އިއްޒުއްދީން ސްކޫލްގެ ޕްރިންސިޕަލަށް ޖިންސީ ފުރައްސާރައިގެ ތުހުމަތު

އިއްޒުއްދީން ސްކޫލްގެ ޕްރިންސިޕަލް އިސްމާއިލް ނަސީރު، އެ ސްކޫލްގެ ޓީޗަރުންތަކަށް ޖިންސީ ފުރައްސާރަކުރި ކަމަށް ތުހުމަތުވާ މައްސަލައެއް ބަލައި ފިޔަވަޅު އެޅުމެއް ވެސް ނެތި، އޭނާ އެހެން ސްކޫލަކަށް ބަދަލުކުރި ކަމަށް ބުނެ ޓީޗަރުންގެ އެސޯސިއޭޝަނުން ކަންބޮޑުވުން ފާޅުކޮށްފި އެވެ.

އެ އެސޯސިއޭޝަނުން ރޭ ނެރުނު ނޫސް ބަޔާނެއްގައި ބުނީ އިސްމާއިލް ނަސީރުގެ މަގާމު އެހެން ސްކޫލަކަށް ބަދަލުކޮށްފައި ވަނީ އެ ސްކޫލްގެ ހަ ޓީޗަރަކަށް ޖިންސީ ފުރައްސާރަކުރި ކަމުގެ ތުހުމަތާ ގުޅިގެން އެޑިއުކޭޝަން މިނިސްޓްރީ އަށް މައްސަލަ ހުށަހެޅުމުން، ހާއްސަ ކޮމިޓީއަކުން އެ މައްސަލަ ބެލުމުން، އޭނާގެ މައްޗަށް މި އަމަލު ސާބިތުވެފައި ވަނިކޮށް ކަމަށެވެ.

މި އަމަލު ހިންގި މީހާ އަށް އެއްވެސް ފިޔަވަޅެއް އެޅުމެއް ނެތި، އޭނާގެ އެދުމުގެމަތިން "ޕްރޮމޯޝަންއަކާ އެކު" އެހެން ސްކޫލެއްގެ ޕްރިންސިޕަލް ކަމަށް ހަމަޖެއްސެވީ ކަމަށް ބުނެފައި ވެ އެވެ. އަދި މި މައްސަލަ ސާބިތުވެފައި ވަނިކޮށް، އަނިޔާ ދިން މީހާގެ މަސްލަހަތު ހިމާޔަތްކުރުމަށް، އެޑިއުކޭޝަން މިނިސްޓްރީން މަސައްކަތް ކުރާ ކަމަށް ވެސް ތުހުމަތުކޮށްފައި ވެ އެވެ.

"... ޖިންސީ ފުރައްސާރައިގެ މައްސަލައިގައި ޝިކާރައަކަށް ވެފައިވާ ފަރާތްތަކަށް އެ ފަރާތްތަކުގެ ބެލެނިވެރިއެއްގެ ގޮތުގައިވާ މިނިސްޓްރީ އޮފް އެޑިއުކޭޝަން އިން ވަނީ އެ ފަރާތްތަކަށް ބޭއިންސާފުން އެއްވެސް މަޝްވަރާކުރުމެއް ނެތި ފިޔަވަޅު އަޅައިފައި،" ބަޔަނާގުއި ވެ އެވެ.

އިއްޒުއްދީން ސްކޫލްގެ ޕްރިންސިޕަލާ މެދު ހިތްހަމަނުޖެހި، މި އަހަރު ކުރީކޮޅު އެ ސްކޫލްގެ ހަތަރު ލީޑިން ޓީޗަރަކު އެއް ފަހަރާ އިސްތިއުފާ ދިނެވެ. ޓީޗާސް އެސޯސިއޭޝަނުން މި ބަޔާން ނެރުނީ ޕްރިންސިޕަލްގެ މައްސަލަ ބަލަމުން ދަނިކޮށް، މި ހަތަރު ޓީޗަރުން އެހެން ސްކޫލްތަކަށް ބަދަލުކުރަން ނިންމައިފަވާ ކަން އިއްޔެ އެޑިއުކޭޝަން މިނިސްޓްރީން ޓީޗަރުންނަށް އެންގުމާ އެކުގަ އެވެ.

އެކަމަކު މި ނިންމުމާ ޖިންސީ ފުރައްސާރައިގެ މައްސަލައާ އެއްވެސް ގުޅުމެއް ނުވާ ކަމަށް އެޑިއުކޭޝަނުން މިއަދު ބުންޏެވެ.

މިކަމާ ގުޅޭ ގޮތުން އެޑިއުކޭޝަނުން ނެރުނު ނޫސް ބަޔާނެއްގައި ބުނީ، އެ ހަތަރު ޓީޗަރުން އެހެން ސްކޫލަކަށް ބަދަލުކުރަން ނިންމާފައި ވަނީ، މި މައްސަލަ ހައްލުކުރުމަށްޓަކައި ޕްރޮފެޝަނަލް މިންގަނޑުތަކާ އެއްގޮތަށް ހާއްސަ ކޮމިޓީއަކުން ހިންގި ލީޑާޝިޕް އެންޑް މެނޭޖްމަންޓް ރިވިއު އަށް ރިއާތްކުރުމަށް ފަހުގައި ކަމަށެވެ.

ހަމަ އެ ރިވިއުގައި މިކަމުގެ ސަބަބުން ދަރިވަރުންގެ ކިޔެވުމަށް އަސަރުކުރާނެ ކަމަށް ލަފާކުރެވޭ ކަމަށް ބުނެފައި ވާތީ، މި މައްސަލަ ހައްލުކުރުމަށްޓަކައި ދިރާސީ އާ އަހަރު ފެށެން ވާއިރަށް ބައެއް މަގާމުތަކަށް ބަދަލު ގެނައީ ކަމަށް ވެސް ބުނެފައި ވެ އެވެ.

"މި ހަތަރު ޓީޗަރުން ބަދަލުކުރަން ނިންމާފައިވާ ނިންމުމާ، މި މިނިސްޓްރީ އަށް ހުށަހެޅިފައިވާ ޖިންސީ ފުރައްސާރައިގެ އެއްވެސް މައްސަލައަކާ ގުޅުމެއް ނުވެ،" އެ ބަޔާނުގައި ވެ އެވެ.

މިނިސްޓްރީ އަށް ހުށަހަޅާ ޖިންސީ ފުރައްސާރައިގެ މައްސަލަތައް ވަރަށް ސީރިއަސްކޮށް ބަލައި އަވަސް ފިވަޅުތައް އެޅުމަށް އަބަދު ވެސް މަސައްކަތް ކުރާ ކަމަށާއި އަދި ޓީޗާސް އެސޯސިއޭޝަން އާއި ޕަބްލިކް އިންޓްރެސްޓް ލޯ ސެންޓަރުން ނެރެފައިވާ ނޫސްބަޔާންތަކުގައި ހަގީގަތާ ހިލާފު މައުލޫމާތުތައް ހިމަނާފައި ވާތީ އެކަން ކުށްވެރިކުރާ ކަމަށް ވެސް ބުނެފައި ވެ އެވެ.