އޯޑިއޯން އާއި ނާދީ ހުރި ބިން ހުޅުވައިދޭން ސިޓީ ކައުންސިލުން އެދިއްޖެ

ކުރީގެ އޯޑިއޯން ސިނަމާ ހުރި ބިމާއި ކުރީގެ ނާދީ ހުރި ބިން ސާފުކޮށް އެ ދެ ތަން ހުޅުވާލައިދޭން މާލޭ ސިޓީ ކައުންސިލުން އެދިއްޖެ އެވެ.

އެ ކައުންސިލްގެ އޮފިޝަލަކު ވިދާޅުވީ ފްލެޓު އަޅަން ކުރީގެ ރައީސް މުހައްމަދު ނަޝީދުގެ ސަރުކާރުން އިންޑިއާގެ ޓާޓާ ކުންފުންޏާ ހަވާލުކުރި އޯޑިއޯން އަދި ނާދީ ހުރި ބިމުން ކުންޏާއި މަދިރީގެ އުނދަގޫ ދިމާވާ ކަމުގެ ޝަކުވާތައް އާއްމުންގެ ފަރާތުން ލިބޭ ކަމަށެވެ. އެއާއެކު، އެ ތަންތަނުގައި ނޭދެވޭ އަމަލުތައް ހިންގަމުންދާތީ ބަންދުކުރަން ޖަހާފައިވާ ބިއްގަނޑު ނަގައި ސާފުކޮށް ހުޅުވާލައިދިނުމަށް މިދިޔަ ބުދަ ދުވަހު ޕްލޭނިން މިނިސްޓްރީގައި އެދިފައިވެ އެވެ.

ނަމަވެސް އެ ސިޓީއަށް އަދި ޖަވާބު ދީފައި ނުވާ ކަމަށް ސިޓީ ކައުންސިލުން ބުނެ އެވެ

އެމްޑީޕީގެ ސަރުކާރުން ޓާޓާ ކުންފުންޏާ އެކު ހެދި އެއްބަސްވުމުގެ ދަށުން ކުރީގެ ގާކޮއްޓާއި އަރަބިއްޔާގައި ސޯޝަލް ހައުސިންގެ 280 ފްލެޓު އަޅަން ޖެހެ އެވެ. އޯޑިއޯން އާއި ނާދީ ހުރި ބިން ދިނީ އޭގެ ބަދަލެއްގެ ގޮތުން މަތީ ފެންވަރުގެ ފްލެޓް އަޅައި ވިއްކުމަށެވެ. ނަމަވެސް މިހާތަނަށް އައިއިރު ވެސް ފްލެޓުގެ ބިންގާ އެޅުން ފިޔަވައި އިތުރު އެއްވެސް މަސައްކަތެއް ކޮށްފައެއް ނުވެ އެވެ.

އެއްބަސްވުމުގެ ދަށުން، ރިސޯޓް ހަދަން ޅ. ޅޮއްސަލަފުށި ވެސް ޓާޓާ އަށް ދިނެވެ. އެކަމަކު މަސައްކަތް ފަށަން ދިން މުއްދަތުގައި ނުފެށި ކަމަށް ބުނެ އެއްބަސްވުން ބާތިލުކުރަން އޭޕްރީލް، 2017 ގައި ނިންމި އެވެ.

ސިޓީ ކައުންސިލްގެ އޮފިޝަލަކު ވިދާޅުވީ 10 ދުވަސްތެރޭގައި އޯޑިއޯން އާއި ނާދީ ބިން ސާފުކޮށް އެ ތަން ހުޅުވައިދޭން އެދިފައިވާ ކަމަށެވެ. އެ މުއްދަތުގެ ތެރޭގައި ޕްލޭނިން މިނިސްޓްރީން އެކަން ނުކޮށްފި ނަމަ، ސިޓީ ކައުންސިލުން އިސްވެ އެ އެ ދެ ބިން ސާފުކުރުމަށް ފަހު ހުޅުވާލާނެ ކަމަށް އޭނާ ވިދާޅުވި އެވެ.

އިމާރާތްކުރަން ޖެހޭ ފްލެޓްތަކުގެ މަސައްކަތް، ކަނޑައަޅާފައިވާ މުއްދަތުގައި ނުފެށުމުން ދިވެހި ސަރުކާރުން އެ އެއްބަސްވުން ބާތިލްކުރި އެވެ. އެހެންވެ، ގެއްލުމުގެ ބަދަލުގެ ގޮތުގައި 200 މިލިއަން ޑޮލަރު ހޯދަން އިންޑިއާގެ މުމްބާއީގެ އާބިޓްރޭޝަން ސެންޓަރަށް ޓާޓާ ކުންފުނިން ހުށަހެޅި އެވެ. އެކަމަކު އެ ބޮޑު ބަދަލު ދޭން ޖެހިދާނެތީ ސަރުކާރުން އަލުން އެއްބަސްވުން ހެދުމަށް ފަހު މަސައްކަތް ހަވާލުކުރި އެވެ.