ކެނެރީގެ ހުންނަ ގޯޅި ހުސްކުރަން ކުރިން ވެސް އޮތީ ނިންމައިފައި: އަސްލަމް

ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް ސެކިއުރިޓީ ދޭން އުނދަގޫވާތީ، އެ މަނިކުފާނު ދިރިއުޅުއްވާ ނީލޯފަރު ގޯޅި ހުސްކޮށް ބިއްލޫރިޖެހިގެއިން ޕާކިން ޒޯނެއް ހެދުމަށް ކުރިން ވެސް އޮތީ ނިންމައިފައި ކަމަށް ޕްލޭނިން މިނިސްޓަރު މުހައްމަދު އަސްލަމް ރޭ ވިދާޅުވެއްޖެ އެވެ.

ނަޝީދަށް އަމާޒުކޮށް މިދިޔަ ބުރާސްފަތި ދުވަހުގެ ރޭ ޓެރަރިސްޓް ހަމަލާއެއް ދިނީ އެ މަނިކުފާގެ ގެކޮޅު، ގ. ކެނެރީގެއިން ނުކުމެވަޑައިގެން މަޖީދީމަގު ކަންމަތީގައި އޮތް ކާރުކޮޅަށް އަރައިވަޑައިގަންނަވަނިކޮށެވެ. އެ ހާދިސާގައި ނަޝީދަށް ލިބިވަޑައިގެންނެވި ބޮޑެތި ޒަހަމްތަކަށް އޭޑީކޭ ހޮސްޕިޓަލުގައި ގެންދަވަނީ ފަރުވާ ހޯއްދަވަމުންނެވެ.

އެ ހާދިސާ ހިނގުމާއެކު، ކެނެރީގެ ހުންނަ ނީލޯފަރު ގޯޅި ހުސްކުރުމާ ގުޅޭގޮތުން މާލެ ސިޓީ ކައުންސިލުން މާޗު 23، 2021 ގައި ޕްލޭނިން މިނިސްޓްރީ އަށް ފޮނުވި ސިޓީއެއް ވެސް ލީކްވެފައި ވެ އެވެ.

އެކަމާ ގުޅިގެން މިނިސްޓަރު "މިހާރު" އަށް ވިދާޅުވީ ސިޓީ ކައުންސިލުން ފޮނުވި ސިޓީ ސީދާ އޭނާގެ އަތްޕުޅަށް ލިބިވަޑައިގެންފައި ނުވާ ކަމަށެވެ. އަދި، މާޗު 23 ގައި ސިޓީ ކައުންސިލުން ފޮނުވި ސިޓީ އަށް އޮތީ ޖަވާބެއް ނުދީ ކަމަށާއި ނަމަވެސް އެ ގޯޅި ހުސްކޮށް ބިއްލޫރިޖެހިގޭގެ ފުރަގަހުގައި އޮތް ޖާގައިގައި ޕާކިން ޒޯނެއް ހެދުމަށް އޮތީ ނިންމައިފައި ކަމަށް އޭނާ ވިދާޅުވި އެވެ.

"އޮގަސްޓް 18، 2020 ގައި ސިޓީ ކައުންސިލާ އެކު އަޅުގަނޑުމެން ބޭއްވި ބައްދަލުވުމެއްގައި މިނިސްޓްރީގެ ޑެޕިއުޓީ މިނިސްޓަރަކު ވެސް އިންނަވައިގެން ބޭއްވި މީޓިންއެއްގައި އެބައޮތް ނިންމާފައި މާލޭގެ ޕާކިން ޒޯނުތަކުގެ ތެރޭގައި ބިއްލޫރިޖެހިގެ ފުރަގަހުގައި އޮތް ޖާގައަކީ ސައިކަލް ޕާކިން ޒޯނެއް ކަމަށް. ސިޓީ ކައުންސިލަށް އެކަން އޮންނާނެ ކޮމިއުނިކޭޓް ކޮށްފައި 23 އޮގަސްޓުގައި އީމެއިލްއަކުން ޔައުމިއްޔާއަކުން،" އަސްލަމް ވިދާޅުވި އެވެ.

