ހަތަރު މަސް ފަހުން ނައިފަރުގައި ކޮވިޑް ފެތުރުން ކޮންޓްރޯލްކޮށް، އާންމު ހާލަތަށް ގެންނަނީ

މިދިޔަ މެއި މަހު މޮނިޓަރިންގެ ހާލަތަށް ގެނައި ޅ. ނައިފަރުގައި ކޮވިޑް ފެތުރުން މިހާރު ކޮންޓްރޯލް ކުރެވިފައިވާތީ އެ ރަށް ހުޅުވައިލުމަށްޓަކައި ރެންޑަމް ސާމްޕަލް ނަގަން އަނެއްކާވެސް ފަށައިފި އެވެ.

އާބާދީގައި 6،000 އާ ގާތްކުރާ އަދަދަކަށް މީހުން ދިރިއުޅޭ ނައިފަރުގައި ކޮވިޑްގެ ކޮމިއުނިޓީ ސްޕްރެޑެއް އޮތުމުން އެ ރަށަށް އަރައިފޭބުން އެޗްޕީއޭ އިން މަނާކުރީ މެއި 23 ގަ އެވެ.

ނައިފަރުން ކޮވިޑް ޖެހުނު 900 އަށް ވުރެ ގިނަ މީހުން އެ ބަލިން ރަނގަޅުވުމާ އެކު، އެ ރަށް އާންމު ހާލަތަށް ގެނައުމަށް މިދިޔަ މަހުގެ ކުރީކޮޅު 317 ރެންޑަމް ސާމްޕަލެއް ނެގި އެވެ. އެކަމަކު އޭގެ ތެރެއިން ދެ މީހަކު ޕޮޒިޓިވްވެ، އެ ފަހަރު ވެސް އާންމު ހާލަތަކަށް ނުގެންދެވުނެވެ.

ކައުންސިލްގެ މެމްބަރު އަހުމަދު ޝިފާއު، "މިހާރު" އަށް ވިދާޅުވި ގޮތުގައި އެ ފަހަރު އެޗްޕީއޭ އިން އެންގީ އެންމެ ފަހުން ކޮވިޑަށް ޕޮޒިޓިވްވި ސާމްޕަލްގެ ރަނގަޅުވާތާ 14 ދުވަހުގެ ތެރޭގައި އަލުން ރެންޑަމް ސާމްޕަލް ނެގުމަށެވެ. އެކަމަކު އެ ފަހަރު ވެސް ސާމްޕަލް ނަގަނިކޮށް، ފެލިވަރަށް ވަޒީފާ އަށް ދާން އުޅުނު މީހެއްގެ ސާމްޕަލް ޕޮޒިޓިވްވެ، ރަށް އާންމު ހާލަތަށް ގެންދެވޭ ގޮތެއް ނުވި އެވެ.

އޭގެ ފަހުން އެޗްޕީއޭ އިން ވަނީ ރެންޑަމް 100 ސާމްޕަލެއް ނެގުމަށް އަންގައިފަ އެވެ. އަދި އެ ހުރިހާ ސާމްޕަލެއް ނެގެޓިވް ވެއްޖެ ނަމަ، ރަށުގެ މޮނިޓަރިން އުވައިލެވިދާނެ ކަމަށް އަންގާފައިވާ ކަމަށް ޝިފާއު ވިދާޅުވި އެވެ.

"މޮނިޓަރިން އަށް ލި ފަހުން ޖުމުލަ 5،233 ސާމްޕަލް އެބައިން ނަގާފައި. މިހާރު ކުރަމުން މި ދަނީ ރެންޑަމް ސާމްޕަލް ނެގުމުގެ މަސައްކަތް. ޖުމުލަ 85 ސާމްޕަލް ނަގާފައިވޭ. މިއަދު ހަވީރު ވެސް ސާމްޕަލް ނެގުމުގެ މަސައްކަތް ކުރިއަށް ދާނެ،" ޝިފާއު ވިދާޅުވި އެވެ.

