިޔައި، ދީނީ ތަގުރީރު ކުރުމަކީ ކުށެކެވެ.

ސަރުކާރުގެ ފަރާތުން ތުޅާދޫ ދާއިރާގެ މެންބަރު ހިސާން ހުސެއިން ހުށަހެޅި އިސްލާހުގައި ވަނީ އިސްލާމް ދީނަށް ތައުހީން ކުރުމުގެ ނިޔަތުގައި ބަހުން ނުވަތަ އަމަލުން އިސްލާމް ދީނަށް ފުރައްސާރަ ކުރުމަކީ މަނާ ކަމެއްގެ ގޮތުގައި ކަނޑައެޅުން އެ މާއްދާއަށް އިތުރު ކޮށްފަ އެވެ.