އާ ޕްރިންސިޕަލްއާ އެކު ހިރިމަރަދޫ ސްކޫލްގައި ކިޔަވައިދޭން ފަށައިފި

ހދ. ހިރިމަރަދޫ ސްކޫލަށް ދަރިވަރުން ނުފޮނުވާ މައްސަލައިގައި، ބެލެނިވެރިންގެ އެދުމާ އެއްގޮތަށް އެ ސްކޫލަށް ފޮނުވި އާ ޕްރިންސިޕަލްއާ އެކު މިއަދު ކިޔަވައިދޭން ފަށައިފި އެވެ.

ދިރާސީ އާ އަހަރުގެ ކިޔެވުން މިދިޔަ ހަފުތާގައި ފެށިއިރު، ހިރިމަރަދޫ ސްކޫލްގެ ބެލެނިވެރިން އެދެމުން އަންނަ ގިނަ ކަންތައްތަކެއް އެ ސްކޫލުން ފުރިހަމަކޮށްދީފައި ނުވާ ކަމަށް ބުނެ އެއްވެސް ދަރިވަރަކު ސްކޫލަކަށް ނުފޮނުވަ އެވެ.

މި މައްސަލަ އަށް ވަގުތީ ހައްލެ ހޯދުމުގެ ގޮތުން އެޑިއުކޭޝަން މިނިސްޓްރީން ވަނީ އެ ސްކޫލުގައި ކުރިން ހުރި އިންޑިއާގެ ޕްރިންސިޕަލް މަގާމުން ވަކިކޮށް، ދިވެހި ޕްރިންސިޕަލެއް ފޮނުވައިފަ އެވެ.

ހިރިމަރަދޫ ކައުންސިލްގެ ނައިބް ރައީސް މުހައްމަދު އަރުޒާން "މިހާރު" އަށް ވިދާޅުވީ އެޑިއުކޭޝަން މިނިސްޓްރީން ވަގުތީ ގޮތުން ހަމަޖައްސައިދިން ޕްރިންސިޕަލްއާ އެކު މިއަދު އެ ރަށު ސްކޫލުގައި ކިޔަވައިދޭން ފަށާފައިވާ ކަމަށާއި ސްކޫލުގެ ހުރި މައްސަލަތައް ހައްލުކުރުމަށް ކައުންސިލުން ވެސް އާ ޕްރިންސިޕަލްއާ މަޝްވަރާކޮށްފައިވާ ކަމަށެވެ.

"ވަގުތީ ޕްރިންސިޕަލް ސްކޫލްގެ ހުރި މައްސަލަތައް އޮބްޒާވް ކުރާނެ، އިސްލާހު ކުރަންޖެހޭ ކަންކަން ބަލާނެ. ޓީޗަރުންގެ ފެންވަރު ބެލުމާއި އެ ކަހަލަ ކަންކަން ކުރައްވާނެ. އޭގެ ފަހުގައި މިނިސްޓްރީ އަށް ހުށަހަޅައިގެން ބަދަލު ގެނެވެން ހުރި ކަންކަން ކުރައްވާނެ،" އަރްޒާން ވިދާޅުވި އެވެ.

ދަރިވަރުން ސްކޫލަށް ނުފޮނުވާ މައްސަލައިގައި، އެޑިއުކޭޝަންގެ ޑެޕިއުޓީ މިނިސްޓަރު އަހްމަދު މުޖާހިދާ އެކު މިނިސްޓްރީގެ ޓީމެއް އެ ރަށަށް ގޮސް ރަށު ކައުންސިލާއި ސްކޫލްގެ ބެލެނިވެރިންނާ ބައްދަލުކޮށް، ކަންބޮޑުވުންތަކާ ގުޅޭ ގޮތުން މަޝްވަރާކުރައްވާފައިވެ އެވެ. ބެލެނިވެރިންނާ އެކު ދެކެވުނު ވާހަކަތަކުގައި މި ވަގުތު އެންމެ މުހިންމު ކަމެއްގެ ގޮތުގައި އެދުނީ ޕްރިންސިޕަލް ބަދަލުކޮށްދިނުމަށެވެ.

މީގެ އިތުރުން ވެސް އެ ސްކޫލްގެ ބެލެނިވެރިންގެ ހުރި އިތުރު ކަންބޮޑުވުންތަކަށް، މިނިސްޓްރީގެ ގަވައިދުތަކާއި އުސޫލުތަކުގެ ތެރެއިން ހައްލު ހޯދުމަށް މަޝްވަރާތައް ކުރަމުން އަންނަ ކަމަށް ބުނެފައި ވެ އެވެ.

ގުރޭޑް 10 އާ ހަމަ އަށް ކިޔަވައިދެމުން އަންނަ ހިރިމަރަދޫ ސްކޫލްގައި 8-12 އަހަރުވީ ޓީޗަރުން ތިބިއިރު، ގިނައީ ބިދޭސީ ޓީޗަރުންނެވެ. މި ޓީޗަރުންގެ ފަރާތުން ރަނގަޅު ނަތީޖާ ނެރެނުދެވޭތީ ކަމަށް ބުނެ، ޓީޗަރުން ބަދަލުކޮށްދޭން ބެލެނިވެރިން އެދުމުން އަންނަތާ މިހާރު ވަރަށް ގިނަ ދުވަސް ވެއްޖެ އެވެ.

މިހާރު 64 ދަރިވަރުން ކިޔަވަމުން އަންނަ، އެ ސްކޫލްގެ ބެލެނިވެރިންގެ ހުރި އިތުރު ކަންބޮޑުވުންތަކުގެ ތެރޭގައި ސްކޫލް އަލުން ހުޅުވަން އެއްވެސް ވަރަކަށް ތައްޔާރުވެފައި ނުވުމާއި ސްކޫލް އިމާރާތުގެ އާބާތުރަ ފިލުވަން ވެސް މަސައްކަތެއްކޮށްފައި ނުވުމުގެ އިތުރުން ދަރިވަރުންނަށް ބޭނުންވާ ފޮތްތައް ހަމަނުވުމުގެ މައްސަލަ ވެސް ހިމެނެ އެވެ.

އެ ސްކޫލުގެ ޕްރިންސިޕަލަކަށް އިންޑިއާ މީހަކު ހަމަޖެއްސީ މީގެ ތިން މަސް ކުރިންނެވެ. އެ ޕްރިންސިޕަލް ވެސް ސްކޫލްގައި ހުރި މައްސަލަތައް ހައްލުކުރަން އުޅުއްވާތަން ނުފެންނަ ކަމުގެ ޝަކުވާ ބެލެނިވެރިން ވަނީ ކޮށްފަ އެވެ.

ކޮވިޑް ކޮންޓްރޯލްކުރުމަށް އެޅި ފިޔަވަޅުތަކާ އެކު ދޮޅު އަހަރުގެ މެދުކެނޑުމަކަށް ފަހު، ހުރިހާ ދަރިވަރުން ސްކޫލަށް ހާޒިރުކޮށްގެން ކިޔަވައިދޭން މިދިޔަ ހަފުތާގެ އަންގާރަ ދުވަހު ވަނީ ފަށައިފަ އެވެ. އަދި އެހެން ދިރާސީ އަހަރުތަކާ ހިލާފަށް، ނިޒާމީ ބަދަލަކާ އެކު މިފަހަރު ކިޔެވުން ފެށީ އަހަރުގެ މެދުތެރެއިންނެވެ.