ކެނެރީގޭ ގޯޅި ތެރޭގައި ޕާކު ނުކުރެވޭ ގޮތް ހަދައި، ބިއްލޫރިޖެހިގޭގައި ޕާކިން ޒޯން ހަދަން ފަށައިފި

ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދިރިއުޅުއްވާ ގ. ކެނެރީގެ ހުންނަ ނީލޯފަރު ހިނގުމުގައި ޕާކް ނުކުރެވޭ ގޮތް ހަދަައި އެ ތަނުގެ ބަދަލުގައި ބިއްލޫރިޖެހިގޭގައި ޕާކިޒް ޒޯން ހެދުމުގެ މަސައްކަތް މާލޭ ސިޓީ ކައުންސިލުން ފަށައިފި އެވެ.

މި މަސައްކަތް ފަށާފައި މި ވަނީ ނަޝީދުގެ ސެކިއުރިޓީ ބޭނުމަށް، ނީލޯފަރު މަގު ޕާކިން ޒޯން ނަގަން ޖެހޭތީ ބިއްލޫރިޖެހިގޭގައި ޕާކިން ޒޯން ހެދުމުގެ ހުއްދަ އަށް އެދި އެކަން ހަމަނުޖެހި އޮއްވައި ނަޝީދަށް އަމާޒުކޮށް އެ ހިސާބުގައި ޓެރަރިސްޓް ހަމަލާއެއް ދީފައި ވަނިކޮށެވެ.

މާލެގެ މޭޔަރު ޝިފާ މުހައްމަދު މިއަދު ވިދާޅުވީ، ބިއްލޫރިޖެހިގޭގައި ޕާކިން ޒޯނު ހެދުމުގެ މަސައްކަތް ފެށީ ޕްލޭނިން މިނިސްޓަރު މުހައްމަދު އަސްލަމް ހުއްދަ ދެއްވުމުން ކަމަށެވެ.

އޭނާ ވިދާޅުވީ އެ ތަނުގައި ހުރި ކާރުތައް ނެގުމަށް ފުލުހުންނަށް އަންގައި ކޮށި ހުސްކުރުމުގެ މަސައްކަތް ކުރަމުން އަންނަކަމަށެވެ. ހުސްވަމުންދާ ވަރަކަށް ސައިކަލް ޕާކްކުރުމަށް ހާއްސަކޮށްފައިވާ އެ ޒޯނުގެ މަސައްކަތް ކުރަމުން އަންނަ ކަމަށް ވެސް ވިދާޅުވި އެވެ.

އެ ތަނުގައި ސަރުކާރާއި އަމިއްލަ މީހުންގެ ކާރުތައް ވެސް ޕާކްކޮށްފައި ހުއްޓެވެ.

މިދިޔަ ބުރާސްފަތި ދުވަހު ނަޝީދަށް އަމާޒުކޮށް ދިން ޓެރަރިސްޓް ހަމަލާ އަށް ފަހު ވަނީ ނީލޯފަރު ގޯޅި ހުސްކުރުމާ ގުޅޭގޮތުން މާލެ ސިޓީ ކައުންސިލުން މާޗު 23، 2021 ގައި ޕްލޭނިން މިނިސްޓްރީ އަށް ފޮނުވި ސިޓީއެއް ވެސް ލީކްވެފައި ވެ އެވެ.

އެ ސިޓީގައި އެދިފައިވަނީ ނީލޯފަރު ގޯޅި ހުސްކޮށް ބިއްލޫރިޖެހިގޭގައި ޕާކިން ޒޯނެއް ހެދުމުގެ ހުއްދައަށް އެދި އެވެ. ނަމަވެސް ސިޓީ ކައުންސިލާއެކު މިދިޔަ އޮގަސްޓް މަހު ބޭއްވި ބައްދަލުވުމުގައި ޕްލޭނިން މިނިސްޓްރީން ވަނީ އެ ތަނުގައި ޕާކިން ޒޯނެއް ހެދުމަށް ނިންމައިފަ އެވެ.

ކެނެރީގެއިން ނުކުމެވަޑައިގެން މަޖީދީމަގު ކަންމަތީގައި އޮތް ކާރުކޮޅަށް އަރައިވަޑައިގަންނަވަނިކޮށް ނަޝީދަށް އަމާޒުވި ހަމަލާގައި ލިބިވަޑައިގެންނެވި ޒަހަމްތަކަށް އޭޑީކޭ ހޮސްޕިޓަލުގައި ގެންދަވަނީ ފަރުވާ ހޯއްދަވަމުންނެވެ.

ނަޝީދު މިހާރު ދިރިއުޅުއްވާ ކެނެރީގެ ހުންނަ ގޯޅި ވަރަށް ހަނިވެފައި އެއް ފަރާތުގައި ސައިކަލްތައް ޕާކުކޮށްފައި ހުރުމުން، ހަތަރު ފުރޮޅުލީ އުޅަނދުތަކަށް އެ ގޯޅިއަކަށް ނުވަދެވެ އެވެ. އެހެންވެ ނަޝީދުގެ ކާރުކޮޅު ވެސް އާންމުކޮށް ޕާކް ކޮށްފައި އޮންނަނީ ކެނެރީގެ ހުންނަ ގޯޅިން މަޖީދީމަގާ ވީ ފަރާތުން އެ ގޯޅީގެ ކަންމަތީގަ އެވެ.

ބިއްލޫރިޖެހިގެ އަކީ މޯލްޑިވްސް ކުރިން ނެޝަނަލް ލައިބްރަރީ އަދި މިހާރު މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަނާއި ޖެންޑާ މިނިސްޓްރީ ހުންނަ ބިމުގެ ސަރަހައްދެވެ.