ޓިނު ބިލްޑިންގުގެ އަލިފާނުގެ ހާދިސާ: ވަގުތީ ހިޔާތަކުގައި އަދިވެސް 22 މީހަކު އެބަތިބި

ސަރުކާރުގެ މުހިންމު މިނިސްޓްރީތަކެއް ހިންގަމުން އައި ޓިނު ބިލްޑިންގާއި ގްރީން ބިލްޑިންގުގައި މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި ގެއްލުން ލިބުނު ގެތަކުގެ 22 މީހުން އަދިވެސް ވަގުތީ ހިޔާތަކުގައި އެބަތިބި ކަމަށް ނޭޝަނަލް ޑިޒާސްޓާ މެނޭޖްމެންޓް (އެންޑީއެމްއޭ) އިން މިއަދު ބުނެފި އެވެ.

ބުރާސްފަތި ދުވަހުގެ ހެނދުނު 6:30 ހާއިރު ހައުސިން މިނިސްޓްރީގައި ރޯވި އަލިފާންގަނޑު، އެ އިމާރާތުގައި ހިންގާ ކޮންސްޓްރަކްޝަން މިނިސްޓްރީ އަދި ޖެހިގެން ހުރި ގްރީން ބިލްޑިންގުގައި ހުންނަ އެންވަޔަރަންމެންޓް މިނިސްޓްރީ އަށް ފެތުރި ބޮޑު އަލިފާނުގެ ހާދިސާއަކަށް ބަދަލުވީ އެވެ. ހަތަރު ގަޑިއިރު ފަހުން އަލިފާން ނިއްވާލިއިރު މުޅި ތަން ބޭނުން ނުކުރެވޭ ވަރަށް ވަނީ އަނދައި ހުލިވެފަ އެވެ.

އެ ދެ ބިލްޑިންގް ކައިރިން އަމީނީ މަގުގައި ހުރި ގެތަކަށް ދުމުގެ އަސަރުކޮށް އަދި ގެއްލުން ވެސް ލިބިފައިވާއިރު، މ. ލޯކަށިގެ އާއި މ. ކުދިމާވިލާ އަދި މ. ލޫބިޔާ އިން މީހުން ހުސްކޮށް 50 މީހުން ވަގުތީ ހިޔާތަކަށް ބަދަލުކުރި އެވެ.

އެންޑީއެމްއޭގެ މީޑިއާ އޮފިޝަލަކު "މިހާރު" އަށް ވިދާޅުވީ އެ ދުވަހު ވަގުތީ ހިޔާތަކަށް ބަދަލުކުރި މީހުންގެ ތެރެއިން 22 މީހަކު އަދިވެސް ތިބީ އެ ތަންތަނުގައި ކަމަށެވެ.

އޭގެ ތެރެއިން ބައެއް މީހުން ތިބުމަށް އެންޑީއެމްއިން ގެސްޓް ހައުސް ހަމަޖައްސައިދީފައި ވާނެ ކަމަށާއި އަނެއްބައި މީހުން ބޭނުން ތަނެއްގައި ތިބުމަށް ފައިސާ ދީފައިވާނެ ކަމަށް އޭނާ ވިދާޅުވި އެވެ.

ވަގުތީ ހިޔާތަކުގައި މިހާރު ތިބީ މ. ލޯކަށިގޭގެ ފަސް އެޕާޓްމަންޓުގައި ދިރިއުޅޭ މީހުންނެވެ.

"އެ ގޭގެ ވެސް އެޕާޓްމަންޓުގެ ކުޑަދޮރުގެ ބިއްލޫރިތައް ތަޅައިގެން ގޮސް، ބައެއް އެޕާޓްމަންޓުގައި ހިފައިގެންގުޅޭ ތަކެއްޗަށް ވެސް ވަރަށް ބޮޑަށް ގެއްލުން ވެފައި ހުރީ. އަޅުގަނޑުމެން އެ ތަން މަރާމާތު ކުރުމަށް ގޭގެ ވެރިފަރާތަށް ފައިސާދިނީ، ގެ އަށް ބޭނުންވާ ސާމާނު ފޯރުކޮށް ދެވުނީމާ އެ މީހުން ބަދަލުވާނީ،" އެންޑީއެމްއޭގެ އޮފިޝަލު ވިދާޅުވި އެވެ.

އޭނާ ވިދާޅުވިގޮތުގައި، އެ ގޭގެ މީހުން ބަދަލުބާން ހަފުތާއެއްހާ ދުވަސް ނަގާނެ އެވެ.

އަލިފާނުގެ ހާދިސާގައި ގްރީން ބިލްޑިންގް ހުންނަ ކޮށީގައި ހުރި އޮފީސް ހަތަރު އިމާރާތް އެނދި އެވެ. އެ އިމާރާތުގައި ހިންގަމުން އައި ތިން މިނިސްޓްރީގެ ހިދުމަތް މިހާރު ވަނީ ދަރުބާރުގެއަށް ބަދަލުކޮށް މަސައްކަތްތައް ފަށައިފަ އެވެ. ސިޓީ ކައުންސިލްގެ ވައިޓަލް ރެޖިސްޓްރޭޝަންގެ އޮފީސް ވެސް ހިންގަމުން ދިޔައީ ރޯވި އިމާރާތުގަ އެވެ. އެ އޮފީހުގެ މަސައްކަތްތައް ވަނީ ހުޅުމާލެ އަށް ބަދަލު ކޮށްފަ އެވެ.