އޭސީގައި ރޯވެ އެޕާޓްމެންޓަކަށް ގެއްލުންތަކެއް، އެކަކަށް ބޯހިޔާވަހިކަން ފޯރުކޮށްދީފި

މާލޭގެ އެޕާޓްމެންޓެއްގައި އޭސީ އައުޓްޑޯ ޔުނިޓްގައި ރޯވެ، އެޕާޓްމެންޓަށް ލިބުނު ގެއްލުންތަކާ ގުޅިގެން އެކަކަށް ފަސް ދުވަހަށް ބޯހިޔާވަހިކަން ފޯރުކޮށްދޭން ނިންމައިފި އެވެ.

އެމްއެންޑީއެފުން ބުނީ މ. އަފްޒާ ގޭގެ ހަވަނަ ފްލޯގައި ހުރި އެޕާޓްމަންޓެއްގެ ބެލްކަނީގެ އޭސީ އައުޓްޑޯ ޔުނިޓުގައި އަލިފާން ރޯވި ކަމުގެ ރިޕޯޓު ލިބުނީ މިއަދު ހެނދުނު 7:40 ހާއިރެވެ. އަދި ފަޔާ އެންޑް ރެސްކިއު ޓީމުން އެ ސަރަހައްދަށް ގޮސް، 8 ޖަހާކަށް ހާއިރު އަލިފާންގަނޑު ވަނީ ނިއްވާލާފައި ކަމަށް ވެސް އެމްއެންޑީއެފުން ބުންޏެވެ.

އެ ހާދިސާގައި އެއްވެސް މީހަކަށް އަނިޔާއެއް ނުލިބެ އެވެ. އެކަމަކު އެ އެޕާޓްމަންޓް ތެރެއަށް އަލިފާން ފެތުރި އެކިވަރުގެ ގެއްލުން އެތަނަށް ލިބިފައިވާ ކަމަށް އެ އިދާރާ އިން ބުނެ އެވެ.

އެ ހާދިސާއާ ގުޅިގެން ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނީ އެ އަލިފާނުގެ ހާދިސާގެ މައްސަލަ އެ އޮތޯރިޓީން ވެސް ބަލަމުން އަންނަ ކަމަށެވެ. އަދި ދުމާއި އަލިފާނުގެ ސަބަބުން އެޕާޓްމަންޓަށް ގެއްލުން ލިބިފައިވާތީ، އެތަނުގައި އުޅޭ އަންހެނަކަށް ފަސް ދުވަހުގެ މުއްދަތަކަށް ވަގުތީ ބޯހިޔާވަހިކަމާއި ކެއިންބުއިމުގެ ހަރަދުތައް ހަމަޖައްސައިދީފައިވާ ކަމަށް އެންޑީއެމްއޭ އިން ބުންޏެެވެ.

އެ އިދާރާ އިން ހިއްސާކޮށްފައިވާ ފޮޓޯތަކުން ފެންނަ ގޮތުގައި ވެސް އަލިފާނުގެ އަސަރުކޮށް ބަދިގެ ކަބަޑާއި މޭޒު ފަދަ ތަކެއްޗަށް ގެއްލުންވެފައިވެ އެވެ.