"އެ ތަނަކީ ޕާކިން ޒޯނެއްގެ ގޮތުގައި ކަނޑައެޅިފައި އޮތް ތަނެއް. އެކަމަކު އެ ވިދާޅުވި ސިޓީ އަށް ޖަވާބު ނުދެވިފައި އޮތް ވާހަކަ އަޅުގަނޑު ވެސް ގަބޫލުކުރަން."

އޭނާ ވިދާޅުވީ އެ ގޯޅި ހުސްނުކުރެވުނީ ޕްލޭނިން މިނިސްޓްރީގެ ހުއްދައެއް ނުދެވިގެން ކަމަށް އޭނާ ގަބޫލުނުކުރައްވާ ކަމަށެވެ. އެކަމަކު ސިޓީ ކައުންސިލުން ފޮނުވި ސިޓީއަށް މިނިސްޓްރީން ޖަވާބެއް ދޭންޖެހޭނެ ކަމަށް ތަކުރާރުކޮށް ވިދާޅުވި އެވެ.

"އެކަން ނުކުރެވި، އަޅުގަނޑާ ހަމައަށް ސިޓީ ނައިސް އޮތް އޮތުމާއި އެއަށް ޖަވާބެއް ނުދެވި އޮތް އޮތުން އެއީ އަޅުގަނޑު އިންޓާނަލީ ވެސް ބަލަމުންދާ ކަމެއް. އަދި ބޮޑު ތަހުގީގުގެ ތެރޭގައި ބަލާނެ ކަމެއްކަން ވެސް ޔަގީން."

ސިޓީ ކައުންސިލުން ފޮނުވި ސިޓީގައި ބުނެފައިވަނީ ނީލޯފަރު ހިނގުން ހަނިކަމުން ނަޝީދަށް ސެކިއުރިޓީ ދޭން އުނދަގޫވާ ކަމަށް އެމްއެންޑީއެފުން އަންގާފައިވާ ކަމަށެވެ. އެހެންވެ، އެ ސިޓީގައި އެދުނީ ނީލޯފަރުމަގުގައި ޕާކްނުކުރެވޭ ގޮތް ހަދައި، އެ ސަރަހައްދުގައި ޕާކުކޮށްފައިވާ ވެހިކަލްތަކަށް ހާއްސަ ޕާކިން ޒޯނެއް ބިއްލޫރިޖެހިގޭގައި ހެދުމުގެ ހުއްދަ އެދި އެވެ.

އަސްލަމް ވިދާޅުވީ އެ ތަނުގައި ޕާކިން ޒޯނެއް ހަދަން ނިންމާފައި އޮތުމުން ސިޓީ ކައުންސިލުން އެކަން ކުރަން އިތުރު ހުއްދައެއް ނަގަންޖެހޭ ކަމަށް އޭނާ ގަބޫލުނުކުރަައްވާ ކަމަށެވެ.

ކެނެރީގެ ހުންނަ ގޯޅި ވަރަށް ހަނިވެފައި އެއް ފަރާތުގައި ސައިކަލްތައް ޕާކުކޮށްފައި ހުރުމުން ހަތަރު ފުރޮޅުލީ އުޅަނދުތަކަށް އެ ގޯޅިއަކަށް ނުވަދެވެ އެވެ. އެހެންވެ ނަޝީދުގެ ކާރުކޮޅު ވެސް އާންމުކޮށް ޕާކް ކޮށްފައި އޮންނަނީ ކެނެރީގެ ހުންނަ ގޯޅިން މަޖީދީމަގާ ވީ ފަރާތުން އެ ގޯޅީގެ ކަންމަތީގަ އެވެ.