ކެނެރީގެ ހުންނަ މަގުގައި ޕާކް ކުރުން މަނާ ނުކުރެވުނީ ޕްލޭނިން މިނިސްޓްރީގެ ސަބަބުން: ސިޓީ ކައުންސިލް

ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދިރިއުޅުއްވާ ގ. ކެނެރީގެ ހުންނަ މަގުގައި ސައިިކަލު ޕާކްކުރުން މަނާ ނުކުރެވި އޮތީ ޕްލޭނިން މިނިސްޓްރީގެ ސަބަބުން ކަމަށް މާލޭ ސިޓީ ކައުންސިލުން މިރޭ ބުނެފި އެވެ.

ކެނެރީގެ ހުންނަ ނީލޯފަރު ހިނގުމުގައި ޕާކް ކޮށްފައި ހުރި ސައިކަލެއްގައި މި މަހުގެ ހަ ވަނަ ދުވަހުގެ ރޭ އެއްޗެއް ގޮއްވާލައި، ނަޝީދު އަވަހާރަ ކޮށްލަން ބަޔަކު ވަނީ މަސައްކަތް ކޮށްފަ އެވެ. އެ މަނިކުފާނާއި އިތުރު ބަޔަކަށް އެ ހަމަލާގައި އަނިޔާވިއިރު، ނަޝީދު މިހާރު ގެންދަވަނީ ޖަރުމަނުގެ މިލިޓަރީ ހޮސްޕިޓަލެއްގައި އިތުރު ފަރުވާ ހޯއްދަވަމުންނެވެ.

ނަޝީދަށް ދިން ޓެރަރިސްޓް ހަމަލައާ އެކު، ފެންމަތިވި އެއް މައްސަލަ އަކީ ނީލޯފަރު ހިނގުމުގެ އެއް ފަޅީގައި ސައިކަލްތައް ޕާކް ކޮށްފައި ހުރުމުން އެ މަނިކުފާނަށް ސެކިއުރިޓީ ފޯރުކޮށްދިނުމަށް ދަތިވެފައި އޮތް އޮތުމެވެ. އެ ހާދިސާގެ ކުރިން ވެސް ޑިފެންސް މިނިސްޓްރީން އޮތީ އެ މަގުގައި ސައިކަލު ޕާކް ކުރުން މަނާކުރަން ސިޓީ ކައުންސިލްގައި އެދިފަ އެވެ.

އެކަމާ ގުޅިގެން ސިޓީ ކައުންސިލުން މިރޭ ނެރުނު ބަޔާނުގައިވަނީ ޑިފެންސް މިނިސްޓްރީން އެގޮތަށް އެދުމުން ސައިކަލުތައް ޕާކްކުރާނެ އެހެން ޖާގައެއް ހަމަޖައްސަން ޕްލޭނިން މިނިސްޓްރީގައި އެ ކައުންސިލުން ލިޔުމުން އެދިފައިވާނެ ކަމަށެވެ. އެގޮތުން ބިއްލޫރިޖެހިގެއާ އިންވެގެން އޮތް ބިމުގައި ޕާކިން ޒޯނެއް ހެދުމަށް އެ ބިން ހަވާލުކޮށްދޭން ޕްލޭނިން މިނިސްޓްރީ އާއި ޕްލޭނިން މިނިސްޓަރު މުހައްމަދު އަސްލަމްގެ އަރިހުގައި އެކި ފަހަރު މަތިން އެދިފައިވާނެ ކަމަށް އެ ބަޔާނުގައިވެ އެވެ.

މަޖީދީ މަގުން ދައުލަތަށް ލިބިފައި ހުރި އެހެން ބިމެއްގައި ވެސް ޕާކިން ޒޯން ހެދުމަށްޓަކައި އެ ބިން ހަވާލުކުރަން ޕްލޭނިން މިނިސްޓްރީގައި އެދުނު ކަމަށާއި އެގޮތަށް އެކަން ކޮށްދޭން މިނިސްޓަރު އަސްލަމްގެ އަރިހުގައި ނަޝީދު ވެސް އެދިވަޑައިގަތް ކަމަށް އެ ބަޔާނުގައިވެ އެވެ. އެހެންވެ، ނީލޯފަރު ހިނގުމުގައި ޕާކް ކުރުން މަނާ ނުކުރެވުނީ ޕްލޭނިން މިނިސްޓްރީގެ އެއްބާރުލުން ނުލިބުމުން ކަމަށް ސިޓީ ކައުންސިލުން ބުނެ އެވެ.

"ވެހިކަލް ޕާކް ނުކުރެވޭ މަގަކަށް ހެދިފައި ނުވަނީ ޕާކިން ޖާގަ ހެދުމަށްޓަކައި ގ. ބިއްލޫރިޖެހިގެ ނުވަތަ އެ ސަރަހައްދުން ވެށިފަހި މާލެ ޕްރޮޮގްރާމްގެ ދަށުން ސަރުކާރަށް ލިބުނު ފޭދޫކޮށި މިިނިސްޓްރީ އޮފް ނެޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާގެ އިން މާލޭ ސިޓީ ކައުންސިލާ ހަވާލު ކޮށްފައި ނުވާތީ އާއި އެކަމުގައި އެ މިނިސްޓްރީއިން އެކަށީގެންވާ ގޮތެއްގައި އެއްބާރުލުން ދީފައި ނުވާތީ.." އެ ބަޔާނުގައިވެ އެވެ.