ތުޅާދޫގައި ރޯވި ގޭގެ މީހުންނަށް ކައުންސިލުން މާލީ އެހީ ދީފި

ބ. ތުޅާދޫގައި ހިނގި އަލިފާނުގެ ހާދިސާގައި ގެއްލުން ލިބުނު އާއިލާ އަށް އެ ރަށު ކައުންސިލުން އިއްޔެ މާލީ އެހީތެރިކަން ދީފި އެވެ.

މިދިޔަ އާދިއްތަ ދުވަހުގެ މެންދުރު 11:30 ހާއިރު ގުލްޝަނީހިޔާގައި އަލިފާން ރޯވެ އެއް ކޮޓަރީގެ އެ ގެއަށް ބޮޑެތި ގެއްލުންތަކެއް ލިބިފައި ވެ އެވެ. ކޮޓަރީގައި ހުރި ފަރުނީޗަރާއި އަންނައުނުތަކާއެކު ފައިސާ ރައްކާކޮށްފައި ހުރި ގޮދަޑި ވެސް އެއްކޮށް އަނދައިގެން ދިޔަ އެވެ.

އާއިލާގެ އެހެން މީހަކަށް ލިބިފައިވާ ބޮޑު ބިމެއްގައި އިމާރާތް ކޮށްފައިވާ އެ ކޮޓަރީގައި އުޅެމުން ދިޔައީ ދެމަފިރިއަކާއި އެ މީހުންގެ ކުޑަ ދެ ފިރިހެން ކުދިންނެވެ.

ތުޅާދޫ ކައުންސިލްގެ ރައީސް އިބްރާހިމް އާދިލް މިރޭ ވިދާޅުވީ، ކައުންސިލް މެމްބަރުންނާއި މުވައްޒަފުން އަދި އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ މެމްބަރުން ގުޅިގެން އެ އާއިލާ އަށް އެހީ ދިނުމަށް ކުރި ކަންތައްތަކުން މިހާތަނަށް ލިބުނު 12،100ރ. އެ އާއިލާއާ ހަވާލުކޮށްފައިވާ ކަމަށް އޭނާ ވިދާޅުވި އެވެ.

އެ ގެއަށް ލިބުނު ގެއްލުންތައް ޑިޒާސްޓާ މެނޭޖްމަންޓް އޮތޯރިޓީއާ ހިއްސާ ކޮށްފައިވާ ކަމަށް ވެސް އާދިލް ވިދާޅުވި އެވެ.

"ބެލެވެނީ އެ އޮތޯރިޓީން އާއިލާއާ ގުޅައިގެން ދެން ކުރިއަށް ދާނެ ކަމަށް،" އާދިލް ވިދާޅުވި އެވެ.

އޭނާ ވިދާޅުވީ، އެ ކުޑަ އާއިލާ އަށް ގޮތެއް ފެންނަން ދެން އެ މީހުން ދިރިއުޅުމަށް އެ ރަށުގެ ދެ މީހަކު، އެ ދެ މީހުންގެ ގެއިން ދެ ކޮޓަރި ހަމަޖެއްސި ކަމަށެވެ. ނަމަވެސް އެ މީހުން މި ވަގުތު ދިރިއުޅެމުން އަންނަނީ އާއިލާގެ މީހެއްގެ ގޭގަ އެވެ.

އަލިފާން ރޯވި ގޭގައި ދިރިއުޅުނު އަންހެން މީހާގެ ބޭބެ މުހައްމަދު މުމްތާޒު "މިހާރު" އަށް ކުރިން ބުނީ ރޯވީ، ފްރިޖުގައި ކަރަންޓު ޝޯޓެއް ވެގެން ކަމަށް ބެލެވޭ ކަމަށެވެ.

"ފްރިޖު މަތީގައި އަވަން މި އިންނަނީ. އެ ތަނުގެ މަތީގަ ސޮކެޓް. ފްރިޖް ކޭބަލްގައި ޝޯޓެއް ވި ކަމަށް ބެލެވެނީ. ފްރިޖު ކައިރީ މި ހުންނަނީ ގޮދަޑި ވެސް. ދެން އެހެންވީމާ އެ ތަނުގައި އެހާ ބޮޑަށް ރޯވި ކަމަށް މި ބެލެވެނީ،" މުމްތާޒް ކިޔައިދިނެވެ.

ގާތްގަނޑަކަށް 45 މިނެޓު ފަހުން އަލިފާންގަނޑު ކޮންޓްރޯލް ކުރެވުނުއިރު އެ ތަނުން ސަލާމަތް ކުރެވުނީ ދެމަފިރިންގެ ދެތިން އަންނައުނާއި ދަރިފުޅުގެ ސްކޫލު ޓެބާއި މި އަހަރު ދޫކުރި ފޮތްތައް ފަދަ މަދު އެއްޗެކެވެ. އެކަމަކު ކުރީގެ ފޮތްތަކާއި ގޭގައި ގެންގުޅޭ ހުރިހާ ފަރުނީޗަރަކާއި އިލެކްޓްރޯނިކް ހުރިހާ ސާމާނެއް އަނދައި އަޅިއަށްވީ އެވެ.