ނަޝީދަށް ދިން ޓެރަރިސްޓް ހަމަލާ: އަދުހަމް ފިލުވުމުގެ ބޭނުމުގައި އޭނާގެ ސިފަ ބަދަލު ކުރަން އުޅުނު

ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަ ކޮށްލަން އައިއީޑީ ގޮއްވައިލުމަށް ފަހު، ސިފަ ބަދަލުކުރަން އަދުހަމް އަހުމަދު ރަޝީދު މަސައްކަތް ކުރި ކަމަށް ޕީޖީ އޮފީހުން މިއަދު ބުނެފި އެވެ.

އަތަމާ ޕެލެސްގެ ތެރޭގައި ހުރެގެން، މަޖީދީ މަގާއި ނީލޯފަރު ހިނގުން ގުޅޭ ހިސާބުގައި ބަހައްޓާފައި ހުރި ސައިކަލެއްގައި ހަރުކޮށްފައިވާ އައިއީޑީ ގޮއްވައިލުމަށް ފަހު، ވ. ތިނަދޫ ހިޔާ، އަދުހަމް އެ ސަރަހައްދުން ފިލައިގެން ގޮސް ހިނގާފައި ދިޔައީ އަމީނީ މަގުން ބިލަބޮންގް ސްކޫލް ކައިރީގެ ބުރު ޕާކަށެވެ. ފުލުހުން ކުރިން ބުނެފައިވާ ގޮތުގައި އެ ތަނުން އޭނާއާ ބައްދަލުކުރީ މއ. ފޭރުގޭ މުޖާޒް އަހުމަދާ އެވެ.

ޕީޖީ އޮފީހުން މިއަދު ބޭއްވި މީޑިއާ ބްރީފިންގައި ބުނިގޮތުގައި، އަދުހަމް ފިލުވުމަށްޓަކައި އޭނާ އަށް އަންނައުނު ގެންގޮސްދިނީ މުޖާޒެވެ. އަދި އޭނާ ފިލުވުމަށް ގެސްޓް ހައުސްއަކަށް ދިއުމަށްޓަކައި ޓެކްސީއެއް ހޯދައިދީ، އެރޭގެ 10:30 ހާއިރު، އޭނާ ގޮވައިގެން އޭޖޭއީ އެމްޕޯރިއަމް ކައިރީގައި ހުންނަ ގެސްޓް ހައުސްއަކަށް ޓެކްސީގައި ގެންދިޔަ ކަމަށް ޕީޖީ އޮފީހުން ބުނެ އެވެ.

އަދި އެ ރޭ އަދުހަމް ފިލުވުމުގެ އިތުރުން އޭގެ އަނެއް ދުވަހުގެ ހެނދުނުގެ ވަގުތެއްގައި އޭނާ އަށް ޓްރިމަރެއް ގެންގޮސްދީ، އަދުހަމްގެ ސިފަ ބަދަލުކުރުމަށް މުޖާޒް އެހީތެރިވެދިން ކަމަށް ޕީޖީ އޮފީހުން ބުންޏެވެ.

ނަޝީދު އަވަހާރަ ކޮށްލަން ދިން ހަމަލަ އަށް ތިންވަނަ އަށް ވީ ދުވަހުގެ (މެއި 9) ފަތިހު، ހުޅުމާލޭގައި ދިރިއުޅޭ ގެއިން އަދުހަމް ހައްޔަރު ކުރިއިރު ހުރީ ވެސް ކުރިން ހުރި ގޮތާ ހިލާފަށް ތުނބުޅި ވަރަށް ތުނިކޮށްފަ އެވެ.

މުޖާޒުގެ މައްޗަށް ޕީޖީ އޮފީހުން ވަނީ ކުށެއް ކޮށްފައިވާ މީހަކު ފިލުވުމަށް އެހީތެރިވުމުގެ ދައުވާ ކޮށްފަ އެވެ. އެ ކުށުގެ އަދަބަކީ ނުވަ މަހާއި 18 ދުވަހުގެ ޖަލު ހުކުމެކެވެ. އޭގެ އިތުރުން، ޓެރަރިޒަމްގެ އަމަލެއް ކުރަން ރޭވުމުގެ ދައުވާ ވެސް ކޮށްފައިވާއިރު، އެ ކުށުގެ އަދަބަކީ 17 އަހަރާއި 20 އަހަރާ ދެމެދުގެ ޖަލު ހުކުމެކެވެ.

އަދުހަމް މިހާރު ވަނީ ދައުލަތާއެކު އިއުތިރާފު އެއްބަސްވުމެއް ހަދައި 23 އަހަރުގެ ޖަލު ހުކުމަކަށް އެއްބަސްވެފަ އެވެ. އަދި އޭނާ ގެންދަނީ މައްސަލައިގައި ހިމެނޭ އެހެން މީހުންގެ މައުލޫމާތު ތަހުގީގަށް ދެމުންނެވެ.

ޕީޖީ ހުސައިން ޝަމީމް މިއަދުގެ ބްރީފިންގައި ވިދާޅުވި ގޮތުގައި އަދުހަމް ކޯޓުގައި ވެސް އިއުތިރާފުވެފައިވުމުން އޭނާގެ ހެކިބަހަށް ވަރަށް ބޮޑަށް ބުރަދަން ދެވޭނެ އެވެ.

އަދުހަމާއި މުޖާޒްގެ އިތުރުން ނ. މަނަދޫ ނޫރީގެ އަލީ ހައިޝަމާއި ގއ. ކޮނޑޭ، ފޮޅޭމާ ތަހުމީން އަހުމަދުގެ މައްޗަށް ވެސް ދައުވާ ކުރި އެވެ. ގޮއްވައިލި އައިއީޑީން އެ މީހުންގެ ޑީއެންއޭ ފެނިފައިވާ ކަމަށް ޕީޖީ އޮފީހުން ބުންޏެވެ. އެ އޮފީހުން ތުހުމަތު ކުރާ ގޮތުގައި މި ހައިޝަމާއި ތަހުމީނަކީ ސައިކަލުގައި ބޮން ހަރުކުރުމުގައި އަމަލީ ގޮތުން އުޅުނު މީހުންނެވެ.

މި މައްސަލައިގައި ދެން ހިމެނޭ ފަސް މީހުންގެ ތަހުގީގު އަދިވެސް ދަނީ ކުރިއަށެވެ. ފުލުހުން އެދިގެން ތަހުގީގުުގެ މުއްދަތު މިހާރު ވަނީ މި މަހުގެ 20 ވަނަ ދުވަހުގެ ނިޔަލަށް އިތުރުކޮށްދީފަ އެވެ.

މި މައްސަލައިގައި ހިމެނޭ ލ. ގަން ދުންފިނިއުފާ އަހުމަދު ފާތިހުގެ މައްޗަށް ވެސް އަދުހަމް ފިލުވަން އުޅުމުގެ ތުހުމަތު ކުރެވެ އެވެ. ނަމަވެސް، އޭނާގެ މައްޗަށް މި ވަގުތު ދައުވާ ނުކުރަން ޕީޖީ އޮފީހުން ވަނީ ނިންމައިފަ އެވެ. އޭނާގެ އިތުރުން ތަހުގީގު ހިންގަމުންދާ ބައެއް މީހުންނަށް ވެސް އަދުހަމް ފިލުވަން އުޅުމުގެ ތުހުމަތު ކުރެ އެވެ.