ކޮވިޑް ފެތުރޭތީ މޮނިޓަރިން އަށް ލީ ރަށްތަކުގެ ލިސްޓުން ނައިފަރަކީ އެންމެ ގިނަ ދުވަހު އެ ލިސްޓުގައި އޮތް ރަށެވެ. އެ ރަށުން މިހާތަނަށް ޖުމުލަ 921 މީހަކަށް ބަލި ޖެހުނުއިރު، ބަލިން ރަނގަޅުވި މީހުންގެ އަދަދު 914 އަށް އަރަ އެވެ. އަދި ބަލީގައި އެ ރަށުން ހަތަރު މީހަކު މަރުވެފައިވާއިރު، މިހާރު ބަލިން ރަނގަޅު ނުވެ ތިބީ އެންމެ ތިން މީހެކެވެ. އެއީ ވެސް ހޯމް ކަރަންޓީނުގައި ތިއްބާ ބަލި ޖެހުނު މީހުންނެވެ.

ކޮމިއުނިޓީ ސްޕްރެޑާ ގުޅިގެން އަރައިފޭބުން މަނާކުރުމުގެ ކުރިން ނައިފަރަކީ ޅ. އަތޮޅުގެ ގިނަ ބަޔަކު ސިއްހީ އަދި ވިޔަފާރީގެ ބޭނުންތަކަށް ކޮންމެ ދުވަހަކު ވެސް ދަތުރުކުރާ ރަށެކެވެ.

އަތޮޅު ހޮސްޕިޓަލު ވެސް ހުންނަނީ އެ ރަށުގައި ކަމުން، ސިއްހީ ހިދުމަތަށް ވެސް އަތޮޅުގެ ގިނަ ބަޔަކު ބަރޯސާވެފައި އޮތީ ނައިފަރަށެވެ. އެކަމަކު ކޮވިޑުން ރައްކާތެރިވުމަށް އެޅި ވަރުގަދަ ފިޔަވަޅުތަކާ އެކު ނައިފަރުގެ ރައްޔިތުންނެކޭ އެއްގޮތަށް އެކި ބޭނުންތަކަށް ދަތުރުކުރާ މީހުންނަށް ވެސް ދަތިތައް ކުރިމަތިވި އެވެ.

ޝިފާއު ވިދާޅުވި ގޮތުގައި ކޮވިޑާ ގުޅިގެން ނައިފަރަށް އަރައިފޭބުން މަނާކުރުމާ އެކު ކާފިއު ވެސް ހިންގި އެވެ. ކެފޭ/ ރެސްޓޯރަންޓުތައް ވެސް ބަންދުކޮށް، ފުލުހުން މަގުތަކަށް ނުކުމެ ފިޔަވަޅުތައް ތަންފީޒުކުރި އެވެ.

އެކަމަކު ރަށުގެ ހާލަތު ރަނގަޅުވަމުންދާތީ މިހާރު ރަށުތެރެ އޮތީ ހުޅުވާލާފައި ކަމަށް ޝިފާއު ވިދާޅުވި އެވެ. އޭނާ ވިދާޅުވި ގޮތުން ނަމަ، މި ވަގުތަށް މަނަލީ ރަށަށް އަރައިފޭބުން އެކަންޏެވެ. އެކަމަކު ކައުންސިލްގެ ހުއްދަ ލިބުމުން ޗުއްޓީ އަށް ރަށަށް ވެސް ދެވޭނެ އެވެ. އަދި މަސްވެރިން މަހަށް ވެސް ގޮސް ހަދަ އެވެ.

ހަތަރު މަސް ފަހުން ނައިފަރު މޮނިޓަރިންގެ ހާލަތުން ނަގަން ތައްޔާރުވަމުން އަންނައިރު އެ ރަށުން މިހާތަނަށް 2،869 މީހަކު ވެކްސިންގެ ފުރަތަމަ ޑޯޒް ޖަހާފައިވެ އެވެ. އަދި އިއްޔެގެ ނިޔަލަށް ދެވަނަ ޑޯޒް ފުރިހަމަކުރި މީހުންގެ އަދަދު 856 އަށް އަރަ އެވެ.