ޒީޓީވީ އަށް "ބަގިއާ" ހިމަނައިގެން އިތުރު ސިލްސިލާއެއް

މިހާރު ވެސް "ބަގިޔާ" ނަން ހިމަނައިގެން ދެ ސިލްސިލާއެއް ގެނެސްދޭ ޒީޓީވީން އަނެއްކާ ވެސް އެ ނަމާ ގުޅުވައިގެން އިތުރު ސލްސިލާއެއް ގެނެސްދޭން ތައްތާރުވާން ފަށައިފި އެވެ.

މިހާރު ޕްރޮމޯތައް ވެސް ދައްކަމުން އަންނަ ސިލްސިލާގެ ނަމަކީ "ބަގިއާ ލަކްޝްމީ" އެވެ. މީގެ ޓައިޓްލް ރޯލު ކުޅެނީ ކުރިން ވެސް ޓީވީ ސިލްސިލާތަކެއް ކުޅެފައިވާ އައިޝްވާރިއާ ޚާރޭ އެވެ. އޭނާ ކުރިން ކުޅުނު ސިލްސިލާތަކުގެ ތެރޭގައި "ސާމް ދާން ދަންޑު ބޭޅު" އާއި "ވިޝްކަނިއާ...އޭކް އަނޯކް ޕްރޭމް ކަހާނީ" އަދި ސްޓާ ޕްލަސް އިން ދައްކަމުން އަންނަ ސިލްސިލާ "ޔޭ ޖޭ ޗާހަތޭ" ހިމެނެ އެވެ.

"ބަގިއާ ލަކްޝްމީ" ގެ ފުރަތަމަ ދެ ޕްރޮމޯ އިން އައިޝްވާރިއާ ފެނިގެން ދަނީ "ކުންދަލީ ބަގިއާ" ގެ ބަތަލާ ޝްރަދާ އާރިއާ އާއި "ކުމްކުމް ބަގިއާ" ގެ ބަތަލާ ސްރިތީ ޖާއާ އެކީގަ އެވެ.

ދައްކަން ފަށާނެ ތާރީހެއް އަދި އިއުލާން ނުކުރާ "ބަގިއާ ލަކްޝްމީ" ގެ ބަތަލަކީ ރޯހިތު ސުޗާންތީ އެވެ. "ބިގް ބޮސް 12" ގައި ވެސް ވާދަކުރި އެކްޓަރު އާ ސިލްސިލާ އިން ފެންނާނީ ރިޝީ އޮބެރޯއީ ކިޔާ ކެރެކްޓާއަކުންނެވެ.

ރޯހިތު ކުރިން ކުޅެފައިވާ ސިލްސިލާތަކުގެ ތެރޭގައި ކުރީގެ "ސާތު ނިބާނާ ސާތިޔާ" އާއި "ދިލް ޔޭ ޒިއްދީ ހޭ" އަދި މި އަހަރުގެ ކުރީކޮޅު ސްޓާ ޕްލަސް އިން ނިންމައިލި "ޝާދީ މުބާރަކް" ހިމެނެ އެވެ.

"ބަގިއާ ލަކްޝްމީ" އާ ބެހޭ ގޮތުން ރޯހިތު ބުނީ މި ސިލްސިލާ އަކީ ވަރަށް އާ ކަންތައްތަކެއް ބެލުންތެރިންނަށް ފެނިގެންދާ ވަރަށް ތާޒާ ޕްލޮޓެއް އޮތް އެއްޗެއް ކަމަށެވެ. އެހެންވެ ބެލުންތެރިންނަށް އެ ވަރަށް ކަމުދާނެ ކަމަށް ބުންޏެވެ.

"ބަގިއާ ލަކްޝްމީ" އަކީ "ކުމްކުމް ބަގިއާ" އާއި "ކުންދަލީ ބަގިއާ" ގެ ވެސް ޕްރޮޑިއުސަރު އެކްތާ ކަޕޫރްގެ ބާލާޖީން ގެނެސްދޭ ސިލްސިލާއެކެވެ.